{"id":4714,"date":"2016-10-05T16:59:16","date_gmt":"2016-10-05T15:59:16","guid":{"rendered":"https:\/\/alladixital.org\/10-anos-de-rtpa-si-pero-ensin-una-presencia-digna-de-la-llingua-asturiana\/"},"modified":"2016-10-05T16:59:16","modified_gmt":"2016-10-05T15:59:16","slug":"10-anos-de-rtpa-si-pero-ensin-una-presencia-digna-de-la-llingua-asturiana","status":"publish","type":"post","link":"https:\/\/alladixital.org\/en\/10-anos-de-rtpa-si-pero-ensin-una-presencia-digna-de-la-llingua-asturiana\/","title":{"rendered":"10 a\u00f1os de RTPA, s\u00ed, pero ensin una presencia digna de la llingua asturiana"},"content":{"rendered":"
\n

NOTA OFICIAL: 10 A\u00d1OS DE RTPA, S\u00cd, PERO ENSIN UNA PRESENCIA DIGNA DE LA LLINGUA ASTURIANA<\/p>\n

<\/p>\n

La RTPA lleve meses apregonando \u2013y lluciendo en toles sos emisiones\u2013 un anagrama especial conmemorativu de los 10 a\u00f1os de la so esistencia.<\/p>\n

El qu\u2019un ente p\u00fablicu de radiotelevisi\u00f3n asturiana algame los 10 a\u00f1os ye un fechu ensin dulda relevante pa la vertebraci\u00f3n d\u2019una comunid\u00e1 aut\u00f3noma que, como Asturies, ta somorguiada nuna fonda crisis econ\u00f3mica, social y cultural.<\/p>\n

Apocay\u00e1, va unos a\u00f1os, la RTPA sofri\u00f3 una fuerte crisis estructural que tuvo a piques de facela desapaecer. Nesi momentu, tanto los sos trabayadores como la direici\u00f3n del ente quixeron treslladar a la opini\u00f3n p\u00fablica asturiana la importancia del so llabor social y cultural, mesmamente polo que cinca al usu y caltenimientu de la llingua asturiana como patrimoniu com\u00fan de tolos asturianos.<\/p>\n

Pero, a lo que paez, la crisis pas\u00f3 y el compromisu de la RTPA cola dignificaci\u00f3n del asturianu sigui\u00f3 como siempres; ye dicir, ensin sobrepasar el 5% de la emisi\u00f3n selmanal y con una programaci\u00f3n tem\u00e1tica que da una visi\u00f3n del asturianu ente etnogr\u00e1fica y costumista. El propiu Conseyeru d\u2019Educaci\u00f3n y Cultura del Gobiernu del Princip\u00e1u d\u2019Asturies criticaba d\u00edes atr\u00e1s les insuficiencies d\u2019esti modelu.<\/p>\n

 <\/p>\n

Convi\u00e9n saber, en tou casu, qu\u2019una presencia digna del asturianu na RTPA nun ye nam\u00e1i una cuesti\u00f3n de sensibilid\u00e1 cultural de dellos sectores asturianos, sin\u00f3n que deriva direutamente del marcu llegal que la enconta (Llei d\u2019Usu del Asturianu de 1998 y Llei de Segunda Reestructuraci\u00f3n del Sector P\u00fablicu Aut\u00f3micu de 2014). Pues bien, los mandaos calten\u00edos nes anteriores lleis son dafechu desatend\u00edos pola direici\u00f3n de la RTPA, magar tolos indicadores d\u2019audiencia afiten l\u2019aceutaci\u00f3n popular de la presencia del asturianu na radio y televisi\u00f3n publiques d\u2019Asturies.<\/p>\n

L\u2019Academia de la Llingua Asturiana (ALLA) camienta nesti sen qu\u2019una presencia granible del asturianu na RTPA esixe d\u2019un compromisu claru d\u2019esta pa col procesu de recuperaci\u00f3n lling\u00fc\u00edstica n\u2019Asturies y pide, darr\u00e9u d\u2019ello, que se dean pasos urxentes nel emplegu del asturianu con un encl\u00edn nidiamente comunicativu. Esto ye y como una propuesta de m\u00ednimos, un espaciu informativu na tv. (el del meud\u00eda o la nueche) dafechu n\u2019asturianu, xunto con otros programes que dignifiquen l\u2019usu social de la llingua (magacines, restrasmisiones deportives, documentales de tem\u00e1tica actual, etc.); espacios informativos con un usu cotidianu del asturianu na radio y, dende llueu, un peri\u00f3dicu dixital dafechu n\u2019asturianu (o con una opci\u00f3n doble de llectura n\u2019asturianu y en castell\u00e1n).<\/p>\n

 <\/p>\n

Los tiempos cuerren a la escontra d\u2019una llingua minoritaria y minorizada que, como l\u2019asturianu, cunta con un marcu de proteici\u00f3n enforma feble y curtiu. L\u2019ALLA entiende, acordies colo anterior, que y\u00e1 nun ye posible esperar por m\u00e1s tiempu: neces\u00edtase agora iguar una situaci\u00f3n inxustificable, social y cultural, pa col asturianu na RTPA.<\/p>\n

L\u2019Academia de la Llingua Asturiana da anuncia, a lo cabero, que pa treslladar estos encamientos al ente p\u00fablicu, acaba de solicitar una entrevista urxente con D. Antonio Virgili Rodr\u00edguez, Direutor Xeneral de la RTPA.<\/p>\n

Uvi\u00e9u, 5\u2019ochobre de 2016.<\/p>\n

ACADEMIA DE LA LLINGUA ASTURIANA<\/strong><\/p>\n<\/div>\n

 
\n