La presencia del asturianu nos medios públicos de comunicación ta perafitada llegalmente. Ello pue vese nel art. 4 del Estatutu d’Autonomía d’Asturies (1981), nel art. 13.2 de la Llei d’Usu del Asturianu (1998) o nel art. 8.1 de la Llei de Segunda Reestructuración del Sector Públicu (2014).

Acordies con esti marcu xurídicu y faciendo usu del papel tutelar de los derechos llingüísticos que-y correspuende a l’Academia de la Llingua Asturiana (ALLA), esta institución vieno calteniendo conversaciones a lo llargo de los últimos años col Direutor de la RTPA, D. Antonio Virgili, col envís de plantegar midíes de visualización y normalización de la llingua asturiana na RTPA.

El resultáu d’estes conversaciones –que teníen como exe central un emplegu modernu, comunicativu y dignu del asturianu nos espacios informativos–, siempre foi frustante pa nós, darréu que, al llau de les bones pallabres, siempre apaecía dalgún problema qu’allargaba sine die la posibilidá d’una solución concreta a la demanda. Esti facer allargóse años y años.

Pa tratar d’iguar definitivamente la situación del asturianu nos espacios informativos de la Televisión del Principáu, l’ALLA aconceyó’l 17 de xunetu pasáu col Direutor de la RTPA. Nesti aconceyamientu presentóse al Ente de comunicación autonómicu una propuesta pa entamar un espaciu informativu diariu n’asturianu. La propuesta de l’ALLA concretóse nestos términos:

1. L’Academia de la Llingua Asturiana propón a la Direición de la RTPA qu’ún de los sos espacios informativos diarios (mediudía o tarde-nueche) seya n’asturianu.
2. L’oxetivu ye que la radiotelevisión pública asturiana contribuya a la dignificación y normalización de la llingua y cultura d’Asturies.
3. La propuesta afáyase dafechu a les demandes sociales (III Estudiu Sociollingüísticu, 2017), onde se conseña que cuasi un 60% de la población asturiana reclama esta clas de programes informativos.
4. L’espaciu informativu n’asturianu incluiría portada y presentación, llocución de noticies, creitos, la información deportiva y la del tiempu.
5. Les emisiones entamaríen nel mes de mayu de 2018 (coincidiendo col Día de les Lletres Asturianes).
6. L’Academia de la Llingua Asturiana comprometíase a diseñar un Plan de Formación Específicu y urxente pal personal de la RTPA que llibremente quixere participar nél y a llevalu alantre nes propies instalaciones de la RTPA. El citáu plan nun implicaría coste económicu pa la RTPA.

Nestes conversaciones, nes que D. Antonio Virgili tuvo acompañáu per parte del equipu direutivu de la RTPA, falóse, peles dos partes, de distintes opciones pa concretar la propuesta y alcordóse retomar les conversaciones nel mes de setiembre.

Pasáu esti plazu, l’ALLA ponse en contatu col Direutor de la RTPA y esti respuende per corréu electrónicu y al traviés de la so secretaria. Na comunicación, que podríemos calificar mui duramente, dízsenos que’l compromisu de la Radiotelevisión Pública del Principáu d’Asturies cola dignificación y normalización de la llingua asturiana amuésase pente medies de programes como, ente otros, “Asturianaes”, “De folixa en folixa”, “Guía Chigrín” o la retresmisión n’asturianu de la “Misa dende la Cueva San Pedrín”.

Quede claro, enantes de siguir, la nuesa consideración y respetu hacia esos programes (y otros de calter etnográficu) porque toos ellos son importantes pa la promoción de la cultura asturiana, pero dende l’Academia tamos falando d’otra cosa. Tamos falando de les posibilidaes de dignificar la llingua asturiana emplegándola como llingua normal de comunicación nos espacios informativos.

Dende esti puntu de vista, la respuesta paeznos una burlla a les espeutatives y demandes de la sociedá asturiana. Tal respuesta, amás, adopta un tonu impertinente cuando amiesta (sic) que “dar un paso más allá como el que solicita la Academia de la Llingua es, en estos momentos, inasumible por RTPA. El Estatuto de Autonomía del Principado de Asturias no recoge el asturiano como lengua oficial…”

Nós, l’Academia de la Llingua Asturiana, entendemos el mensax y esti ye inequívocu: mentanto’l Sr. Virgili seya Direutor de la RTPA la llingua asturiana nun tendrá espacios de dignificación al traviés del so usu normal n’espacios informativos; pero l’ALLA tamién quier unviar a la sociedá un mensax inequívocu: Antonio Virgili nun ye la persona indicada pa dirixir la televisión pública asturiana. Nun ye posible que la so actuación condicione la normalización llingüística y l’esfuerzu de munches persones enfotaes na recuperación del asturianu. Quiciabes el so papel y determín encaxe na empresa privada pero, de nengún mou, nuna televisión con vocación pública y asturiana. Darréu de lo anterior, l’Academia de la Llingua Asturiana pide la dimisión inmediata de D. Antonio Virgili y da anuncia de que treslladará esta petición a la opinión pública asturiana, a los estremaos axentes sociales y a los grupos parllamentarios allugaos na Xunta Xeneral del Principáu d’Asturies.