Agora que’l Presidente Barbón acaba d’entamar el procesu de reforma del Estatutu d’Autonomía d’Asturies de 1981 pa incluyir la oficialidá del asturianu y del eonaviegu, ye especialmente oportuno tener en cuenta que’l marcu xurídicu nel que se recueyen los derechos llingüísticos de la ciudadanía afítase nel Títulu Preliminar de la Constitución Española. D’esti mou, el so artículu 3.2 ye inequívocu: «las demás lenguas españolas serán también oficiales en las respectivas Comunidades Autónomas de acuerdo con sus Estatutos».
Esto, que ye lo que les fuerces polítiques mayoritaries na Xunta Xeneral del Principáu quieren facer cola llingua asturiana, nun ye, nin más nin menos, que’l cumplimientu n’Asturies de la previsión constitucional. Ye más, dende esi puntu de vista y sensu stricto podría dicise que cualquier invitación a que la norma máxima de convivencia nun se cumpla ente nós ye un comportamientu duldosamente democráticu.
Tal previsión constitucional, per otru llau, llevóse alantre con naturalidá en toles comunidaes españoles con llingua propia y diferenciada, de mou que los ciudadanos gallegos, vascos, navarros, catalanes, baleares, valencianos y araneses tienen, xunto col castellanu, a la so llingua oficializada dende va décades. Asturies, llueu de 40 años de vixencia del Estatutu d’Autonomía, tien agora la oportunidá d’iguar la so anomalía constitucional pa, en condiciones d’igualdá de derechos, poder protexer un patrimoniu llingüísticu d’un valir cultural incuestionable.
Dende l’Academia correspuéndenos sofitar la iniciativa política que, agora mesmo, protagonicen con un enclín tresversal estremaes fuerces polítiques: FSA-PSOE, Podemos-Asturies, Izquierda Xunida y Foro. A estes opciones polítiques pidímos-yos un fondu determín pa plantegar una reforma estatutaria qu’asegure la llibertá del usu llingüísticu y una aición pedagóxica que desanicie les estratexes d’alarmismu intencionáu que davezu s’intenten esparder ente nós. Del mesmu mou, encamentámos-yos nun cayer nes provocaciones dialéutiques que dende dalgunos sectores minoritarios vienen xenerándose col envís d’enzangar el discutiniu parllamentariu qu’acaba d’abrise.
Al empar, la institución llingüística fai un llamáu, col más fondu respetu, a les otres fuerces polítiques democrátiques presentes na Xunta Xeneral pa que, con sentíu d’esti momentu históricu y n’atención a la importancia social y cultural de la propuesta, se xunten al marcu de consensu entamáu. Too ello ensin escaecer que’l modelu asturianu d’oficialización requier d’una llei posterior d’ámbitu autonómicu na qu’han fixase les llendes de la política llingüística qu’Asturies necesita acordies cola nuesa realidá sociolóxica, política y económica. La necesidá del consensu tendrá equí, de mou especial, una mayor xustificación, darréu que se tará falando de les concretes midíes que la oficialidá implica, por exemplu, nos ámbitos institucional, educativu o de los medios de comunicación.
En tou casu, l’Academia de la Llingua Asturiana, acordies cola so función tutelar (art. 2.e de los sos estatutos), ponse a disposición de les fuerces polítiques pa, nel so casu, sofitar la busca d’un alcuerdu efeutivu y durable pal caltenimientu de les nueses llingües.
Uviéu, 5 d’ochobre de 2021