La quinta sesión de los «Alcuentros na ALLA» va cuntar col académicu Roberto González-Quevedo

El miércoles viniente, 21 d’ochobre, a les 19:30 h, l’Academia de la Llingua Asturiana organiza nel so llar social la quinta sesión de «Alcuentros na ALLA» cola participación de Roberto González-Quevedo. Mesmo que n’otres ocasiones, l’académicu va ufrir al alderique les sos reflexones, análisis y vivencies en rellación cola so xera na Academia. Depués d’una presentación dialogada xunto con Inaciu Galán y d’alcuerdu col oxetivu de los alcuentros, el públicu podrá dirixir la esposición pente medies d’entrugues o comentarios concretos.

Roberto González-Quevedo González (Palacios del Sil, 1953) ye antropólogu, filósofu, escritor y doctor n’Antropoloxía Cultural pola Universidá Autónoma de Madrid y en Filoloxía Hispánica pola Universidá d’Uviéu. Como académicu de númberu de l’ALLA, dende la so entrada na institución en 1981 dedica una parte fundamental de la so trayeutoria al estudiu y defensa de la cultura y la llingua asturianes. Esti llabor tien una de les sos espresiones principales na direición de Cultures. Revista Asturiana de Cultura, un espaciu d’estudiu antropolóxicu y etnográficu qu’amiesta l’atención a la realidá asturiana cola apertura a otres cultures.

La so proyeición internacional axunta la promoción de los estudios sobre Asturies cola defensa de la diversidá llingüística y cultural europea. Anguaño ye presidente de l’Asociación pa les Llingües y Cultures Europees Amenazaes (ALCEM) y presidió tamién el comité entamador del Congresu Mundial de Cultura Asturiana (CMCA) del 2025.

Con esta participación, los «Alcuentros na ALLA» siguen col llabor d’abrir l’Academia a la comunidá, espardiendo y desplicando d’una manera más específica y personal el llabor de la institución y de los sos integrantes.

L’accesu ye llibre hasta completar l’aforu de 30 persones.