{"id":4894,"date":"2013-01-22T09:53:09","date_gmt":"2013-01-22T08:53:09","guid":{"rendered":"https:\/\/alladixital.org\/el-futuru-de-la-llingua-asturiana-acordies-cola-llei-wert-y-les-reclamaciones-de-la-comunida-educativa-asturiana\/"},"modified":"2013-01-22T09:53:09","modified_gmt":"2013-01-22T08:53:09","slug":"el-futuru-de-la-llingua-asturiana-acordies-cola-llei-wert-y-les-reclamaciones-de-la-comunida-educativa-asturiana","status":"publish","type":"post","link":"https:\/\/alladixital.org\/en\/el-futuru-de-la-llingua-asturiana-acordies-cola-llei-wert-y-les-reclamaciones-de-la-comunida-educativa-asturiana\/","title":{"rendered":"El futuru de la Llingua Asturiana acordies cola \u00abllei Wert\u00bb y les reclamaciones de la comunid\u00e1 educativa asturiana"},"content":{"rendered":"

Con fecha 17 d\u2019avientu de 2012 l\u2019Academia de la Llingua Asturiana alvert\u00eda a la opini\u00f3n p\u00fablica del peligru que corr\u00eda la ense\u00f1anza del asturianu si nun se contemplaba una correici\u00f3n ama\u00f1osa del articul\u00e1u de la LOMCE (Llei Org\u00e1nica de Meyora de la Calid\u00e1 Educativa), popularmente denomada \u00abLlei Wert\u00bb, que plantega\u2019l Gobiernu del Part\u00edu Popular (PP) en Madrid. L\u2019Academia fac\u00eda, am\u00e1s, un llam\u00e1u al Gobiernu del Princip\u00e1u d\u2019Asturies pa que tomare nes sos manes la esixencia d\u2019una soluci\u00f3n definitiva a los problemes d\u2019escolarizaci\u00f3n de la Llingua Asturiana.<\/span><\/p>\n

De mou paralelu, otres instancies y organizaciones (como los Sindicatos d\u2019Ense\u00f1anza SUATEA, CC.OO. y FETE-UXT), el Sindicatu d\u2019Estudiantes y organizaciones de padres d\u2019alumnos como FAPA Miguel Virg\u00f3s y FAPAS-Xix\u00f3n llevantaben la voz pa pidir col mayor enfotu que la futura Llei d\u2019Educaci\u00f3n nun fuere l\u2019elementu que llevare a la desapaici\u00f3n de la nuesa llingua hist\u00f3ria, sin\u00f3n que, a la escontra, ficiere vidable un futuru dignu pa la so escolarizaci\u00f3n, entamada va cuasi 30 a\u00f1os.<\/span><\/p>\n

Pues bien, ye decisi\u00f3n de l\u2019Academia, de los sindicatos y de les organizaciones de padres y alumnos collaborar axuntando esfuerzos pa treslladar el Part\u00edu Popular, a los Gobiernos d\u2019Espa\u00f1a y d\u2019Asturies, a les fuerces pol\u00edtiques de la Xunta Xeneral y a tol pueblu asturianu la so esmolici\u00f3n y esixencia d\u2019una soluci\u00f3n efeutiva pa la escolarizaci\u00f3n del asturianu. <\/span><\/p>\n

N\u00f3s nun representamos a tola socied\u00e1 asturiana, pero somos una parte importante de la comunid\u00e1 educativa asturiana y queremos que se nos sienta nunos momentos que puen ser decisivos pa la sobrevivencia de la llingua y cultura d\u2019Asturies. Somos sabedores qu\u2019estos y otros problemes (emplegu de la llingua na alministraci\u00f3n, nos medios de comunicaci\u00f3n p\u00fablicos, na toponimia, etc) tienen el so orixe na falta de reconocimientu xur\u00eddicu del asturianu como llingua oficial; poro, reclamamos esi estatus xur\u00eddicu d\u2019oficialid\u00e1, entendiendo qu\u2019\u00e9sta ha afayase a la realid\u00e1 social y econ\u00f3mica d\u2019Asturies y teniendo tami\u00e9n en cuenta la nuesa tradici\u00f3n cultural y sociolling\u00fc\u00edstica. Reclamamos, en definitiva, un consensu pol\u00edticu ampliu que defina les carauter\u00edstiques qu\u2019ha tener la oficializaci\u00f3n de la llingua, les sos fases d\u2019aplicaci\u00f3n y los recursos que, acordies cola situaci\u00f3n de crisis que nos llenda, puen destinase a esti fin.<\/span><\/p>\n

Pero esiximos tambi\u00e9n, y col mayor puxu, que los redactores de la \u00abLlei Wert\u00bb seyan conscientes de qu\u2019Asturies tien una llingua propia que, magar nun ser llingua co-oficial, s\u00ed tien reconocimientu xur\u00eddicu como llingua, am\u00e1s de plenu calter curricular y que vien siendo estudiada con procuru por miles d\u2019alumnos asturianos a lo llargo de les 3 \u00faltimes d\u00e9cades. Los redactores de la llei tienen que saber esto y tienen qu\u2019actuar en consecuencia, ye dicir, faciendo porque la escolarizaci\u00f3n de la llingua asturiana s\u2019allugue con xeitu al llau del restu de les aries lling\u00fc\u00edstiques.<\/span><\/p>\n

Ye inalmisible cualquier tratamientu llegal que rebaxe l\u2019actual estatus escolar del asturianu. \u00c9sti tendr\u00eda, mesmamente, que meyorase n\u2019aspeutos como\u2019l n\u00famberu d\u2019hores d\u2019impartici\u00f3n, calter del aria (especialid\u00e1 pal profesor\u00e1u de primaria y secundaria), xeneralizaci\u00f3n a tolos centros, etc.<\/span><\/p>\n

N\u00f3s, como instituci\u00f3n y organizaciones esmolec\u00edes pol futuru d\u2019Asturies \u2013y tami\u00e9n como persones asturianes\u2013 taremos sollertes pa facer un siguimientu de la situaci\u00f3n y compromet\u00e9mosnos a facer oyer la nuesa voz ell\u00ed onde seya necesario.<\/span><\/p>\n