{"id":4747,"date":"2016-01-19T14:37:35","date_gmt":"2016-01-19T13:37:35","guid":{"rendered":"https:\/\/alladixital.org\/alrodiu-de-la-especialida-docente-de-llingua-asturiana\/"},"modified":"2016-01-19T14:37:35","modified_gmt":"2016-01-19T13:37:35","slug":"alrodiu-de-la-especialida-docente-de-llingua-asturiana","status":"publish","type":"post","link":"https:\/\/alladixital.org\/en\/alrodiu-de-la-especialida-docente-de-llingua-asturiana\/","title":{"rendered":"Al rodiu de la especialid\u00e1 docente"},"content":{"rendered":"

NOTA OFICIAL: AL RODIU DE LA ESPECIALID\u00c1 DOCENTE DE LLINGUA ASTURIANA<\/p>\n

 <\/p>\n

L\u2019Academia de la Llingua Asturiana vien siguiendo con munchu inter\u00e9s y fonda preocupaci\u00f3n les noticies apaec\u00edes apocay\u00e1 nos medios de prensa escrita, radio y tv., no que cinca a la tramitaci\u00f3n de la demanda de la especialid\u00e1 docente de Llingua Asturiana pal profesor\u00e1u d\u2019Educaci\u00f3n Primaria y Secundaria.<\/p>\n

La s\u00edntesis d\u2019estes noticies plantega, per un llau, que\u2019l Ministeriu d\u2019Educaci\u00f3n del Gobiernu d\u2019Espa\u00f1a diz nun tener competencies pa facer posible tal especialid\u00e1 y, per otru, que, darr\u00e9u d\u2019ello, la Conseyer\u00eda d\u2019Educaci\u00f3n del Princip\u00e1u va facer vidable la especialid\u00e1 al travi\u00e9s d\u2019un decretu auton\u00f3micu (tr\u00e1mite nel que va participar una comisi\u00f3n inter-institucional con representantes cualificaos del Ministeriu y de la Conseyer\u00eda d\u2019Educaci\u00f3n).<\/p>\n

\u00c9nte estes anuncies, l\u2019Academia de la Llingua Asturiana quier dexar claro lo siguiente:<\/p>\n

    \n
  1. Resulta inaudito que\u2019l Ministeriu d\u2019Educaci\u00f3n tresmita la idea de que\u2019l tema de les especialidaes docentes nun forma parte de los sos atribuciones esclusives, darr\u00e9u que ye xustamente esti Ministeriu\u2019l que les establez, tanto pal cuerpu de Maestros d\u2019Educaci\u00f3n Infantil y Primaria (Real Decretu 1594\/2011, de 4 de noviembre), como pal profesor\u00e1u d\u2019Educaci\u00f3n Secundaria (Real Decretu 1834\/2008, de 8 de noviembre, desarroll\u00e1u llueu col Real Decretu 665\/2015, de 17 de xunetu). Asina, a t\u00edtulu d\u2019exemplu, les especialidaes docentes n\u2019Educaci\u00f3n Infantil y Primaria son: Educaci\u00f3n Infantil, Educaci\u00f3n Primaria, Llingua Estranxera (Ingl\u00e9s), Llingua Estranxera (Franc\u00e9s), Llingua Estranxera (Alem\u00e1n), Educaci\u00f3n F\u00edsica, M\u00fasica, Pedagox\u00eda Terap\u00e9utica y Audici\u00f3n y Llinguaxe.<\/li>\n
  2. El Ministeriu disp\u00f3n, del mesmu mou, que tami\u00e9n son especialidaes docentes na Educaci\u00f3n Primaria y Secundaria les correspondientes a les lling\u00fces propies cooficiales de les respectives comunidaes aut\u00f3nomes (art. 2.2 del Real Decretu de primaria y art. 2.3 del Real Decretu de secundaria).<\/li>\n
  3. Ello quier dicir que cualquier concursu oposici\u00f3n y de tresllaos en cualquier comunid\u00e1 aut\u00f3noma espa\u00f1ola ha facese, necesaria y obligatoriamente, acordies coles especialidaes docentes fixaes pol Ministeriu d\u2019Educaci\u00f3n, Cultura y Deporte.<\/li>\n
  4. Nun se contempla, nin nel ordenamientu xeneral del est\u00e1u nin nel de les autonom\u00edes, nenguna posibilid\u00e1 de crear especialidaes docentes de calter \u201cauton\u00f3micu\u201d. Ye dicir, nun hai funcionarios docentes en primaria y secundaria con una especialid\u00e1 que nun tea fixada pol Ministeriu.<\/li>\n
  5. La propuesta del Conseyu Escolar del Est\u00e1u (mu\u00e9rganu institucional que desarrolla un llabor consultivu, d\u2019asesoramientu y propuestes al Gobiernu del est\u00e1u en rellaci\u00f3n con los distintos aspeutos del sistema educativu espa\u00f1ol) no que cinca a la posibid\u00e1 de reconocimientu de la especialid\u00e1 docente de Llingua Asturiana ye que los reales decretos amiesten un apart\u00e1u que diga: Naquelles Comunidaes Aut\u00f3nomes nes qu\u2019haya lling\u00fces non oficiales que tengan proteici\u00f3n llegal y formen parte del curr\u00edculu, podr\u00e1 dase tami\u00e9n, a petici\u00f3n de la Comunid\u00e1 Aut\u00f3noma y seg\u00fan necesidades educatives, la especialid\u00e1 propia de la llingua respectiva<\/strong>. Esta ye, xustamente, la posici\u00f3n que defende l\u2019Academia de la Llingua Asturiana.<\/li>\n<\/ol>\n

     <\/p>\n

    Darr\u00e9u de lo anterior, esta instituci\u00f3n acad\u00e9mica pide a la Conseyer\u00eda d\u2019Educaci\u00f3n y Cultura del Gobiernu del Princip\u00e1u d\u2019Asturies que nun contribuya, magar seya de mou involuntariu, a semar m\u00e1s confusi\u00f3n ente la comunid\u00e1 educativa d\u2019Asturies. A la escontra d\u2019ello, l\u2019Academia encamienta a la Conseyer\u00eda que la so bona volunt\u00e1 pa encalzar esta demanda hest\u00f3rica empobine a una negociaci\u00f3n seria y rigurosa coles pr\u00f3ximes autoridades educatives del Est\u00e1u que lleve a un camb\u00e9u, nel sentiu propuestu, de los decretos d\u2019especialidaes. Sedr\u00eda llamentable dexar pasar una oportunid\u00e1 que vien sofitada, ente otres instituciones y coleutivos, polos sindicatos mayoritarios de la educaci\u00f3n p\u00fablica n\u2019Asturies, poles asociaciones de padres y madres con m\u00e1s implantaci\u00f3n na nuesa comunid\u00e1, pola Xunta Xeneral del Princip\u00e1u d\u2019Asturies, pola Xunta de Personal Docente non universitariu, pol Conseyu Escolar del Princip\u00e1u y, como viemos enantes, pol propiu Conseyu Escolar del Est\u00e1u.<\/p>\n

    Y una consideraci\u00f3n cabera m\u00e1s: toos estos y otros problemes que torguen el normal allugamientu normativu de la llingua asturiana y la so dignificaci\u00f3n nun desapaecer\u00e1n dafechu mentantu l\u2019idioma de los asturianos nun algame l\u2019estatus, xur\u00eddicu y constitucional, d\u2019oficialid\u00e1.<\/p>\n

    Uvi\u00e9u, a 19 d\u00edes andaos del mes de xineru de 2016.<\/p>\n

    ACADEMIA DE LA LLINGUA ASTURIANA<\/strong>
    \n