Category: Anuncios

Uviéu acueye esti mes de xunetu’l XXVIII Congresu d’ALCEM, que yá tien la inscripción abierta

L’Asociación pa les Llingües y Cultures Europees Amenazaes (ALCEM) entama’l so XXVIII Congresu Internacional n’Uviéu del 24 al 26 de xunetu del 2026.

Investigadores, escritores, activistes culturales y representantes de diverses comunidaes llingüístiques europees axunten pa reflexonar sobre los retos actuales de la preservación, la revitalización y la tresmisión de les llingües amenazaes. El congresu va poner una atención especial na creación lliteraria contemporánea, nes polítiques llingüístiques y nes esperiencies de revitalización desendolcaes en delles rexones d’Europa.

Anque’l congresu nun va entamar oficialmente hasta’l vienres 24 de xunetu, el xueves 23 va ufiertar yá un preámbulu prestosu con un recital poéticu de Mario Obrero na llibrería uvieína Kafka & Co.

Consulta equí’l programa completu: https://alladixital.org/wp-content/uploads/2026/06/Programme.pdf

Inscríbite descargando y rellenando el documentu que sigue darréu y unviándolo a la direición de corréu electrónicu: alcemaidlcm@hotmail.com
Documentu d’inscripción: https://alladixital.org/wp-content/uploads/2026/06/Bulletin-dinscription.docx

Francisco Llera Ramo, nel cuartu de los «Alcuentros na ALLA», va reflexonar sobre l’actualidá sociolóxica asturiana

Mañana, 18 de xunu, a les 19:30 h, el llar de l’Academia de la Llingua Asturiana acueye al académicu de númberu de la institución, y tamién caderalgu eméritu de ciencia política na Universidá del País Vascu, Francisco José Llera Ramo. Nesta cuarta edición de los «Alcuentros na ALLA», el protagonismu va tar na situación sociollingüística y sociopolítica a un añu de les eleiciones asturianes. Dempués d’una esposición dialogada xunto al presidente de l’Academia, Xosé Antón González Riaño, va haber un espaciu d’alderique col públicu.

Los  «Alcuentros na ALLA» busquen abrir l’Academia a la comunidá, espardiendo y desplicando d’una manera más específica y personal el llabor de la institución y de los sos integrantes. Tienen una frecuencia trimestral y el llugar d’alcuentru ye’l propiu llar de la institución.

L’accesu ye llibre hasta completar l’aforu de 30 persones.

Presentación de «Péndula», el númaro 7 da colección Bidureira

Baxo el título Péndula y dentro da colección Bidureira, a Secretaría Llingüística del Navia-Eo editóu fai us meses el primeiro poemario de Natalia Riego Arredondas. A profesora, filóloga y escritora debuta en volume propio con un obra de forte veta social y de xénero, que rinde homenaxe ás muyeres que reivindicaron el dereto a úa vida digna nesta terra. Un libro intenso y honesto, que dibuxa un ciclo emocional de resistencia y autoconocemento al través de tempos de luz, solombra y reflexón, unde a poesía é un motor qu’honra as reices, confronta el dolor y renova a forza.

Na presentación, qu’empeza ás sete y media da tarde de mañá venres 19 de xunio, vai participar Carmen Siñeriz, tamén profesora, filóloga y escritora. El acto vai desenvolverse na sala d’esposicióis Luis Fega da Casa de Cultura da Veiga, unde haberá un punto de venta del propio poemario.

Mais información da obra aquí: https://alladixital.org/productu/pendula/

Presentación del númberu 42 de la revista Lliteratura na FeliX 2026

El 19 de xunu del 2026, a les 19:30 h na Escuela de Comerciu de Xixón, preséntase, nel marcu de la Feria del Llibru de Xixón, el númberu 42 de la revista Lliteratura, que nesta última edición agospia un dossier monográficu de «L’Asturies industrial».

Presenta l’Académicu de l’ALLA y miembru del conseyu de redaición Xosé Ramón Iglesias Cueva y participen los y les autores Paco Álvarez, Ana Lamela, Solinca Turbón ya Inaciu Galán.

El seminariu intercampus «Llingües nel Camín» visita l’ALLA

Nel marcu de l’Alianza Universitaria Europea EUiWell, el seminariu intercampus «Llingües nel Camín» pasó pela Academia los díes 2 y 3 de xunu pa conocer la situación sociollingüística y glotodidáutica n’Asturies. L’equipu de trabayu fórmenlu siete alumnes y alumnos de la Universität Konstanz, xunto a los sos profesores Georg A. Kaiser y Juan Santa Coloma y al tamién profesor Zósimo López, de la Universidade de Santiago de Compostela. Acompañáronlos Darío de Dios, docente na Universidá d’Uviéu, y Xosé Antón González Riaño, caderalgu de la Universidá d’Uviéu y presidente de l’Academia.