admin, autor en Academia de la Llingua Asturiana

04/06/2010

Resultáu de los Concursos de l’Academia de la Llingua Asturiana 2010

Concursos d’investigación

Concursu de recoyida de material toponímico oral

Aconceyáu’l Xuráu del Concursu d’investigación de Recoyida de material toponímico oral que convoca l’Academia de la Llingua Asturiana correspondiente al añu 2010, formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apáutase nos siguientes acuerdos:

Premiar con 600 € el trabayu tituláu Toponimia de la parroquia de Caranga (Proaza) de la que son autores Antonio Alonso de la Torre y Francisca Iglesias Álvarez.
Dar un accésit de 300 € al trabayu tituláu Toponimia de la parroquia de Trabáu (Degaña) del que ye autor Francisco Javier Redondas Maseda.
Dar un accésit de 150 € al trabayu tituláu Toponimia de la parroquia de Llabares (Santu Adrianu) y Toponimia de la parroquia de Villanueva (Santu Adrianu) de l que ye autor Jesús Fernández Fernández.
Dar un accésit de 150 € al trabayu tituláu Toponimia de la parroquia de Llabra (Cangues d’Onís) del que ye autora María Aurina González Nieda.

Concursu de recoyida oral de léxicu asturianu

Aconceyáu’l Xuráu del Concursu d’investigación de Recoyida de léxicu asturianu que convoca l’Academia de la Llingua Asturiana correspondiente al añu 2010, formáu por Ana María Cano González como presidenta, Corsino García Gutiérrez como vocal y Alfonso Martín Caso faciendo de secretariu, apáutase nos siguientes acuerdos:

Premiar con 600 € el trabayu tituláu Léxicu del Valle de Santa Bárbola (SMRA) del que ye autor Xulio Llaneza Fernández.
Dar un accésit de 300 € al trabayu tituláu Vocabulario de Ruenes (Peñamellera) del que ye autor Ramón Rodríguez Corao.
Dar un accésit de 150 € al trabayu tituláu Un palabreru Cabraliegu del que son autores Xuan Santori Vázquez-Azpiri y Juan Vicente Inguazo Prieto.

Concursu d’investigación llingüística

Aconceyáu’l Xuráu del Concursu d’investigación llingüística que convoca l’Academia de la Llingua Asturiana correspondiente al añu 2010, formáu por Ana María Cano González como presidenta, José Luis García Arias como vocal y Alfonso Martín Caso faciendo de secretariu, apáutase nos siguientes acuerdos:

Premiar con 600 € el trabayu tituláu Una torna al asturianu, íntegra y crítica, del Tirant lo Blanch dende l’orixinal valencianu de 1490 del que ye autor Pablo Suárez García.

Concursu d’Investigación sobre lliteratura asturiana

Déxase ermu’l Concursu d’Investigación sobre lliteratura asturiana de l’Academia de la Llingua Asturiana correspondiente a la convocatoria del añu 2010.

Concursu de llectures pa rapazos

Aconceyáu’l Xuráu del Concursu de llectures pa rapazos que convoca l’Academia de la Llingua Asturiana correspondiente al añu 2010, formáu por Urbano Rodríguez Vázquez como presidente, Vicente García Oliva como vocal y faciendo de secretariu Pablo Xuan Manzano Rodríguez, apáutase nel siguiente acuerdu:

Dar el premiu de 600 €, ex aequo a les obres titules La maldición de Llucescuna, de la que ye autor Abel Martínez González y Xaime Bon y “el casu de la corona preciosa” de la que ye autor Enrique Carballeira Melendi

Concursu de creación lliteraria, premiu “Llorienzu Novo Mier”

Aconceyáu’l Xuráu del Concursu de creación lliteraria, premiu “Llorienzu Novo Mier” que convoca l’Academia de la Llingua Asturiana correspondiente al añu 2010, formáu por Miguel Ramos Corrada como presidente, Xosé Ramón Iglesias Cueva como vocal, faciendo de secretaria Marta Mori d’Arriba, apáutase na siguiente resolución:

Premiar con 600 € el poemariu tituláu Nos díes pensatibles, del que ye autor Ricardo Candás Huerta.

Concursu de teatru

Aconceyáu’l Xuráu del Concursu de teatru que convoca l’Academia de la Llingua Asturiana correspondiente al añu 2010, formáu por Miguel Ramos Corrada como presidente, Adolfo Camilo Díaz como vocal, faciendo de secretariu Carlos Rubiera Tuya, apáutase na siguiente resolución:

Premiar con 600 € la obra titulada L’internu, de la que ye autor Pablo Rodríguez Alonso.

Concursu de recoyida de material lliterario escrito, premiu “Federico G.-Fierro Botas”

Aconceyáu’l Xuráu del Concursu de recoyida de material lliterario escrito, premio “Federico G.-Fierro Botas” que convoca l’Academia de la Llingua Asturiana correspondiente al añu 2010, formáu por Ana María Cano González como presidenta, José Luis García Arias como vocal y Alfonso Martín Caso faciendo de secretariu, apáutase nos siguientes acuerdos:

Dar dos accésit de 150 € a los trabayos titulaos Obra manuscrita de Pachín de Melás, del que son autores Ramiro y Clara González DELGADO, y Al trabayu “Yo quixera cantate” y otros poemes llangreanos , del que ye autor Inaciu Galán y González

Concursu de Recoyida de Material Lliterario Oral

Dexar ermu’l Concursu de Recoyida de Material lliterario oral

Concursu de Curtios Cinematográficos

Aconceyáu’l Xuráu del’l Concursu de Curtios Cinematográficos de l’Academia de la Llingua Asturiana correspondiente a la convocatoria del añu 2010 formáu por Roberto González-Quevedo como presidente, Xosé Bolado García como vocal y Xosé Antón González Riaño faciendo de secretariu apáutase na siguiente resolución:

Premiar con 1.200 € el trabayu tituláu Bisarmes, del que ye autor Pablo Quiroga Prendes.

Concursu de Cómics en Llingua Asturiana

Aconceyáu’l Xuráu del Concursu de Cómics en Llingua Asturiana que convoca l’Academia de la Llingua Asturiana correspondiente a la convocatoria del añu 2010 formáu por Ernesto García del Castillo como presidente, Roberto González-Quevedo como vocal y Miguel Solís Santos faciendo de secretariu, apáutase na siguiente resolución

Dar un accésit de 150 € al trabayu tituláu De la materia de los sueños del que ye autor Manuel Antonio García Iglesias.

10/03/201006/07/2022

Comunicáu de l’Academia de la Llingua Asturiana en rellación al AUTU DEL TRIBUNAL CONSTITUCIONAL SOBRO LA VALIDEZ DEL ASTURIANU NES RELLACIONES DE LOS CIUDADANOS COL PRINCIPÁU D’ASTURIES

L’Academia de la Llingua Asturiana quier amosar la so más fonda satisfaición énte la solución dada pol Tribunal Constitucional (TC), con fecha 25 de febreru de 2010, no que cinca a la cuestión d’Inconstitucionalidá plantegada pol Xulgáu de lo Contencioso-Alministrativu númberu 3 d’Uviéu.

N’efeutu, nun ye solo que’l TC refugue la inconstitucionalidá del árticulu 4.2 de la Llei d’Usu del Asturianu, onde s’afita la validez del emplegu d’esta llingua nes comunicaciones orales o escrites de los ciudadanos col Principáu d’Asturies, sinón qu’amás “obliga” a l’alministración autonómica a acoyer ensin torga dala les comunicaciones que se-y apurran n’asturianu.

Trátase, per otru llau, d’un procesu nel que, nel so aniciu, un ciudadanu, ye dicir, un representante de la sociedá civil más concienciada, decide respir con puxu y enfotu polos sos derechos llingüísticos a la escontra de les estorvises que la mesma alministración pon davezu pa nun facer vidable’l marcu xurídicu del asturianu.

Entiende l’ALLA, sicasí, que nun podemos cayer na autocomplacencia: los asturianos carecemos una situación, dafechu “peculiar” nel contestu español, d’inseguridá xurídica que nun afeuta, por ciertu, a los ciudadanos gallegos, vascos, navarros, catalanes, araneses, valencianos o baleares.

Ye llamentable, nesti sen, que tengan que ser persones individuales o coleutivos ciudadanos los que, de contino, esixan l’exerciciu de drechos llingüísticos qu’afiten la Constitución Española y los trataos internacionales a los qu’España se venceya.

L’Autu del TC, a la escontra de lo que dalgunos quieren facer ver, per otru llau nun implica nenguna clas d’oficialidá, desque namái afita como dafechu válidos los usos llingüísticos de los asturianos y asturianes colos muérganos dependientes del Principáu d’Asturies, acordies cola llegalidá vixente. Queden, d’esti mou, fuera de les llendes afitaes nel Autu del TC los usos del asturianu n’otros ámbitos tan importantes como los de los conceyos o les delegaciones de l’alministración central asitiaes n’Asturies. Inda más, los drechos llingüísticos de los asturianos tienen enforma menos grau de reconocencia que los del restu de ciudadanos de les otres comunidaes del Estáu con llingua propia en contestos tan emblemáticos como l’educativu, el de l’alministración de xusticia, la xestión ciudadana, la vida universitaria, etc.

La carauterística básica, entós y como venimos de dicir, de la situación llingüística asturiana ye, per un llau, la inseguridá xurídica y, per otru, la curtia reconocencia de derechos llingüísticos. La realidá, a lo llargo d’estos años, amuesa testonamente una vuelta y otra que namái la oficialidá pue garantizar y homologar los drechos llingüísticos de tolos asturianos de mou que dexemos, d’una vegada yá, de ser ciudadanos de segunda nel marcu de la Constitución Española qu’a toos debería abellugar per igual.

Acordies colo anterior, l’Academia de la Llingua Asturiana fai un llamáu a les fuercies polítiques asitiaes na Xunta Xeneral del Principáu pa que tomen determín nesti sen, de mou que’l marcu xurídicu del asturianu algame una solución, firme y estable, d’oficialidá afayada a les necesidaes sociollingüístiques d’Asturies; y reitera la ufierta fecha nel so momentu pa collaborar con tolos axentes sociales nel llogru del citáu marcu xurídicu.

Uviéu, 9 de marzu de 2010

22/02/2010

Prueba de conocencia de la llingua asturiana (mayu 2010)

CONVOCATORIA DE MAYU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

Nos meses de xineru y mayu celébrense les pruebes, abiertes a toles persones interesaes.
Unos quince díes enantes de les pruebes va abrise un plazu de matrícula.
A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
Pal bon resultáu d’estes pruebes habrá tenese un dominiu básicu de les estayes que vienen darréu:
1. ESTAYA LLINGÜÍSTICA
  1. Teoría gramatical: conocencia y dominiu del funcionamientu gramatical del asturianu y de la normativa académica.
  2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
  3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
2. ESTAYA DE LLINGUA Y SOCIEDÁ
  Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 29 de mayu de 2010 va facese la prueba semestral. El plazu de matrícula ye del 17 al 27 de mayu.

19/10/2009

Prueba de conocencia de la llingua asturiana (xineru 2010)

CONVOCATORIA DE XINERU*

Nos meses de xineru y mayu celébrense les pruebes, abiertes a toles persones interesaes.
Unos quince díes enantes de les pruebes va abrise un plazu de matrícula.
A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
Pal bon resultáu d’estes pruebes habrá tenese un dominiu básicu de les estayes que vienen darréu:
1. ESTAYA LLINGÜÍSTICA
  1. Teoría gramatical: conocencia y dominiu del funcionamientu gramatical del asturianu y de la normativa académica.
  2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
  3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
2. ESTAYA DE LLINGUA Y SOCIEDÁ
  Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).