Nel añu 1947 Ediciones Gallimard asoleyaría la primer edición d’una obra del escritor Raymond Queneau (Le Havre 1903 - París 1976), non mui llarga n’estensión, titulada Exercices de style. Nel primer rellatu de la mesma, col títulu de «Notations» («Anotaciones») y a mou d’introducción, rellátase un fechu casual y qu’hasta cuasi podríemos calificar como insignificante: en París, nun autobús enllenu hasta arriba de xente y nuna hora punta, el narrador alvierte ente los viaxeros a un personaxe un tanto particular, especialmente no que se refier al so aspeutu físicu y a la vistimienta que lleva. Esti personaxe protagoniza un alcontrón con otru viaxeru al que-y echa la culpa de pisotia-y los pies a posta cada vez que baxen o monten otros viaxeros. Dos hores más tarde, el narrador vuelve topar a esti mesmu personaxe delantre la estación de Saint-Lazare. Taba falando con un collaciu vistíu igual qu’él que-y facía un comentariu sobre un botón del abrigu.

Darréu d’esti primer episodiu Queneau entama a xugar con esta historia, presentándonosla d’otres 98 maneres distintes y configurando col so testu un exerciciu llingüísticu y lliterariu que la crítica consideró y sigue considerando anguaño como un manifiestu a la escontra de la separtación tradicional ente la teoría lliteraria y la práutica de la escritura y que, a lo llargo los años, llegaría a convertise, arriendes de nun testu clásicu, nun manual de teoría estilística perconocíu, consultáu y apreciáu.