{"id":4650,"date":"2017-10-10T12:07:08","date_gmt":"2017-10-10T11:07:08","guid":{"rendered":"https:\/\/alladixital.org\/1471-2\/"},"modified":"2017-10-10T12:07:08","modified_gmt":"2017-10-10T11:07:08","slug":"1471-2","status":"publish","type":"post","link":"https:\/\/alladixital.org\/en\/1471-2\/","title":{"rendered":"L\u2019encaxe del asturianu nos espacios informativos de la RTPA y la responsabilid\u00e1 del so direutor"},"content":{"rendered":"

<\/h1>\n

La presencia del asturianu nos medios p\u00fablicos de comunicaci\u00f3n ta perafitada llegalmente. Ello pue vese nel art. 4 del Estatutu d\u2019Autonom\u00eda d\u2019Asturies (1981), nel art. 13.2 de la Llei d\u2019Usu del Asturianu (1998) o nel art. 8.1 de la Llei de Segunda Reestructuraci\u00f3n del Sector P\u00fablicu (2014).<\/p>\n

<\/p>\n

Acordies con esti marcu xur\u00eddicu y faciendo usu del papel tutelar de los derechos lling\u00fc\u00edsticos que-y correspuende a l\u2019Academia de la Llingua Asturiana (ALLA), esta instituci\u00f3n vieno calteniendo conversaciones a lo llargo de los \u00faltimos a\u00f1os col Direutor de la RTPA, D. Antonio Virgili, col env\u00eds de plantegar mid\u00edes de visualizaci\u00f3n y normalizaci\u00f3n de la llingua asturiana na RTPA.<\/p>\n

El result\u00e1u d\u2019estes conversaciones \u2013que ten\u00eden como exe central un emplegu modernu, comunicativu y dignu del asturianu nos espacios informativos\u2013, siempre foi frustante pa n\u00f3s, darr\u00e9u que, al llau de les bones pallabres, siempre apaec\u00eda dalg\u00fan problema qu\u2019allargaba sine die la posibilid\u00e1 d\u2019una soluci\u00f3n concreta a la demanda. Esti facer allarg\u00f3se a\u00f1os y a\u00f1os.<\/p>\n

Pa tratar d\u2019iguar definitivamente la situaci\u00f3n del asturianu nos espacios informativos de la Televisi\u00f3n del Princip\u00e1u, l\u2019ALLA aconcey\u00f3\u2019l 17 de xunetu pas\u00e1u col Direutor de la RTPA. Nesti aconceyamientu present\u00f3se al Ente de comunicaci\u00f3n auton\u00f3micu una propuesta pa entamar un espaciu informativu diariu n\u2019asturianu. La propuesta de l\u2019ALLA concret\u00f3se nestos t\u00e9rminos:<\/p>\n

    \n
  1. L\u2019Academia de la Llingua Asturiana prop\u00f3n a la Direici\u00f3n de la RTPA qu\u2019\u00fan de los sos espacios informativos diarios (mediud\u00eda o tarde-nueche) seya n\u2019asturianu.<\/li>\n
  2. L\u2019oxetivu ye que la radiotelevisi\u00f3n p\u00fablica asturiana contribuya a la dignificaci\u00f3n y normalizaci\u00f3n de la llingua y cultura d\u2019Asturies.<\/li>\n
  3. La propuesta af\u00e1yase dafechu a les demandes sociales (III Estudiu Sociolling\u00fc\u00edsticu, 2017), onde se conse\u00f1a que cuasi un 60% de la poblaci\u00f3n asturiana reclama esta clas de programes informativos.<\/li>\n
  4. L\u2019espaciu informativu n\u2019asturianu incluir\u00eda portada y presentaci\u00f3n, llocuci\u00f3n de noticies, creitos, la informaci\u00f3n deportiva y la del tiempu.<\/li>\n
  5. Les emisiones entamar\u00eden nel mes de mayu de 2018 (coincidiendo col D\u00eda de les Lletres Asturianes).<\/li>\n
  6. L\u2019Academia de la Llingua Asturiana compromet\u00edase a dise\u00f1ar un Plan de Formaci\u00f3n Espec\u00edficu y urxente pal personal de la RTPA que llibremente quixere participar n\u00e9l y a llevalu alantre nes propies instalaciones de la RTPA. El cit\u00e1u plan nun implicar\u00eda coste econ\u00f3micu pa la RTPA.<\/li>\n<\/ol>\n

    Nestes conversaciones, nes que D. Antonio Virgili tuvo acompa\u00f1\u00e1u per parte del equipu direutivu de la RTPA, fal\u00f3se, peles dos partes, de distintes opciones pa concretar la propuesta y alcord\u00f3se retomar les conversaciones nel mes de setiembre.<\/p>\n

    Pas\u00e1u esti plazu, l\u2019ALLA ponse en contatu col Direutor de la RTPA y esti respuende per corr\u00e9u electr\u00f3nicu y al travi\u00e9s de la so secretaria. Na comunicaci\u00f3n, que podr\u00edemos calificar mui duramente, d\u00edzsenos que\u2019l compromisu de la Radiotelevisi\u00f3n P\u00fablica del Princip\u00e1u d\u2019Asturies cola dignificaci\u00f3n y normalizaci\u00f3n de la llingua asturiana amu\u00e9sase pente medies de programes como, ente otros, \u201cAsturianaes\u201d, \u201cDe folixa en folixa\u201d, \u201cGu\u00eda Chigr\u00edn\u201d o la retresmisi\u00f3n n\u2019asturianu de la \u201cMisa dende la Cueva San Pedr\u00edn\u201d.<\/p>\n

    Quede claro, enantes de siguir, la nuesa consideraci\u00f3n y respetu hacia esos programes (y otros de calter etnogr\u00e1ficu) porque toos ellos son importantes pa la promoci\u00f3n de la cultura asturiana, pero dende l\u2019Academia tamos falando d\u2019otra cosa. Tamos falando de les posibilidaes de dignificar la llingua asturiana empleg\u00e1ndola como llingua normal de comunicaci\u00f3n nos espacios informativos.<\/p>\n

    Dende esti puntu de vista, la respuesta paeznos una burlla a les espeutatives y demandes de la socied\u00e1 asturiana. Tal respuesta, am\u00e1s, adopta un tonu impertinente cuando amiesta (sic) que \u201cdar un paso m\u00e1s all\u00e1 como el que solicita la Academia de la Llingua es, en estos momentos, inasumible por RTPA. El Estatuto de Autonom\u00eda del Principado de Asturias no recoge el asturiano como lengua oficial\u2026\u201d<\/p>\n

    N\u00f3s, l\u2019Academia de la Llingua Asturiana, entendemos el mensax y esti ye inequ\u00edvocu: mentanto\u2019l Sr. Virgili seya Direutor de la RTPA la llingua asturiana nun tendr\u00e1 espacios de dignificaci\u00f3n al travi\u00e9s del so usu normal n\u2019espacios informativos; pero l\u2019ALLA tami\u00e9n quier unviar a la socied\u00e1 un mensax inequ\u00edvocu: Antonio Virgili nun ye la persona indicada pa dirixir la televisi\u00f3n p\u00fablica asturiana. Nun ye posible que la so actuaci\u00f3n condicione la normalizaci\u00f3n lling\u00fc\u00edstica y l\u2019esfuerzu de munches persones enfotaes na recuperaci\u00f3n del asturianu. Quiciabes el so papel y determ\u00edn encaxe na empresa privada pero, de neng\u00fan mou, nuna televisi\u00f3n con vocaci\u00f3n p\u00fablica y asturiana. Darr\u00e9u de lo anterior, l\u2019Academia de la Llingua Asturiana pide la dimisi\u00f3n inmediata de D. Antonio Virgili y da anuncia de que treslladar\u00e1 esta petici\u00f3n a la opini\u00f3n p\u00fablica asturiana, a los estremaos axentes sociales y a los grupos parllamentarios allugaos na Xunta Xeneral del Princip\u00e1u d\u2019Asturies.<\/p>\n

     
    \n