El presidente de la Cámara Municipal de Miranda del Douro, Artur Nunes, xunto col vicepresidente de l’Associaçon de la Lhéngua i Cultura Mirandesa, Mario Correia, tuvieron esti miércoles 23 d’avientu una xunta de trabayu cola direición de l’Academia de la Llingua Asturiana nel llar de la institución.

Nesta xunta tratáronse importantes aspeutos venceyaos a la collaboración ente les dos instituciones, darréu del pautu robláu’l pasáu 20 de xunu en Miranda del Douro. L’axenda d’actividaes comunes pal exerciciu 2016 daráse a conocer en próximes feches.