Pablo Suárez García, Onomástica de Trubia (Asturies). Uviéu, Academia de la Llingua Asturiana & Universidá d’Uviéu, 2016. «Llibrería llingüística» nu 28.

Asoléyase nesti volume la tercer y última parte de la tesis del autor, presentada na Universidá d’Uviéu en 2007. Con esta cabera entrega, que sigue al estudiu llingüísticu La fala de Trubia (Asturies): estudiu sincrónicu y diacrónicu, asoleyáu nel númberu 27 d’esta mesma coleición, y al Vocabulariu de Trubia (Uviéu, ALLA, 2010), complétase la publicación de tolos materiales estudiaos na citada tesis. Tres una «Nota previa» y un «Entamu» de presentación de los conteníos del volume, la obra (640 páxines) organízase en dos grandes y percuriaos estudios onomásticos titulaos respeutivamente «Estudiu etimolóxicu de la toponimia de Trubia» y «Los sobrenomes en Trubia». El primeru ocupa les páxines 15 a 494 ya inclúi dos apartaos complementarios: «Documentacion medieval» ya «Índiz alfabéticu de principales etimos estudiaos». El segundu capitulu, igualmente complementáu con un «Llistáu alfabéticu de sobrenomes atropaos», ocupa les páxines 495 a la 626 ya inclúi tamién nomes propios ya hipocorísticos. Síguelos nes páxines 627 a la 638 una completa bibliografía mui especializada. El material toponímico que s’estudia nel primer capítulu yá s’asoleyara en 2003 y 2006 respeutivamente, nos númberos 99 y 113 de la Coleición «Toponimia» de l’ALLA, roblaos conxuntamente con Rosa Ros Zuazua.