La revista d’estudios culturales de l’Academia de la Llingua Asturiana estrenó n’avientu de 2024 el so númberu 28. Esti volume recueye artículos de dellos de los investigadores que van participar nel Congresu Mundial de Cultura Asturiana (CMCA25) del 4 al 7 de febreru de 2025.  Dientro d’él atópense artículos dedicaos al estudiu del símbolu del aniellu perdíu nel agua na lliteratura europea, les creyencies populares nel pueblu de Mengoyu, el discursu rexonalista en Provenza o los efeutos de la migración na identidá del migrante ente Méxicu y Los Estaos Xuníos. Amás d’ello, tamién s’inclúin estudios que traten los anovamientos na gaita asturiana dende la década de los 80 y la so rellación cola música académica, el papel de les muyeres nos llagares asturianos de sidra o la evolución de los traxes tradicionales en Llanes.