El testu afita la collaboración na normalización social del asturianu y l’asesoramientu llingüísticu de l’Academia al Conceyu

Dambes instituciones emprincipiaren la llexislatura con un alcuentru ente los sos máximos representantes onde pudieron repasase y valorase los últimos avances na normalización social del asturianu dientro de l’aición del Conceyu. Naquella mesma ocasión, estudiárense delles propuestes pa desendolcar a lo llargo del ciclu políticu actual y apautárense les bases del documentu que ta acabante de zarrar el so procesu de tramitación.

La collaboración, que nun tien naturaleza económica, allúgase nel marcu llegal de la llingua asturiana, especialmente na Llei d’Usu de 1998. Per un llau, nel plantegamientu que fai l’artículu 8.1, que se refier al compromisu de los conceyos asturianos na busca de posibilidaes pa facer efeutivu l’exerciciu de los derechos llingüísticos y, per otru, nel artículu 16, que conseña a l’Academia de la Llingua Asturiana como muérganu consultivu y asesor del Principáu d’Asturies a los efeutos de lo dispuesto na mesma Llei.

En términos xenerales, l’Academia de la Llingua Asturiana va asesorar llingüísticamente al Conceyu de Xixón nel desendolcu de les sos xeres y actividaes de promoción del idioma nos actos públicos y na vida diaria del Conceyu. De la mesma miente, dambes instituciones comprométense a coordinase na política de normalización social nel conceyu. L’Academia caltién el so representante nel Conseyu Asesor de la Llingua y va tar representada tamién nos xuraos y premios lliterarios convocaos pol Conceyu de Xixón pa la promoción del asturianu.

Más en concreto, el Conceyu de Xixón comprométese a siguir completando la rotulación n’asturianu de los sos servicios y dependencies, asina como de la rede viaria del Conceyu, igual na zona urbana que na rural. L’Academia de la Llingua Asturiana, a pidimientu del Conceyu, ufrirá propuestes normatives nesti ámbitu.

Per otru llau, l’Academia de la Llingua Asturiana oblígase a aconseyar y revisar el trabayu de recoyida de la toponimia xixonesa con vistes a la edición de los cartafueyos correspondientes a les 19 parroquies qu’entá queden por estudiar. D’otra manera, l’Academia de la Llingua Asturiana inxerirá al Conceyu de Xixón como llugar d’espardimientu de les sos xeres editoriales, formatives y culturales y facilitará a la Oficina de Normalización Llingüística un exemplar de caúna de les obres del so fondu editorial.

Ta previsto qu’esti conveniu de collaboración pueda prorrogase añalmente, ensin torgar ello la so revisión futura.