Category: News

«Negacionismu»: neoloxismu asturianu del añu 2025

Como yá ye vezu, coincidiendo colos díes postreros del añu, l’Academia de la Llingua Asturiana (ALLA) abrió una votación pa escoyer el neoloxismu asturianu del añu 2025, col compromisu d’inxertalu d’equí a poco nel Diccionariu de l’Academia de la Llingua Asturiana (DALLA). Les opciones ufiertaes yá formaben parte del material de trabayu que la comisión lexicográfica de l’ALLA estudia y, nel so casu, inxerta periódicamente nes actualizaciones del DALLA, principal fonte normativa de tipu léxicu de la llingua asturiana: diccionariu.alladixital.org.

La menos votada de les propuestes d’anguaño foi «cibercrime», qu’algamó’l 5% de los votos. Tampoco nun recibieron munchu sofitu «antroposa», col 7%, nin «queer», con un 12%. Más igualada tuvo la eleición ente «neurodiverxente» (32%) y el ganador, «negacionismu» (43%).

El términu «negacionismu» fórmase, igual que n’otres munches llingües, dende’l sustantivu «negación» (según el DALLA, «aición y efeutu de negar o negase») y el sufixu productivu «-ismu». El negacionismu refierse a una actitú que consiste una refuga irracional o interesada de los fechos demostraos y de les teoríes afitaes nel consensu científicu.

El Xuntoiro 2025 acoye a presentación dos últimos númaros da colección «Bidureira» y a revista Viermo Carpinteiro

El Xuntorio 2025, organizao en Castropol polla Conseyeiría de Cultura, Política Llingüística y Deporte, acoye, el sábado 22 de novembre, un encontro lliterario con dalgúas das autoras con publicaciones recentes y outras novedades editoriales da Secretaría Llingüística del Navia-Eo.

A partir das 16:30 vai poder verse a Carmen Siñeriz y a María José Fraga Suárez presentando Estaxos y Mentres faga solombra, os númaros cinco y seis da colección «Bidureira». Despós, vai presentarse tamén el primeiro númaro de Viermo Carpinteiro, a revista de creación lliteraria en eonaviego da Secretaría Llingüística del Navia-Eo.

Más información dos llibros y a revista:

 https://alladixital.org/productu/estaxos/
https://alladixital.org/productu/mentres-faga-solombra/
https://alladixital.org/productu/viermo-carpinteiro-1/

Asoléyase’l númberu 15 de «Ciencies. Cartafueyos de Ciencia y Teunoloxía»

La revista Ciencies. Cartafueyos Asturianos de Ciencia y Teunoloxía tien, dende 2011, l’oxetivu d’esparder na sociedá asturiana los avances ya investigaciones científiques y teunolóxiques col emplegu de la llingua asturiana y con una perspeutiva divulgadora y rigorosa que favoreza la comprensión de los temes per parte de los llectores interesaos nestos ámbitos.

L’interés de la revista allúgase n’apurrir conocimientos científicu-téunicos a la sociedá y, n’especial, a los enseñantes d’asturianu nos estremaos niveles educativos. D’esta miente, tamién ye de solliñar l’interés que tien la publicación p’agrandar el vocabulariu científico-téunicu de la llingua asturiana.

Esta revista da un accesu abiertu darréu al so conteníu, basáu nel principiu de qu’ufiertar al públicu un accesu llibre a les investigaciones ayuda a un mayor intercambéu global de conocimientu.

Nesti númberu 15:

• Francisco Argüeso Gómez, caderalgu del Área de Matemática Aplicada de la Universidá d’Uviéu, abre’l númberu col artículu «Los númberos primos. Teoremes y conxetures». Consulta l’artículu nesti enllaz: https://reunido.uniovi.es/index.php/CCACT/index
• El médicu neurofisiólogu del HUCA, Xesús González Rato, amplía otres de les sos publicaciones sobre los trestornos del sueñu con «La narcolepsia na etapa infantil y xuvenil». Consulta l’artículu nesti enllaz: https://reunido.uniovi.es/index.php/CCACT/article/view/23812
• José Ramón Obeso, caderalgu d’Ecoloxía de la Universidá d’Uviéu, en «¿Ú tán les coraes del planeta?» desplica que la idea del pulmón verde ye incompleta y cuenta ónde tán verdaderamente les coraes qu’ayuden a respirar al nuesu planeta. Consulta l’artículu nesti enllaz: https://reunido.uniovi.es/index.php/CCACT/article/view/23813
• El cuartu artículu de Ciencies vien de mano d’un grupu d’investigadores de la Universidá d’Uviéu. Ángeles Fernández González, caderalga de Cristalografía y Mineraloxía; Begoña Fernández Pérez, profesora del Departamentu de Ciencia de los Materiales ya Inxeniería Metalúrxica; Antonio Marqués Sierra, del ISRULAB y del ICTEA, y Noemí Guallar Machín, graduada en Xeoloxía y Máster en Recursos Xeolóxicos ya Inxeniería Xeolóxica pola Universidá d’Uviéu, faen un fondu estudiu de la contaminación del agua pola actividá minera nel artículu «El llixiviáu d’arsénicu nes escombreres de les mines de mercuriu en Ḷḷena». Consulta l’artículu nesti enllaz: https://reunido.uniovi.es/index.php/CCACT/article/view/23814
• L’inxenieru agrícola y Ex-xardineru mayor del Conceyu Xixón, Xuan Carlos Martínez Sánchez, fala en «Naturalización urbana y dellos exemplos en Xixón» de la historia del axardinamientu y de la implantación de lo natural no urbano usando a Xixón como exemplu. Consulta l’artículu nesti enllaz: https://reunido.uniovi.es/index.php/CCACT/article/view/23815
• Zarren el númberu 15 de Ciencies Antonio Torralba-Burrial, del Departamentu de Ciencies de la Educación y l’INDUROT de la Unversidá d’Uviéu; Eduardo Cires, del Departamentu de Bioloxía d’Organismos y Sistemes (Botánica) y tamién del INDUROT de la Universidá d’Uviéu, y Sergio Pérez-Ortega, del Departamentu de Micoloxía del Real Xardín Botánicu de Madrid y del CSIC. Estos autores, nel artículu «Los lliques urbanos como ferramienta pa la reflexón educativa al rodiu de la calidá del aire na nuesa ciudá. Un ensayu n’Uviéu», faen un repasu pel éxitu de los programes de collaboración ciudadana na investigación científica de los lliques y la contaminación nes ciudaes. Consulta l’artículu nesti enllaz: https://reunido.uniovi.es/index.php/CCACT/article/view/23816

¿Quies tar enteráu de toles anuncies de Ciencies y de l’ALLA? Soscríbite nesti enllaz: https://cutt.ly/ktrwWpVn

¿Cómo espublizar en Ciencies?

La revista Ciencies tien abiertu’l plazu de receición d’artículos tol añu.
Los artículos que se presenten a evaluación editorial tienen que tener un tonu y una redaición de calter divulgador ensin sacrificar información relevante pa la tresmisión de les idees, datos o resultaos d’una investigación. Utilice de guía los artículos yá espublizaos nos númberos anteriores.

Pa la receición d’unvios manda’l to artículu al corréu llingua@alladixital.org.