Llueu de la renuncia de Marta Mori, l’Academia zarró ayeri’l correspondiente procesu eleutoral pa facer definitiva la sustitución nel cargu. Asina, d’alcuerdu colos artículos 19.3 y 19.4 de los sos estatutos, el plenariu de l’ALLA llevó a votación la única candidatura presentada. D’esti xeitu, l’académicu xixonés David Guardado foi escoyíu nel cargu de vicepresidente, inxiriéndose nel  organigrama de la Xunta de Gobiernu que va tar vixente hasta xunu del añu 2025 y que, en resultes, queda d’esta miente, conforme al artículu 18.1:

Xosé Antón González Riaño, Presidente

David Guardado Diez, Vicepresidente

Xosé Ramón Iglesias Cueva, Secretariu

Carmen Muñiz Cachón, Vicesecretaria

Carlos Lastra López, Ayalgueru

La Junta de Govern de l’AVL, formada pola presidenta Verònica Cantó, el vicepresidente Rafael Ramos, la secretaria Inmaculada Cerdà y los vocales M. Àngles Francés y Artur Ahuir, visitó la selmana pasada’l llar de l’ALLA, onde foi recibida por cuatro miembros de la Xunta de Gobiernu de l’ALLA: el presidente Xosé Antón González Riaño, el secretariu Xosé Ramón Iglesias Cueva y l’ayalgueru Carlos Lastra López, actuando Ana M. Cano González como vicepresidenta en funciones.

A lo llargo de más de dos hores d’alcuentru, dambes instituciones pudieron conocer les singularidaes y los numberosos puntos de conexón nes sos xeres académiques, l’estáu de desenvolvimientu de la filoloxía y les polítiques llingüístiques en cada comunidá y les posibilidaes de confluyencia futura, d’alcuerdu coles esperiencies y les ferramientes que caúna de les academies punxo al algame de la otra. Arriendes d’ello, la presidenta Verònica Cantó ufrió-y a l’ALLA una escelente edición facsimilar del Llibre dels feits del rei en Jaume, asoleyáu pola Academia Valenciana.

Nesti sen de collaboración, surdieron los tres primeros compromisos interinstucionales: l’asistencia de l’AVL al Día de les Lletres Asturianes de 2024, l’intercambéu de les publicaciones futures de los sos servicios editoriales y la recoyida de les principales víes d’afondamientu nel trabayu acomuñáu, nun conveniu qu’ha roblase nos meses vinientes.

La Universidá d’Uviéu ta acabante d’asoleyar la ufierta y la forma d’inscripción nos sos cursos de branu, ente los que tán los de la Universidá Asturiana de Branu (UABRA), entamaos a comuña cola Academia de la Llingua Asturiana (ALLA) y que, esti añu, van facese n’El Campu (Casu). Amás, el cursu de capacitación docente n’eonaviegu, que remata anguaño y celebra n’A Caridá (El Franco) la so segunda fase, tamién entra en periodu de matriculación. Tola ufierta de la UABRA va desendolcase ente’l 31 de xunetu y el 11 d’agostu.

Pa los cursos en collaboración cola Universidá d’Uviéu, que son los que van tener llugar en Casu, hai que siguir dos pasos nel procesu d’inscripción. De primeres, facer una prematrícula na ALLA, siguiendo les indicaciones espublizaes na web http://alladixital.org/uabra. Darréu, ye necesario formalizar la matrícula na Universidá al traviés de https://www.uniovi.es/estudia/extension/cursosverano, comunicándo-ylo, d’últimes, a l’ALLA. Los gastos asociaos a estos dos pasos inclúin, amás del coste de matrícula y certificación, el desendolcu docente del propiu cursu, l’agospiu, la mantención y les actividaes culturales complementaries (conferencies y música) abiertes a la comunidá, que van anunciase d’equí a unos díes. La xera docente va tener dos espacios n’El Campu (La Campa y el Centru d’Interpretación del Parque Natural de Redes), mentes que la residencia va tar allugada nel albergue propiedá del Conceyu de Casu.

El programa de formación llingüística xeneral ye’l compuestu polos cursos Elemental y Avanzáu de llingua asturiana, dirixíos polos profesores Gonzalo Llamedo y Claudia Elena Menéndez. Con 60 hores llectives, en 10 díes de docencia, la prematrícula na ALLA de caún d’estos cursos cuesta 200 euros, mentanto que la matrícula na Universidá, 192 €.

Dientro de los cursos d’afondamientu cultural y llingüísticu, como ye vezu, hai dos turnos. Nel primeru, ente’l 31 de xunetu y el 4 d’agostu, tán el cursu de Capacitación pa la traducción al asturianu (dirixíu pola direutora de la UABRA, Cristina Valdés) y el d’Anovamientu curricular nel marcu de la LOMLOE, Educación Primaria y Secundaria (dirixíu por Roberto Avello y María Verdeja). Nel segundu turnu, del 7 al 11 d’agostu, celebraráse’l cursu 50 años en movimientu: ámbitos y espacios de desendolcu, normalización y vindicación de la llingua asturiana na historia recién (dirixíu por Marcos Rodríguez) y el de Recoyida y recuperación de la tradición oral y musical (dirixíu por Ramsés Ilesies y José Ignacio Suárez). Estos cuatro cursos d’afondamientu, con 30 hores llectives en 5 díes de docencia, conlleven 120 euros de prematrícula na ALLA y 96 de matrícula na Universidá.

Pel so llau, el cursu de capacitación docente n’eonaviegu entra na so segunda fase, restrinxíu al alumnáu que superó la primera, celebrada l’añu pasáu, igual qu’esti, n’A Caridá, dientro del Complexu Cultural As Quintas, gracies a la collaboración del Conceyu d’El Franco. La carga llectiva d’esta segunda fase crez anguaño hasta les 60 hores llectives, repartíes nes asignatures: “Práctica escrita”, “Práctica oral”, “Plantiamentos didácticos”, “Aspectos de sociollingüística”, “Lliteratura actual” y “Espresióis culturales nel Navia-Eo”. Nel rodiu d’esti cursu tamién tán plantegaes dos actividaes complementaries abiertes a la comunidá, que tán a piques de confirmase. La formalización de la matrícula nesta segunda fase de capacitación tamién va desenvolvese pela vía dixital per aciu de la web institucional http://alladixital.org/uabra.