BONES FIESTES
CULTURES. Revista Asturiana de Cultura
Cultures. Revista Asturiana de Cultura. nu 19 (2015) Uviéu, ALLA.
Nuevu númberu de la Revista de Cultures de l’Academia de la Llingua. Nella úfrense artículos d’estremáu calter de Roberto González-Quevedo («Paisax y cultura n’Asturies (II). Los oratorios como oxetivación d’idees y valores»), Manuel Francisco Matarín Guil («Las ermitas de ánimas de la comarca de los ríos Andarax y Nacimiento (Almería)»), Xuan Pedrayes Obaya («Catálogu de los oratorios en Conceyu Villaviciosa»), Ramsés Ilesies Fernández & Xosé Antón Fernández «Ambás» («Aguilandeiros de San Xuan en Villapañada (Grau)»), Carme Pedrayes Toyos («Vezos y creyencies en conceyu Villaviciosa»), Roberto González-Quevedo («Categorización de cultura ya naturaleza nos cuentos populares d’animales»). La revista sigue cola «Faza d’histories de vida» colos trabayos de Milio’l del Nido («Mio tíu Milio») y Pepe Monteserín («Pa vaques, le mio hermanu» y «L’octavu pasaxeru»). El númberu zárralu la estaya «Reseñes» de Juan Alfonso Fernández García («En Ca’l Gaiteiru o l’entamu de la reconstrucción historicista de la gaita n’Asturies»).
Allugamientu de l’Academia de la Llingua Asturiana énte la propuesta presupuestaria del Gobiernu d’Asturies en rellación cola llingua asturiana, o la imposibilidá de facer política llingüística ensin presupuestu económicu que la sofite
L’Academia de la Llingua Asturiana, llueu de conocer pelos medios de comunicación la propuesta presupuestaria destinada al asturianu que’l Gobiernu d’Asturies acaba d’unviar a la Xunta Xeneral del Principáu, quier treslladar a la opinión pública la so más fonda deceición pol conteníu de la mesma.
N’efeutu, les espeutatives yeren otres darréu del pautu d’investidura algamáu ente la FSA-PSOE ya IX, tamién tres la proposición non de llei aprobada (a mediaos d’ochobre pasáu) mayoritariamente nel parllamentu asturianu colos votos favoratibles d’IX, PSOE, Foro y Podemos, asina como dempués del alcuerdu presupuestariu pal exerciciu viniente ente’l Gobiernu d’Asturies y el grupu parllamentariu d’IX.
Plantegar que se pue facer política llingüística con un presupuestu de 1.500.000 d’euros (esto ye, 1,5 euros por asturianu) ye daqué ofensible pa toles persones con una mínima sensibilidá llingüística y cultural asturiana. Da que pensar, nesti sen, el fechu de qu’otres comunidaes con llingua propia, ente elles les que menos dediquen a política llingüística, s’estremen tanto de la propuesta asturiana. Asina -y al marxe de partíes económiques concretes destinaes a educación, vida parllamentaria, xestión de diputaciones y universidaes, etc.- Galicia y Valencia tripliquen por persona’l presupuestu asturianu; Baleares cuadriplícalu; y Navarra, pa cuasi la mitá de población qu’Asturies y con una proporción d’usuarios de la llingua autóctona que nun sobrepasa’l 10% de la población, dedica a política llingüística 4.000.000 d’euros. Too ello por nun falar del presupuestu destináu a la proteición del aranés que, cenciellamente, multiplica por 10 euros el presupuestu por persona n’Asturies.
Na nuesa comunidá, llueu de lo anterior, faise dafechu imposible falar de recuperación llingüística -y mesmamente de política llingüística favoratible- cuando se cunta con unos recursos tan escandalosamente insuficientes. Ye verdá qu’hai midíes que dependen esclusivamente de la voluntá política de los xestores institucionales y que puen facese a coste cero (por exemplu, les rotulaciones de nueves instancies y servicios públicos cuesten tanto n’asturianu como en castellanu, espublizar un anunciu institucional nos medios de comunicación cuesta lo mesmo n’asturianu qu’en castellanu, etc.), pero ye verdá qu’hai otres munches midíes que nun se puen llevar alantre, nin n’Asturies nin en dengún otru sitiu, si nun van acompañaes del encontu económicu que les faiga creyibles.
Esta ye la llaceriosa situación cola que nos atopamos agora na tramitación parllamentaria de los presupuestos. ¿Qué facer, entós? Pues, en primer llugar, llamar l’atención sobre estos fechos pa de nengún mou se puea repitir situación asemeyada n’años venideros y, sobre too, actuar agora mesmo, nel intre, faciendo ver a los partíos políticos que llevaron nos sos programes midíes concretes de política llingüística la necesidá de plantegar enmiendes parciales a los presupuestos del 2015 que meyoren les partíes económiques destinaes a la llingua y cultura d’Asturies.
Ye obligación de l’Academia de la Llingua Asturiana denunciar una situación oxetivamente inxusta y fondamente discriminatoria, una vegada más, pa la llingua asturiana y pidir a los partíos políticos con representación na Xunta Xeneral del Principáu d’Asturies qu’igüen una situación que nos avergoña como asturianos.
Uviéu, a 30 díes andaos del mes de payares de 2015.
ACADEMIA DE LA LLINGUA ASTURIANA
XXXIV Xornaes Internacionales d’Estudiu
Entamen les XXXIV Xornaes Internacionales d’Estudiu na Facultá de Filosofía y Lletres de la Universidá d’Uviéu. Les Xornaes desendólquense del 3 al 5 de payares de 2015 del Salón d’Actos de la Facultá con esti programa.
A les persones matriculaes y qu’asistan a les Xornaes daráse-yos un certificáu acreitativu. Más información y matrícula n’Academia de la Llingua Asturiana.
Prueba de conocencia (xineru 2016)
CONVOCATORIA DE XINERU*
L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:
- Nos meses de xineru y mayu celébrense les pruebes, abiertes a toles persones interesaes.
- Unos quince díes enantes de les pruebes va abrise un plazu de matrícula.
- A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
- Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
- Pal bon resultáu d’estes pruebes habrá tenese un dominiu básicu de les estayes que vienen darréu:
- ESTAYA LLINGÜÍSTICA
- Teoría gramatical: conocencia y dominiu del funcionamientu gramatical del asturianu y de la normativa académica.
- Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
- Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
- ESTAYA DE LLINGUA Y SOCIEDÁ
Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
- ESTAYA LLINGÜÍSTICA
- La prueba va tener dos partes, una escrita (dictáu, torna, exercicios gramaticales, redaición) y otra falada (conversación).
Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed. revisada; Gramática de la Llingua Asturiana, ALLA, Uviéu, 2008, 3ª ed. reimpresión).
Asina mesmo, aconséyase la llectura de testos fechos acordies cola normativa, como los asoleyaos por esta Academia.
* En resultes d’esto, el 30 de xineru de 2016 va facese la prueba semestral. El plazu de matrícula ye del 18 al 28 de xineru. Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h.