{"id":4977,"date":"2007-03-21T15:49:55","date_gmt":"2007-03-21T14:49:55","guid":{"rendered":"https:\/\/alladixital.org\/valoracion-de-lalla-de-la-propuesta-de-decretu-del-curriculu-deducacion-secundaria\/"},"modified":"2007-03-21T15:49:55","modified_gmt":"2007-03-21T14:49:55","slug":"valoracion-de-lalla-de-la-propuesta-de-decretu-del-curriculu-deducacion-secundaria","status":"publish","type":"post","link":"https:\/\/alladixital.org\/en\/valoracion-de-lalla-de-la-propuesta-de-decretu-del-curriculu-deducacion-secundaria\/","title":{"rendered":"Valoraci\u00f3n de l’ALLA de la propuesta de Decretu del Curr\u00edculu d’Educaci\u00f3n Secundaria"},"content":{"rendered":"

(Pautu de la Xunta de l’Academia del d\u00eda 9 de marzu de 2007)<\/p>\n

L’Academia de la Llingua Asturiana nun pue dexar de valorar mui negativamente’l conten\u00edu de la propuesta de Decretu del Curr\u00edculu d’Educaci\u00f3n Secundaria obligatoria, fecha pola Conseyer\u00eda d’Educaci\u00f3n y Ciencia, no que cinca al tratamientu de la llingua asturiana. Y ello poles razones que vienen darr\u00e9u:<\/p>\n

    \n
  1. El calter d’optativa que se da a l’asignatura de Llingua asturiana y lliteratura esfr\u00f3nase dafechu colo afitao na Llei d’Usu y Promoci\u00f3n del Asturianu que, como ye bien sab\u00edo, diz nel so art\u00edculu 10.3.:
    \nLa escoyeta del estudiu o del emplegu del asturianu como asignatura del curr\u00edculu en neng\u00fan casu podr\u00e1 sirvir de motivu de discriminaci\u00f3n de los alumnos.<\/em>
    \n Pa los que lo escueyan, el so deprendimientu o usu nun podr\u00e1 torgar que reciban la mesma formaci\u00f3n y conocimientos n’iguald\u00e1 de condiciones que’l restu del alumn\u00e1u.<\/em>
    \nA la escontra d’esto, los alumnos y alumnes que cursen l’asignatura de llingua asturiana tendr\u00e1n d’escoyer obligatoriamente ente les asignatures de “Llingua asturiana y lliteratura” y “Llingua estranxera” (art. 5.3.) nos dos primeros cursos de la ESO; en terceru, la escoyeta fair\u00e1se ente “Llingua asturiana y lliteratura”, “Segunda Llingua estranxera” y “Cultura cl\u00e1sica” (art. 6.4.); y en cuartu cursu los centros podr\u00e1n ufrir, como alternativa a la llingua asturiana, “una materia de Iniciaci\u00f3n profesional o, en su caso, de Empresa joven europea y una materia optativa de proyectos relacionados con los \u00e1mbitos cient\u00edfico-tecnol\u00f3gico, socioling\u00fc\u00edstico y art\u00edstico” (art. 7.5.).<\/li>\n
  2. Les 2 hores asignaes a l’asignatura de “Llingua asturiana y lliteratura” son insuficientes dafechu pa que se puean llevar alantre, con un m\u00ednimu de seried\u00e1, los conten\u00edos del curr\u00edculu de Llingua asturiana y lliteratura pa la Educaci\u00f3n Secundaria obligatoria de la propia Conseyer\u00eda d’Educaci\u00f3n y Ciencia del Princip\u00e1u d’Asturies.<\/li>\n
  3. Arriendes d’ello, l’Academia de la Llingua Asturiana, acordies asinamesmo colo afitao na Llei d’Usu, cuida que la llingua asturiana tien de ser llingua vehicular dientro de la Educaci\u00f3n Secundaria Obligatoria, nun porcentax m\u00ednimu que dea seguranza de la so capacid\u00e1 de conceptualizaci\u00f3n pa otra clas de deprendizaxes. Esto esixe tomar determ\u00edn sobro les condiciones y les estayes de deprendizax m\u00e1s afayadices pa facer vidable la ense\u00f1anza n’asturianu al marxe de la so l\u00f3xica conceici\u00f3n como materia a deprender pol alumn\u00e1u.
    \nPoro, \u00e9nte la grave discriminaci\u00f3n que sufren los alumnos y alumnes de llingua asturiana, l’ALLA encamienta a los responsables de la Conseyer\u00eda d’Educaci\u00f3n y Ciencia que tomen les mid\u00edes precises pa que s’ig\u00fce esta situaci\u00f3n y pa que l’inxerimientu de la llingua asturiana nel sistema educativu s’axuste a la llei.<\/li>\n
  4. Camienta l’ALLA, a lo cabero, que los plantegamientos del \u00e1rea de Llingua castellana y lliteratura son arr\u00e9mente ambiguos no que cinca a la consideraci\u00f3n del asturianu como llingua. Dif\u00edcilmente los alumnos sedr\u00e1n a tener una perceici\u00f3n de que l’asturianu ye la llingua propia d’Asturies si nam\u00e1i algamen los conten\u00edos y oxetivos que se planteguen dende l’\u00e1rea de llingua castellana. Nesti sen, ye esixible que’l curr\u00edculu d’esta \u00e1rea esclarie nidiamente qu’Asturies ye una comunid\u00e1 billing\u00fce onde coesisten en desiguald\u00e1 de condiciones xur\u00eddiques y sociales dos sistemes lling\u00fc\u00edsticos, el del asturianu, como llingua propia, y el del castellanu, llingua oficial de tol est\u00e1u.<\/li>\n<\/ol>\n

    Les dificultaes pa encadarmar ama\u00f1osamente la llingua asturiana dientro del sistema educativu, tanto na Educaci\u00f3n Primaria como na Secundaria, amuesen una vegada m\u00e1s la so precaried\u00e1 llegal y que nam\u00e1i la oficialid\u00e1 ser\u00e1 a allugar correchamente l’asignatura nel \u00e1mbitu educativu y a garantizar el derechu de los alumnos y alumnes al so estudiu, conocimientu y usu.<\/p>\n

     
    \n