{"id":5013,"date":"2004-09-22T09:04:57","date_gmt":"2004-09-22T08:04:57","guid":{"rendered":"https:\/\/alladixital.org\/comunicau-sobrol-casu-de-catuxa-bermeyu\/"},"modified":"2004-09-22T09:04:57","modified_gmt":"2004-09-22T08:04:57","slug":"comunicau-sobrol-casu-de-catuxa-bermeyu","status":"publish","type":"post","link":"https:\/\/alladixital.org\/en\/comunicau-sobrol-casu-de-catuxa-bermeyu\/","title":{"rendered":"Comunic\u00e1u sobro’l casu de Catuxa Bermeyu"},"content":{"rendered":"

\u00c9nte la reiteraci\u00f3n, nel aniciu d’esti cursu 2004-2005, de pergraves problemes d’escolarizaci\u00f3n del asturianu con casos tan llamentables como’l de l’alumna Catuxa Bermeyu nel IES “Monte Naranco” d’Uvi\u00e9u, l’Academia de la Llingua Asturiana quixer afitar lo que vien darr\u00e9u:<\/p>\n

    \n
  1. El drechu a recibir clases de Llingua Asturiana nel propiu centru d’adscripci\u00f3n enc\u00f3ntase nel mesmu drechu constitucional a la iguald\u00e1 y a la educaci\u00f3n, am\u00e1s de nes disposiciones llegales calten\u00edes na Llei d’Usu del Asturianu, aprobada pola Xunta Xeneral del Princip\u00e1u d’Asturies de 1998. Poro, esta esixencia ye irrenunciable y nun pue tar, de neng\u00fan mou, suxeta a negociaci\u00f3n.<\/li>\n
  2. Cualquier otra posibilid\u00e1, incluyida la del cambiu de centru d’un alumnu\/a pola mor d’escoyer llibremente la ense\u00f1anza de Llingua Asturiana constit\u00fai, cenciellamente, un casu de segregaci\u00f3n, inalmisible nuna socied\u00e1 democr\u00e1tica y m\u00e1s cuando de lo que se trata ye del drechu a la escolarizaci\u00f3n de la llingua propia del pa\u00eds.<\/li>\n
  3. L’Academia ye sabedora d’otros incumplimientos de la llegalid\u00e1 vixente no que cinca a la escolarizaci\u00f3n del asturianu na Educaci\u00f3n Secundaria, sobro too no que se refier a la falta de profesor\u00e1u nos centros. Y ello ensin que l’alministraci\u00f3n educativa tome determ\u00edn efeutivu pa iguar la situaci\u00f3n.<\/li>\n<\/ol>\n

    Nesti sen, la instituci\u00f3n acad\u00e9mica tien intenci\u00f3n de treslladar a les autoridaes educatives del Princip\u00e1u la so esmolici\u00f3n por unos fechos tan llaceriosos, xunto cola petici\u00f3n d’una igua inmediata de los mesmos. Entiende sicas\u00ed l’Academia qu’esta problem\u00e1tica socio educativa nam\u00e1i tien un arreglu posible: la reconocencia d’oficialid\u00e1 pal idioma d’Asturies. Afondando no anterior, l’Academia de la Llingua Asturiana dar\u00e1 bien llueu a conocer a la opini\u00f3n p\u00fablica cu\u00e1l ye’l so asitiamientu no que cinca al tratamientu que la oficialid\u00e1 habr\u00eda tener nel Estatutu d’Autonom\u00eda y nes lleis qu’habr\u00eden desendolcar \u00e9sti.<\/p>\n