El Ministru de Cultura visita l’ALLA, que-y apurre dalgunes propuestes de política llingüística estatal.
La Xunta de Gobiernu de l’Academia de la Llingua Asturiana (ALLA) recibió esti miércoles, 21 de febreru, al Ministru de Cultura, Ernest Urtasun. Esta visita supón el primer alcuentru de calter ministerial de l’ALLA y, poro, un finxu históricu nes sos rellaciones interinstitucionales.
Recoyendo l’apreciu que’l Ministru amosó pa cola llingua asturiana y l’Academia, los miembros de la Xunta de Gobiernu treslladáron-y delles propuestes d’aición nel planu estatal:
- Reconocer la especialidá docente pal profesoráu de Primaria y Secundaria, per aciu del necesariu axuste nel decretu d’especialidaes docentes del Ministeriu d’Educación.
- Reglamentar l’usu del asturianu nel Parllamentu Español y amestalu a toles iniciatives llingüístiques que surdan nel so ámbitu.
- Homologar económicamente a l’ALLA coles otres academies nos Presupuestos Xenerales del Estáu, vista la desproporción actual del casu asturianu
- Considerar l’asturianu nos proyeutos de desendolcu de programes d’intelixencia artificial y traductores neuronales que, nun momentu d’aceleración na so producción y usu, puen ufiertar oportunidaes de futuru a les llingües minoritaries.
- Asegurar la presencia del asturianu nos programes de promoción llingüístico-cultural del Institutu Cervantes.
- Considerar la lliteratura n’asturianu ente les candidatures a los premios nacionales de lliteratura.
Darréu del clima d’entendimientu llográu, dambes partes apautáronse en caltener los contautos pa facer el siguimientu de les propuestes apurríes.
Uviéu, 22 de febreru del 2024