La especialidá docente de llingua asturiana pal profesoráu: el mayor fitu históricu nel procesu de recuperación llingüística n’Asturies
L’alcuerdu algamáu güei, 9 de xunetu del 2026, ente’l Gobiernu del Principáu d’Asturies (representáu pol Presidente Barbón y la Conseyera d’Educación Eva Ledo) y el Ministeriu d’Educación (cola so responsable Milagros Tolón al frente) que fai posible la reconocencia de la especialidá docente del profesoráu d’asturianu y eonaviegu constitúi, a xuiciu de l’Academia de la Llingua Asturiana (ALLA), el fechu más relevante nos caberos 40 años de política llingüística nel Principáu.
N’efeutu, tuvieron que pasar 42 años —nun s’escaeza que la enseñanza del asturianu entama en 1984— pa facer xusticia a un profesoráu que, teniendo dende cuantayá les mesmes esixencies de formación universitaria que’l restu de docentes, nun podía hasta esti momentu acceder a la condición de funcionariu pente medies de los concursos d’oposición y n’igualdá de condiciones que’l restu de docentes.
La esixencia de la especialidá docente foi, xunto col derechu constitucional a la oficialidá, la principal reclamación del asturianismu cultural de magar la década de los 80 del sieglu pasáu con organizaciones como’l Coleutivu «Llingua y Enseñanza» qu’axuntaba a profesores d’asturianu de toles estayes educatives (dende la educación infantil a la universitaria) o con instituciones como la propia Academia que, al traviés de la so estaya pedagóxica, llegó a caltener xuntes col Ministeriu d’Educación del Gobiernu de Rajoy, pero ensin los llogros que tanto necesitaba’l sistema educativu n’Asturies.
L’Academia de la Llingua Asturiana felicita, de mou especial, a l’asociación ADAE (Asociación de Docentes d’Asturianu y Eonaviegu) pol so protagonismu, intelixencia y puxu pa ser a caltener nos caberos años una reinvindicación histórica qu’agora mesmo recueye’l so mayor éxitu y fai posible que nos colexos ya institutos d’Asturies el profesoráu d’asturianu tenga la mesma dignidá que’l restu y pueda collaborar con enfotu a la meyora de la calidá educativa de la nuesa comunidá autónoma.
El papel xugáu polos sindicatos d’enseñanza n’Asturies foi, al empar, decisivu. Dende l’ALLA tamién queremos facer pública reconocencia del so esfuerzu y constancia a lo llargo del tiempu, amosaos, mesmamente, con motivu de les movilizaciones del profesoráu asturianu a lo cabero’l cursu pasáu.
Güei ye un gran día pa la cultura d’Asturies y pal so sistema educativu. La negociación y l’algame de la especialidá docente ye un gran trunfu del Gobiernu d’Asturies. Dende l’Academia correspuende reconoce-y el llogru. Asina lo facemos, compartiendo esta gran allegría con tola comunidá educativa asturiana.
Uviéu, 9 de xunetu del 2026
