Category: News

La quinta sesión de los «Alcuentros na ALLA» va cuntar col académicu Roberto González-Quevedo

El miércoles viniente, 21 d’ochobre, a les 19:30 h, l’Academia de la Llingua Asturiana organiza nel so llar social la quinta sesión de «Alcuentros na ALLA» cola participación de Roberto González-Quevedo. Mesmo que n’otres ocasiones, l’académicu va ufrir al alderique les sos reflexones, análisis y vivencies en rellación cola so xera na Academia. Depués d’una presentación dialogada xunto con Inaciu Galán y d’alcuerdu col oxetivu de los alcuentros, el públicu podrá dirixir la esposición pente medies d’entrugues o comentarios concretos.

Roberto González-Quevedo González (Palacios del Sil, 1953) ye antropólogu, filósofu, escritor y doctor n’Antropoloxía Cultural pola Universidá Autónoma de Madrid y en Filoloxía Hispánica pola Universidá d’Uviéu. Como académicu de númberu de l’ALLA, dende la so entrada na institución en 1981 dedica una parte fundamental de la so trayeutoria al estudiu y defensa de la cultura y la llingua asturianes. Esti llabor tien una de les sos espresiones principales na direición de Cultures. Revista Asturiana de Cultura, un espaciu d’estudiu antropolóxicu y etnográficu qu’amiesta l’atención a la realidá asturiana cola apertura a otres cultures.

La so proyeición internacional axunta la promoción de los estudios sobre Asturies cola defensa de la diversidá llingüística y cultural europea. Anguaño ye presidente de l’Asociación pa les Llingües y Cultures Europees Amenazaes (ALCEM) y presidió tamién el comité entamador del Congresu Mundial de Cultura Asturiana (CMCA) del 2025.

Con esta participación, los «Alcuentros na ALLA» siguen col llabor d’abrir l’Academia a la comunidá, espardiendo y desplicando d’una manera más específica y personal el llabor de la institución y de los sos integrantes.

L’accesu ye llibre hasta completar l’aforu de 30 persones.

Presentación de «Los cuentos de Ñuberu»

El martes 29 de setiembre, a les 19:00 h, preséntase’l llibru «Los cuentos de Ñuberu», de Miguel Solís Santos, nel Palaciu Valdecarzana d’Avilés.

Nesta edición remocicada recuéyense los cinco llibros espublizaos pola ALLA nos años 80: L’Arcu Iris y Ñuberu (1982); Les cuatro estaciones y Ñuberu (1983); Los cazadores, los llobos y Ñuberu (1984); Los árboles, l’ocalitu y Ñuberu (1985) y Ñuberu y la paz (1987).

L’actu va presentalu Xosé Ramón Iglesias Cueva y la entrada ye llibre hasta enllenar aforu.

Abierta la inscripción del XLIV Congresu Internacional de Filoloxía y Cultura Asturianes

El númaro 29 da revista Cultures presentóuse este brao en dous volúmenes qu’axuntan a mayor parte dos trabayos presentaos nel Congresu Mundial de Cultura Asturiana (CMCA), celebrao en febreiro del 2025.

Neste tempo, autores, coordinadores y equipo editorial trabayaron na escritura, revisión y maquetación de máis de mil páxinas de contido que nun fain outro que fortalecer inda máis a importancia da investigación antropolóxica en Asturias y qu’abrir camín pral futuro d’esta.

A fondura dos artículos recoyidos espéyase nas estaxas «Discursos d’identidá, autenticidá y patrimoniu», «Cuestiones de sociollingüística», «Ciudá y mundu global», «Caltenimientu de vezos tradicionales», «Paisaxes inmuebles y muebles» y «El mundu de les creyencies».

Os dous volúmenes tán xa en distribución y poden atoparse nas llibreirías asturianas y na del Academia de la Llingua Asturiana.

La especialidá docente de llingua asturiana pal profesoráu: el mayor fitu históricu nel procesu de recuperación llingüística n’Asturies

L’alcuerdu algamáu güei, 9 de xunetu del 2026, ente’l Gobiernu del Principáu d’Asturies (representáu pol Presidente Barbón y la Conseyera d’Educación Eva Ledo) y el Ministeriu d’Educación (cola so responsable Milagros Tolón al frente) que fai posible la reconocencia de la especialidá docente del profesoráu d’asturianu y eonaviegu constitúi, a xuiciu de l’Academia de la Llingua Asturiana (ALLA), el fechu más relevante nos caberos 40 años de política llingüística nel Principáu.

N’efeutu, tuvieron que pasar 42 años —nun s’escaeza que la enseñanza del asturianu entama en 1984— pa facer xusticia a un profesoráu que, teniendo dende cuantayá les mesmes esixencies de formación universitaria que’l restu de docentes, nun podía hasta esti momentu acceder a la condición de funcionariu pente medies de los concursos d’oposición y n’igualdá de condiciones que’l restu de docentes.

La esixencia de la especialidá docente foi, xunto col derechu constitucional a la oficialidá, la principal reclamación del asturianismu cultural de magar la década de los 80 del sieglu pasáu con organizaciones como’l Coleutivu «Llingua y Enseñanza» qu’axuntaba a profesores d’asturianu de toles estayes educatives (dende la educación infantil a la universitaria) o con instituciones como la propia Academia que, al traviés de la so estaya pedagóxica, llegó a caltener xuntes col Ministeriu d’Educación del Gobiernu de Rajoy, pero ensin los llogros que tanto necesitaba’l sistema educativu n’Asturies.

L’Academia de la Llingua Asturiana felicita, de mou especial, a l’asociación ADAE (Asociación de Docentes d’Asturianu y Eonaviegu) pol so protagonismu, intelixencia y puxu pa ser a caltener nos caberos años una reinvindicación histórica qu’agora mesmo recueye’l so mayor éxitu y fai posible que nos colexos ya institutos d’Asturies el profesoráu d’asturianu tenga la mesma dignidá que’l restu y pueda collaborar con enfotu a la meyora de la calidá educativa de la nuesa comunidá autónoma.

El papel xugáu polos sindicatos d’enseñanza n’Asturies foi, al empar, decisivu. Dende l’ALLA tamién queremos facer pública reconocencia del so esfuerzu y constancia a lo llargo del tiempu, amosaos, mesmamente, con motivu de les movilizaciones del profesoráu asturianu a lo cabero’l cursu pasáu.

Güei ye un gran día pa la cultura d’Asturies y pal so sistema educativu. La negociación y l’algame de la especialidá docente ye un gran trunfu del Gobiernu d’Asturies. Dende l’Academia correspuende reconoce-y el llogru. Asina lo facemos, compartiendo esta gran allegría con tola comunidá educativa asturiana.

Uviéu, 9 de xunetu del 2026