Con gran esmolición, l’Academia de la Llingua Asturiana (ALLA) siguió nel día de güei la negativa parllamentaria a que la Conseyera de Cultura, Política Llingüística y Turismu exerciere’l so derechu a emplegar institucionalmente la so llingua patrimonial, basándose nuna interpretación forciada del reglamentu, según la que namás los diputaos tendríen el derechu a espresase n’asturianu. Y ye que, como dalgunos intervinientes na sesión afitaron, la llingua asturiana yá s’usare anteriormente n’abondes comparecencies de carauterístiques mui asemeyaes y nel mesmu llugar.

Poro, a l’Academia de la Llingua Asturiana abúlta-y llamentable (y hasta escandaloso) que se refugue d’esti mou qu’una representante del Gobiernu d’Asturies faiga usu de la so llibertá llingüística nuna comparecencia parllamentaria y, más entá, que la xida pa ello seya una hipotética imposibilidá d’entendimientu, argumentu tramposu que rescampla na so estratexa de llevantar muries au nun les hai, intentando xenerar un conflictu que nun se da na sociedá asturiana pa ganar asina’l protagonismu mediáticu.

L’ALLA considera, arriendes d’ello, que si hai un reglamentu na Xunta Xeneral que torgue l’usu de la llingua hestórica d’Asturies en parllamentu, el so camudamientu habrá ser inmediatu, axustándose, ente otres coses, al exerciciu de derechos democráticos básicos y al espíritu y la lletra de les estremaes normatives llegales que güei rixen la promoción del usu del asturianu.

Dende l’Academia queremos treslladar a Berta Piñán el nuesu encontu a les propuestes d’actuación llingüística presentaes güei y la nuesa más fonda solidaridá como institución tutelar de los derechos llingüísticos del pueblu asturianu énte una situación que constitúi un verdaderu ataque al exerciciu d’ún de los derechos humanos más básicos y universalmente protexíos: el d’emplegar la propia llingua.

Lo vivío güei na Xunta Xeneral nun fai más qu’afitar una vegada más la necesidá de que n’Asturies seya efeutiva la previsión constitucional (art. 3.2 de la CE); esto ye, la declaración de co-oficialidá del asturianu como única midida pa garantizar la llibertá llingüística y facer dafechu efeutivu’l derechu a emplegar la llingua asturiana per parte de toa persona que lo escueya llibremente.

Uviéu, 1 d’ochobre de 2019

ACADEMIA DE LA LLINGUA ASTURIANA