Claudia Elena Menéndez Fernández y Pablo Rodríguez Medina, propuestos como numberarios de l’ALLA
El plenariu tamién propón la entrada, como miembru d’honor, de la romanista Éva Buchi
La xunta estraordinaria de l’Academia de la Llingua Asturiana (ALLA) propunxo, esti llunes día 8, la entrada de tres nuevos académicos. Como miembros de númberu, Claudia Elena Menéndez Fernández y Pablo Rodríguez Medina; y, como miembru d’honor, Éva Buchi.
D’alcuerdu colos estatutos de l’ALLA, les tres persones propuestes habrán aceutar la so nueva condición académica y, como ye vezu y obligación, recoyela públicamente dientro de la sesión estraordinaria enmarcada nel XLV Día de les Lletres Asturianes, que va celebrase’l vienres 3 de mayu nel Teatru Campoamor d’Uviéu.
Claudia Elena Menéndez Fernández (La Güeria Carrocera, Samartín del Rei Aurelio, 1994) ye profesora de Llingüística Románica na Universidá d’Uviéu. Doctora en Filoloxía Románica, la so actividá investigadora (que, ente otres especialidaes, va de la onomástica a la sociollingüística y que-y valió pa tener delles estancies n’universidaes europees) da como resultáu una importante collecha de publicaciones, participaciones en proyeutos y conferencies. En rellación cola ALLA, destaca la so implicación en dos comisiones de trabayu (pedagóxica y lexicográfica), na Universidá Asturiana de Branu (como docente y direutora) y tamién nel ámbitu editorial, como autora de dellos artículos y del llibru Averamientu al asturianu de La Güeria Carrocera, trabayu que consiguiere’l primer premiu y el premiu especial nos concursos d’investigación de l’Academia nel añu 2022.
Pablo Rodríguez Medina (L’Entregu, Samartín del Rei Aurelio, 1978) ye académicu correspondiente de l’ALLA y profesor de Llingua Castellana y Lliteratura en Secundaria y Bachilleratu. La so condición de filólogu Especialista en Llingua Asturiana tamién-y permitió ser profesor de Llingua Asturiana y Lliteratura nueve cursos académicos. La so bayurosa producción pue xebrase en dos estayes. Como escritor en práuticamente tolos xéneros lliterarios, tien ganao dellos de los concursos más importantes del país. Como estudiosu de la lliteratura, amás de crítica en delles revistes de creación, ye autor d’una importante coleición d’obres d’analís lliterariu. Aparte de la so pertenencia a l’Academia como miembru correspondiente, ha sorrayase’l so historial como docente nos programes formativos de la institución y la publicación, dientro d’ella, d’ocho obres lliteraries y dellos artículos d’investigación.
Éva Buchi (Lucerna, 1964) ye direutora d’investigación del Centre National de la Recherche Scientifique (CNRS), profesora de la Universidá de Lorraine, editora de la revista Zeitschrift für romanische Philologie y codireutora del Dictionnaire Étymologique Roman (DÉRom). Estes y otres ocupaciones faen d’ella una referencia internacional nel so campu. Doctora en Llingua y Lliteratura Romániques, la so estensísima obra, con delles decenes d’artículos, entraes de diccionariu o capítulos, caltién un importante compromisu cola llingua asturiana y el so estudiu dientro del ámbitu románicu. Amás de ser miembru del comité científicu de Lletres Asturianes, delles de les sos investigaciones asoleyaes nesta y otres publicaciones, estudien l’asturianu dende perspeutives estremaes, como, por exemplu, l’antroponimia, la morfoloxía o la etimoloxía.
Uviéu, 10 d’abril del 2024
