El proyeutu del Pequeñu Atles Llingüísticu d'Asturies cuenta yá col primer volume editáu, «El mundu animal»

El Pequeñu Atles Llingüísticu d’Asturies (PALLA) ye’l primer atles de conxuntu dedicáu a la realidá llingüística d’Asturies y el resultáu d’un llargu llabor de compilación y estudiu de datos de campu desendolcáu pola Academia de la Llingua Asturiana. Dientro de la tradición de les obres de xeollingüística, el palla enmárcase nos «pequeños atles», obres qu’ufren una visión cartográfica sintética, comentada ya interpretativa.

El públicu xeneral va atopar nel palla una obra visual que rexistra la bayura llingüística, sobre manera léxica, del asturianu y l’eonaviegu. El públicu especializao va tener al so algame una ferramienta d’interés científicu, con comentarios de calter etimolóxicu, históricu y semánticu. El material presentao procede d’encuestes de tres fontes, mayormente inédites, que se trataron nel palla con una metodoloxía común: 24 puntos del Atlas Lingüístico de la Península Ibérica (1932-1947), 35 del Atlas Lingüístico de España y Portugal (años setenta) y otros 35 de la campaña d’encuestación fecha pola ALLA en 2025 dientro del Sistema Integral d’Estudios Llingüísticos (SIELLA).

Esti primer volume recueye 75 mapes y comentarios dedicaos al mundu animal —insectos y otros invertebraos, aves, reptiles, anfibios y mamíferos—, escoyíos pol so interés llingüísticu y pola posibilidá de comparanza ente les distintes fontes. Amás d’ello, incorpora les claves metodolóxiques necesaries pa interpretar esta y les entregues próximes del PALLA.