Author: infofuturo

L’Academia de la Llingua Asturiana ta acabante d’asoleyar les bases de los diez concursos que convoca pa esti añu. Ocho d’ellos, los que formen el certame d’investigación, queden yá abiertos a la receición de propuestes. Mentanto, los dos concursos de la olimpiada escolaranque yá convocaos, nun van abrir les inscripciones hasta’l mes de setiembre.

Los concursos del certame d’investigación -que puen repartir, cadún, un máximu de 1.500 euros- dedíquense a estos ámbitos: toponimia; léxicu de recoyida oral; propuestes léxiques pa campos téunicos especializaos; investigación llingüística y lliteraria; recoyida, trescripción y estudiu de fontes orales; testos de divulgación de ciencies naturales y teunoloxía; y documentalismu sociocultural curtiu. El plazu pa unviar les propuestes acaba’l 13 de payares.

La olimpiada escolar de redaición “Urbano Rodríguez” va cuntar con dos concursos, el de Primaria y el de Secundaria y Bachilleratu. Previstu en dos fases, tendrá primero una clasificación en modalidá sincrónica a distancia y una final presencial a finales del mes d’avientu.

Los diez concursos tán abiertos a obres feches n’eonaviegu y n’asturianu.

El pasáu xueves, 7 d’abril, l’Academia de la Llingua Asturiana (ALLA) propunxo, mediante votación en Xunta Estraordinaria, que D. Inaciu Galán y González, como miembru numberariu, y que D. Lisardo Lombardía Yenes, como miembru honoríficu, algamen la condición d’académicos.

Inaciu Galán y González (Xixón, 1986), doctor pola Universidá d’Uviéu con una tesis sobre la llingua asturiana nel franquismu, ye, amás de profesor d’asturianu en secundaria, un periodista con gran dedicación a la divulgación cultural y llingüística, con cuasi 20 años de trayeutoria en tou tipu de medios de comunicación, nos que desendolcó munchos papeles, dende la redaición y la presentación a la direición. La so formación académica inclúi amás una diplomatura en turismu y un máster en xestión cultural, ámbitos dende los que tamién tien producío material d’investigación y normalización de calter llingüísticu. La so obra lliteraria, como autor y traductor, toca estremaos xéneros y camina al par de la so obra académica, bayurosa y espardida en monografíes, volúmenes coleutivos y n’artículos de revistes científiques.

Lisardo Lombardía Yenes (Llaviana, 1955), médicu de formación y primer oficiu, desenvuelve, dende fai cuatro décades, una de les carreres más importantes nel ámbitu de la xestión cultural asturiana, llevando la dignificación de la llingua como norte. Ye cofundador del coleutivu etnográficu Belenos que, ente otres munches aiciones, edita la prestixosa revista Asturies, memoria encesa d’un país. Al traviés del sellu Fonoastur dio abellugu discográficu a dalgunes de les carreres musicales más relevantes de la escena folc asturiana. Primero como delegáu d’Asturies y depués como direutor, el so papel nel Festival Intercélticu de Lorient completa una figura que recibe les máximes distinciones: medaya de plata del Principáu d’Asturies en 2015 y “Chevalier de l’Ordre des Arts et des Lettres” de la República Francesa en 2021.

L’ALLA dará acoyida a los nuevos Académicos el vienres 6 de mayu, dientro del actu solemne del 43 Día de les Lletres Asturianes.