Esti miércoles, 6 de setiembre, tuvo llugar el pieslle oficial del programa d’actividaes de la edición del añu 2017 de la Universidá Asturiana de Branu (UABRA)  nel Paraninfu de la Universidá d’Uviéu (c/ San Francisco).

A lo llargo del actu intervinieron, emplegando l’asturianu, la Direutora de la UABRA, Dña. Cristina Valdés Rodríguez, la Teniente d’Alcalde de Cangas del Narcea, Dña. Laura Álvarez García, el Direutor Xeneral de Planificación Llingüística y Normalización del Principáu d’Asturies, D. Fernando Padilla Palicio, el Rector de la Universidá d’Uviéu, D. Santiago Gracía Granda y el Presidente de l’Academia, D. Xosé Antón González Riaño.

Nesta octava edición, que peracabó col actu d’ayeri, participaron más d’un centenar de persones nos niveles que s’impartieron: Cursu Elemental de Llingua Asturiana; Cursu Avanzáu de Llingua Asturiana; los Cursos d’Afondamientu Cultural y Llingüísticu: Capacitación pa la Traducción al Asturianu; Nueves teunoloxíes na Educación; Cantares, bailles ya instrumentos musicales asturiano; Averamientu al cine n’asturianu y la primer fase del Curso de Capacitación en Gallego-Asturiano.