L’Academia entama’l ciclu de «Alcuentros na ALLA» cola primer intervención del presidente Xosé Antón González Riaño

Desendolcando’l so compromisu d’abertura a la comunidá, la institución llingüística d’Asturies entama los «Alcuentros na ALLA», un ciclu onde los y les académiques van ufrir al alderique les sos reflexones, análisis y vivencies en rellación cola so xera na Academia. En cada alcuentru, un miembru de la institución va proponer un tema concretu pa que’l públicu, d’un mou específicu y sistemáticu, vaya dirixendo la esposición, pente medies d’entrugues o comentarios concretos, a lo llargo d’una hora.

El próximu 17 de xunu de 2025, a les 19:30 h, el presidente de la institución, Xosé Antón González Riaño, abre’l ciclu con «L’ALLA, camín del mediu sieglu nel llabor normativu y tutelar», onde, tres d’una pequeña presentación de la temática que se propón abordar, el públicu asistente va tener la oportunidá d’entrugar al académicu de la llingua asturiana sobre’l so trabayu y esperiencia nesa estaya del llabor de la institución.

L’Academia aguarda por que’l resultáu d’esti ciclu d’alcuentros seya granible y algame a esparder y desplicar d’una manera más específica y personal el llabor históricu y de futuru de la institución y los sos integrantes. D’esta miente, la frecuencia prevista ye trimestral y el llugar d’alcuentru ye’l propiu llar de la institución.

Presentación del númberu 41 de la revista Lliteratura

El miércoles 18 de xunu, a les 20:30 h, nel marcu de la Feria del llibru de Xixón (FeLiX, Carpa Atalaya), preséntase’l nú,mberu últimu de la revista Lliteratura.

Nel actu, que va moderar Xosé Ramón Iglesias Cueva, van facer llectura de les sos contribuciones los y les autores Noelia Ordieres, Xavi Cayao ya Inaciu Galán.

El próximu llunes, 26 de mayu, a les 12h, nel llar de l’Academia de la Llingua Asturiana (c/ L’Águila, 10), va presentase’l primer nivel del proyeutu formativu d’asturianu p’adultos Noyos.

Noyos ye un métodu d’alfabetización n’asturianu que garra’l Marco Común Européu de Referencia pa les Llingües como base pa graduar los diferentes niveles. Dende un puntu de vista comunicativu, al traviés del trabayu de les comunicaciones y de les espresiones orales y escrites, esti proyeutu quier abarcar los niveles elementales (A1 y A2), medios (B1 y B2) y superiores (C1 y C2).

Amás del manual, Noyos cuenta con una plataforma dixital onde l’alumnáu y el profesoráu puen acceder al material audiovisual y a actividaes complementaries concebíes pal autoestudiu.

L’Academia de la Llingua Asturiana pon esti métodu d’enseñanza a disposición de cualquier asociación o grupu que quiera usalu como ferramienta pa poner clase d’asturianu.

Na presentación van participar Xosé Antón González Riaño (Presidente de l’Academia de la Llingua Asturiana), Carlos Suari Rodrigue y Aida Celemín Fuertes (trabayadores de la Secretaría Téunica de l’Academia de la Llingua Asturiana y de la comisión que desarrolló’l proyeutu).

 Asoléyase’l primer tomu de la segunda edición de la Historia de la Lliteratura Asturiana

L’Academia de la Llingua Asturiana (ALLA) publica’l primer tomu de la reedición, correxida y ampliada, de la Historia de la Lliteratura Asturiana.

Cola publicación nel añu 2002 de la Historia de la Lliteratura Asturiana, l’ALLA pretendía, d’un llau, amosar per primer vegada la existencia d’una lliteratura autónoma con una tradición que vien yá dende’l sieglu XVII, y, d’otru llau, apurrir a la sociedá asturiana una obra que-y permitiera, con enfotu didáuticu, el conocimientu del so patrimoniu lliterariu.

Dos décades dempués, escosada la primer edición, anóvase incorporando les novedaes apaecíes nos años caberos. Nesti tiempu fueron munchos y mui importantes los testos recuperaos, asina como los trabayos y estudios críticos que sobre la lliteratura asturiana fueron viendo la lluz. Por mor de la bayura d’estes novedaes, preséntase la obra en dos volúmenes.

El númberu 41 de la revista Lliteratura llega a les llibreríes.

Un añu más, dientro de la celebración del XLVI Día de les Lletres Asturianes, la revista Lliteratura presenta un nuevu númberu, el 41, nel qu’espeya la creación lliteraria n’asturianu más nueva y anovadora. Baxo la direición de Marta Mori d’Arriba y con un diseñu d’inspiración xaponesa d’Henrique Facuriella, preséntense en  seis seiciones los testos de más de cuarenta collaboradores.

Esti númberu confórmenlu testos de Pablo Antón Marín Estrada, Lourdes Álvarez, Héctor Pérez Iglesias, Raúl Alonso, Noelia Ordieres, Xavi Cayao, Daniel García Granda y Francisco Priegue na seición de poesía; testos de Miguel Allende, Maxe R. Gullón, Sidoro Villa Costales, Paula Pulgar Alvez, Pablo X. Suárez y Blanca Fernández Quintana nel apartáu narrativu; un monólogu teatral de Montserrat Garnacho; los ensayos de Laura Marcos y Sofía Castañón; y les traducciones de Dante Alighieri (Marta Mori), Eduardo Pondal y Fracisco Niebro (Gonzalo Llamedo), Beibuh Uld El Hach (Xuan Porta) y Kamel Daoud (Xandru Martino).

Pon el ramu a la revista la seición de crítica encabezada por José Luis Rendueles col panorama lliterariu del añu 2024 y siguida de les contribuciones d’Ángeles Carbajal Roza, Pablo Rodríguez Medina, Marta López Fernández, Ernesto García del Castillo «Neto», Natalia González Menéndez, Daniel García Granda, Carmen Siñeriz Rico, Darío de Dios Sanz, Aida Escudero, Xavi Cayao, Pelayo Martínez Olái, Ana Lamela, Inaciu Galán, Pilar Fidalgo Pravia, Vicente García Oliva, Pablo Rodríguez Medina, María Fernández Abril, Chechu García, Xandru Martino Ruz, Natalia Riego Arredondas, Adrián Martínez Expósito y Lluis Aique Iglesias.

Yá disponible nes llibreríes asturianes y na llibrería de l’ALLA.