El pasáu vienres, 3 de mayu celebróse’l 40 Día de les Lletres Asturianes nel Teatru Campoamor d’Uviéu.

Dientro de la Xunta Estraordinaria que finó col discursu institucional del Presidente, D. Xosé Antón Gonzáles Riaño, diose acoyida a los dos nuevos académicos correspondientes de la Institución: D. Pablo Texón Castañón y D. Alberto Fernández Costales.

L’actu, presentáu por Sonia Avellaneda y Próspero Morán, cuntó con un entamu musical a cargu del cordionista Marcos García Alonso y tuvo como pieslle l’actuación del gaiteru Hevia, que fexo un percorríu pel so repertoriu de música asturiana.

El Día de les Lletres Asturianes faise en collaboración col Conceyu d’Uviéu al traviés de la so Fundación Municipal de Cultura, institución cola que se co-edita la revista Lliteratura, qu’inxerta, nesti nuevu númberu, una esbilla del panorama teatral n’Asturies.