{"id":4994,"date":"2006-03-01T08:57:51","date_gmt":"2006-03-01T07:57:51","guid":{"rendered":"https:\/\/alladixital.org\/estatutu-y-oficialida-llingua-asturiana-y-television\/"},"modified":"2006-03-01T08:57:51","modified_gmt":"2006-03-01T07:57:51","slug":"estatutu-y-oficialida-llingua-asturiana-y-television","status":"publish","type":"post","link":"https:\/\/alladixital.org\/en\/estatutu-y-oficialida-llingua-asturiana-y-television\/","title":{"rendered":"Estatutu y oficialid\u00e1. Llingua Asturiana y televisi\u00f3n"},"content":{"rendered":"

Estatutu y oficialid\u00e1<\/h3>\n

El D\u00eda de les Lletres Asturianes de 2005 l’Academia de la Llingua Asturiana daba anuncia p\u00fablica de la so “Propuesta d’un alcuerdu social y pol\u00edticu sobre la llingua y cultura d’Asturies”, nel qu’habr\u00eden participar, am\u00e1s del Gobiernu del Princip\u00e1u d’Asturies, les fuerces pol\u00edtiques, los sindicatos y les organizaciones sociales y culturales. La “Propuesta”, encadarmada al rodiu de cinco exes, foi presentada darr\u00e9u a los axentes sociales citaos, que, mayoritariamente, acoy\u00e9ronla de mou favoratible. Llamentablemente la Federaci\u00f3n Socialista (FSA-PSOE) nun taba naquel ent\u00f3s en disposici\u00f3n d’averase a un alcuerdu consensu\u00e1u como’l que se propon\u00eda, darr\u00e9u que’l primer puntu yera’l d’asumir la declaraci\u00f3n de co-oficialid\u00e1 de la llingua asturiana (y del gallego-asturianu nel so territoriu) na pr\u00f3xima reforma del Estatutu. Por mor d’ello, l’ALLA nun sigui\u00f3 allanare col discutiniu del “Alcuerdu”. Ello nun quita un res pa que la instituci\u00f3n siga trabayando, col mesmu enfotu de siempre, pol llogru d’esa reconocencia d’oficialid\u00e1 y enconte’l labor que nel mesmu sen se fai dende otres instituciones, organizaciones o estayes sociales.<\/p>\n

L’ALLA camienta que’l grau de converxencia social sobre esti tema ye de tantu altor qu’a lo cabero algamaremos, de xuru, un Estatutu que puea ser consens\u00e1u por toles fuerces pol\u00edtiques y onde tolos asturianos y asturianes mos sintamos representaos y abellugaos. Y ello porque:<\/p>\n

    \n
  1. La mayor\u00eda de la poblaci\u00f3n asturiana, como afiten los estudios fechos al respeutive, ta a favor d’esa declaraci\u00f3n de cooficialid\u00e1 y ye consciente de que la nuesa ye una socied\u00e1 billing\u00fce y asina quier que siga siendo; pero, al empar, quier un billing\u00fcismu equilibr\u00e1u onde l’emplegu d’una o otra llingua nun tenga m\u00e1s llende que la que-y ponga la llibre eleici\u00f3n del ciudadanu.<\/li>\n
  2. L’emplegu de la llingua propia, en tolos \u00e1mbitos (p\u00fablicos y privaos), en tolos rexistros (orales y escritos) y a tolos niveles y efeutos ye un derechu fundamental del individuu. Y nes sociedaes democr\u00e1tiques los gobiernos y les lleis t\u00e1n obligaos a reconocer esi derechu y a dar seguranza del exerciciu llibre del mesmu.<\/li>\n
  3. El Princip\u00e1u d’Asturies ye una Comunid\u00e1 Aut\u00f3noma del Est\u00e1u Espa\u00f1ol. Y nesti contestu -el del Est\u00e1u Espa\u00f1ol- nun hai otra soluci\u00f3n xur\u00eddica v\u00e1lida que la que se dio nes otres comunidaes billing\u00fces: la declaraci\u00f3n de co-oficialid\u00e1 nel Estatutu d’Autonom\u00eda, acordies col mand\u00e1u de la Constituci\u00f3n Espa\u00f1ola. Ello pue combinase con situaciones pol\u00edtiques estremaes que nun tien por qu\u00e9 averase a les que se t\u00e1n viviendo nesti momentu n’otres comunidaes del Est\u00e1u.<\/li>\n
  4. Ye verd\u00e1 que la realid\u00e1 sociolling\u00fc\u00edstica d’Asturies tien les sos propies carauter\u00edstiques y a ello tendr\u00e1 qu’axustase la Llei de Normalizaci\u00f3n de la Llingua Asturiana, qu’ha desendolcar los aspeutos b\u00e1sicos de la puesta en pr\u00e1utica de la oficialid\u00e1.<\/li>\n
  5. Cada vegada resulta m\u00e1s chocante y dif\u00edcil de pescanciar que les mesmes fuerces pol\u00edtiques que n’Asturies nieguen esi derechu fundamental, defendan nel Congresu de los Diputaos en Madrid proposiciones non de llei instando al Gobiernu a “afalar, en collaboraci\u00f3n coles Comunidaes Aut\u00f3nomes, iniciatives empobinaes a garantizar el respetu y proteici\u00f3n de les lling\u00fces espa\u00f1oles, como elementu esencial del nuesu patrimoniu com\u00fan; a curiar que se dea seguranza a los ciudadanos del derechu y la llibert\u00e1 d’escoyer y emplegar cualesquier de les dos lling\u00fces de la comunid\u00e1; a potenciar y afitar un di\u00e1logu granible ente toes elles, sobre manera nel tarr\u00e9n de la cultura y la educaci\u00f3n”.<\/li>\n
  6. Y finalmente, porque la propuesta de l’ALLA ye realista y moderada dafechu. Nella p\u00eddese a los part\u00edos pol\u00edticos con representaci\u00f3n parllamentaria que seyan ellos los qu’escueyan el modelu de redaici\u00f3n del art\u00edculu que recueya la oficialid\u00e1 del idioma que m\u00e1s s’axuste a les condiciones sociol\u00f3xiques d’Asturies; que seyan ellos los que digan hasta \u00f3nde quieren llegar coles mid\u00edes normalizadores, a qu\u00e9 ritmu y con qu\u00e9 fases; y arriendes d’ello, que pongan techu a la dotaci\u00f3n presupuestaria pa facer efeutiva la normalizaci\u00f3n. Y que too ello lo faigan velando siempre pa que se llogre l’aceutaci\u00f3n social y pol\u00edtica de les mid\u00edes normalizadores.<\/li>\n<\/ol>\n

    Llingua Asturiana y Televisi\u00f3n<\/h3>\n

    El 12 de payares de 2003 l’Academia de la Llingua Asturiana comparec\u00eda na Xunta Xeneral del Princip\u00e1u d’Asturies p’amosar la so posici\u00f3n en rellaci\u00f3n cola presencia qu’habr\u00eda tener la Llingua Asturiana nel futuru Ente P\u00fablicu de Comunicaci\u00f3n del Princip\u00e1u d’Asturies. Pasaos m\u00e1s de dos a\u00f1os d’aquella comparecencia ensin que se tomare determ\u00edn pol\u00edticu sobre esti asuntu magar que y\u00e1 se ficieron les pruebes pa la seleici\u00f3n de los profesionales y que, al empar, y\u00e1 se t\u00e1n emitiendo dalgunos programes, l’ALLA xulga afayadizo, nesti momentu, afitar otra vuelta’l so posicionamientu en rellaci\u00f3n con esti asuntu, posicionamientu que tresmiti\u00f3 reiteradamente a los responsables del Ente P\u00fablicu de Comunicaci\u00f3n y del so Conseyu d’Alministraci\u00f3n nes xuntes calten\u00edes al respeutive netos meses d’atr\u00e1s y que se resume no que vien darr\u00e9u:<\/p>\n

      \n
    1. L’Academia de la Llingua Asturiana camienta que la TV Asturiana ha tar dise\u00f1ada de mou que contribuya a vertebrar territorial, social y culturalmente Asturies y que valga d’instrumentu eficaz pa la recuperaci\u00f3n, espardimientu, dignificaci\u00f3n y normalizaci\u00f3n social de la llingua asturiana.<\/li>\n
    2. El tratamientu de les lling\u00fces asturiana y castellana na TV habr\u00e1 ser equiparable a tolos efeutos. Ello lleva apareyao necesariamente lo siguiente:\n
        \n
      1. Que l’espaciu dedic\u00e1u a la emisi\u00f3n en llingua asturiana seya un 50% del total de la programaci\u00f3n.<\/li>\n
      2. Que nun se dea neng\u00fan tipu de discriminaci\u00f3n nel repartu de les bandes horaries d’audiencia.<\/li>\n
      3. Que nun se dea neng\u00fan tratu desigual na axudicaci\u00f3n de los diferentes tipos de programes. Esto ye, qu’en llingua asturiana se faga la mesma mena de programes (informativos, de debate, culturales, etc.) y na mesma proporci\u00f3n qu’en llingua castellana.<\/li>\n<\/ol>\n<\/li>\n
      4. La proporci\u00f3n d’emplegu de la llingua asturiana habr\u00e1 aumentar hasta facese mayoritaria nos otros dos medios del Ente P\u00fablicu de Comunicaci\u00f3n: radio y prensa dixital. Ello der\u00edvase, per un llau, del fechu de la necesid\u00e1 (y facilid\u00e1) d’averar l’asturianu a les nueves teunolox\u00edes (fundamentalmente, internet) y, per otru, a la favoratible acoyida y el refrendu social que vienen teniendo ente la poblaci\u00f3n les esperiencies d’emplegu radiof\u00f3nicu de la llingua asturiana (Cadena Ser, Cope, Onda Cero, Radio Sele, etc.).<\/li>\n<\/ol>\n