Author: admin

Posted on

Nuevos miembros correspondientes

Na xunta estraordinaria de l’Academia de la Llingua Asturiana fecha’l pasáu xueves 10 de marzu, aprobóse por unanimidá la propuesta de nomamientu de dos nuevos académicos correspondientes, los doctores D. Pablo Suárez García y D. Xosé Antón Suárez Puente.

Pablo Suárez García (Udrión-Trubia, 1973) ye Llicenciáu n’Inxeniería Superior de Telecomunicaciones, en Matemátiques y en Filoloxía Hispánica; Doctor en Filoloxía pola Universidá d’Uviéu y Especialista en Filoloxía Asturiana. Ye autor de traducciones al asturianu y ediciones crítiques d’obres como’l Tirán el Blancu, coeditáu cola Acadèmia Valenciana de la Llengua, Proses profanes y la Tragédia de Caldesa de Joan Roís de Corella. Tamién ye’l traductor de la versión al asturianu d’El Quixote de Miguel de Cervantes. Collaborador d’esta Academia, participa nes «Xornaes Internacionales d’Estudiu» y foi premiáu en delles ocasiones nos Concursos d’Investigación de la institución.

Xosé Antón Suárez Puente (Uviéu, 1971) ye Doctor en Bioloxía y miembru destacáu del Institutu Universitariu d’Oncoloxía de la Universidá d’Uviéu que dirixe’l profesor Carlos López Otín. Suárez Puente emplega davezu l’asturianu en conferencies y seminarios de divulgación de los avances científicos del IUOPA. Asina mesmo, ye traductor de programes informáticos al asturianu, como’l navegador Firefox, y gracies al so llabor llogróse la reconocencia per parte del comité ISO del códigu ISO-639 pa la llingua asturiana (ast), requisitu indispensable pa la so reconocencia n’Internet. Collaborador d’esta institución, ye miembru del Comité d’Espublización de la revista dixital Ciencies. Cartafueyos asturianos de Ciencia y Teunoloxía, editada pola Universidá d’Uviéu y esta Academia, y onde tien asoleyaos dellos artículos.

 

Los dos nuevos correspondientes serán nomaos el próximu 6 de mayu, XXXVII Día de les Lletres Asturianes.

 

Uviéu, 14 de marzu de 2016

 

ACADEMIA DE LA LLINGUA ASTURIANA

Posted on

L’ALLA refuga la postura del PP

NOTA OFICIAL: L’ALLA REFUGA LA POSTURA DEL PARTÍU POPULAR PA COL ASTURIANU NA XUNTA XENERAL

 

L’Academia de la Llingua Asturiana, enterada de la prohibición del usu de la llingua asturiana na Comisión d’Estudiu sobre Réxime, Proteición y Promoción del Asturianu, quier treslladar a la opinión pública asturiana la so más fonda esmolición énte la falta de respetu hacia la nuesa llingua de los parllamentarios qu’afalaron tal prohibición na Xunta Xeneral.

N’efeutu, refugar l’usu del asturianu xunto col castellanu nes actividaes parllamentaries da cuenta perfeutamente del allugamientu, oxetivamente anti-asturianu, de dalgunos de los nuesos representantes políticos y, sobre manera, de Mercedes Fernández, cabezalera del Partíu Popular y entamadora d’esta vergoñosa iniciativa. L’Academia, nesti sen, nun pue sinón escandalizase al lleer el “tweet” col que la Presidenta del Partíu Popular facía alarde del so “llogru” anti-asturianu: “hemos logrado que el castellano sea la única lengua del parlamento en Asturias”.

La verdá ye que ye difícil alcontrase con una manifestación tan inequívoca de despreciu a Asturies, d’autoodiu y de falta de sensibilidá pa cola cultura de los asturianos. Y dende llueu, ye ablucante qu’una dirixente política asturiana s’atreva a espresase nesos términos.

L’Academia de la Llingua Asturiana ye sabedora de que la igua de situaciones como les qu’acabamos de describir namái pasa pol reconocimientu –dende llueu, irrenunciable– de la oficialidá de la llingua histórica del pueblu asturianu. Poro, l’Academia pide a tolos Grupos Parllamentarios que, llegáu’l momentu, sofiten esti procesu de reconocimientu xurídicu del asturianu y qu’actúen (mentanto esa figura llegal nun seya plenamente efeutiva) afalando calces de dignificación y de planificación llingüística que, acordies col marcu normativu vixente, enconten l’usu del asturianu en toles instituciones del País y, n’especial, na Xunta Xeneral, muérganu máximu de representación de los ciudadanos y ciudadanes d’Asturies.

Uviéu, 16 de febreru de 2016.

ACADEMIA DE LA LLINGUA ASTURIANA

Posted on

Prueba conocencia (mayu 2016)

CONVOCATORIA DE MAYU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

  1. Nos meses de xineru y mayu celébrense les pruebes, abiertes a toles persones interesaes.
  2. Unos quince díes enantes de les pruebes va abrise un plazu de matrícula.
  3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
  4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
  5. Pal bon resultáu d’estes pruebes habrá tenese un dominiu básicu de les estayes que vienen darréu:
    1. ESTAYA LLINGÜÍSTICA
      1. Teoría gramatical: conocencia y dominiu del funcionamientu gramatical del asturianu y de la normativa académica.
      2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
      3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
    2. ESTAYA DE LLINGUA Y SOCIEDÁ
      Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
  6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2012, 7ª ed. revisada; Gramática de la Llingua Asturiana, ALLA, Uviéu, 2008, 3ª ed. reimpresión).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 28 de mayu de 2016 va facese la prueba semestral. El plazu de matrícula ye del 16 al 26 de mayu. Horariu de matrícula: llunes a xueves de 9:00 h. a 15:00 h. y de 16:00 h. a 19:00 h. Vienres de 9:00 h. a 14:00 h. Preciu: 12,00 €.

Posted on

Al rodiu de la especialidá docente

NOTA OFICIAL: AL RODIU DE LA ESPECIALIDÁ DOCENTE DE LLINGUA ASTURIANA

 

L’Academia de la Llingua Asturiana vien siguiendo con munchu interés y fonda preocupación les noticies apaecíes apocayá nos medios de prensa escrita, radio y tv., no que cinca a la tramitación de la demanda de la especialidá docente de Llingua Asturiana pal profesoráu d’Educación Primaria y Secundaria.

La síntesis d’estes noticies plantega, per un llau, que’l Ministeriu d’Educación del Gobiernu d’España diz nun tener competencies pa facer posible tal especialidá y, per otru, que, darréu d’ello, la Conseyería d’Educación del Principáu va facer vidable la especialidá al traviés d’un decretu autonómicu (trámite nel que va participar una comisión inter-institucional con representantes cualificaos del Ministeriu y de la Conseyería d’Educación).

Énte estes anuncies, l’Academia de la Llingua Asturiana quier dexar claro lo siguiente:

  1. Resulta inaudito que’l Ministeriu d’Educación tresmita la idea de que’l tema de les especialidaes docentes nun forma parte de los sos atribuciones esclusives, darréu que ye xustamente esti Ministeriu’l que les establez, tanto pal cuerpu de Maestros d’Educación Infantil y Primaria (Real Decretu 1594/2011, de 4 de noviembre), como pal profesoráu d’Educación Secundaria (Real Decretu 1834/2008, de 8 de noviembre, desarrolláu llueu col Real Decretu 665/2015, de 17 de xunetu). Asina, a títulu d’exemplu, les especialidaes docentes n’Educación Infantil y Primaria son: Educación Infantil, Educación Primaria, Llingua Estranxera (Inglés), Llingua Estranxera (Francés), Llingua Estranxera (Alemán), Educación Física, Música, Pedagoxía Terapéutica y Audición y Llinguaxe.
  2. El Ministeriu dispón, del mesmu mou, que tamién son especialidaes docentes na Educación Primaria y Secundaria les correspondientes a les llingües propies cooficiales de les respectives comunidaes autónomes (art. 2.2 del Real Decretu de primaria y art. 2.3 del Real Decretu de secundaria).
  3. Ello quier dicir que cualquier concursu oposición y de tresllaos en cualquier comunidá autónoma española ha facese, necesaria y obligatoriamente, acordies coles especialidaes docentes fixaes pol Ministeriu d’Educación, Cultura y Deporte.
  4. Nun se contempla, nin nel ordenamientu xeneral del estáu nin nel de les autonomíes, nenguna posibilidá de crear especialidaes docentes de calter “autonómicu”. Ye dicir, nun hai funcionarios docentes en primaria y secundaria con una especialidá que nun tea fixada pol Ministeriu.
  5. La propuesta del Conseyu Escolar del Estáu (muérganu institucional que desarrolla un llabor consultivu, d’asesoramientu y propuestes al Gobiernu del estáu en rellación con los distintos aspeutos del sistema educativu español) no que cinca a la posibidá de reconocimientu de la especialidá docente de Llingua Asturiana ye que los reales decretos amiesten un apartáu que diga: Naquelles Comunidaes Autónomes nes qu’haya llingües non oficiales que tengan proteición llegal y formen parte del currículu, podrá dase tamién, a petición de la Comunidá Autónoma y según necesidades educatives, la especialidá propia de la llingua respectiva. Esta ye, xustamente, la posición que defende l’Academia de la Llingua Asturiana.

 

Darréu de lo anterior, esta institución académica pide a la Conseyería d’Educación y Cultura del Gobiernu del Principáu d’Asturies que nun contribuya, magar seya de mou involuntariu, a semar más confusión ente la comunidá educativa d’Asturies. A la escontra d’ello, l’Academia encamienta a la Conseyería que la so bona voluntá pa encalzar esta demanda hestórica empobine a una negociación seria y rigurosa coles próximes autoridades educatives del Estáu que lleve a un cambéu, nel sentiu propuestu, de los decretos d’especialidaes. Sedría llamentable dexar pasar una oportunidá que vien sofitada, ente otres instituciones y coleutivos, polos sindicatos mayoritarios de la educación pública n’Asturies, poles asociaciones de padres y madres con más implantación na nuesa comunidá, pola Xunta Xeneral del Principáu d’Asturies, pola Xunta de Personal Docente non universitariu, pol Conseyu Escolar del Principáu y, como viemos enantes, pol propiu Conseyu Escolar del Estáu.

Y una consideración cabera más: toos estos y otros problemes que torguen el normal allugamientu normativu de la llingua asturiana y la so dignificación nun desapaecerán dafechu mentantu l’idioma de los asturianos nun algame l’estatus, xurídicu y constitucional, d’oficialidá.

Uviéu, a 19 díes andaos del mes de xineru de 2016.

ACADEMIA DE LA LLINGUA ASTURIANA

Posted on

Xunta con representantes de Miranda del Douro

El presidente de la Cámara Municipal de Miranda del Douro, Artur Nunes, xunto col vicepresidente de l’Associaçon de la Lhéngua i Cultura Mirandesa, Mario Correia, tuvieron esti miércoles 23 d’avientu una xunta de trabayu cola direición de l’Academia de la Llingua Asturiana nel llar de la institución.

Nesta xunta tratáronse importantes aspeutos venceyaos a la collaboración ente les dos instituciones, darréu del pautu robláu’l pasáu 20 de xunu en Miranda del Douro. L’axenda d’actividaes comunes pal exerciciu 2016 daráse a conocer en próximes feches.