La institución

L’Academia de la Llingua Asturiana (ALLA) ye una institución del Principáu d’Asturies. La so creación, al traviés d’un Decretu del Conseyu Rexonal (ente preautonómicu), nel añu 1980, enllaza cola tradición asturianística y resuelve una vindicación científica hasta entós frustrada. Naquel Decretu 33/1980, de 15 d’avientu, sobre la creación de l’Academia de la Llingua Asturiana, lléese:

“Fai cuasi dos sieglos qu’asturianos ilustres procuren qu’Asturies cuente con un organismu del estudiu, inventariu y espardimientu de la so llingua autóctona. Dende Gaspar Melchor de Xovellanos foron munchos los qu’amosaron repetidamente esta aspiración tan sentida ente los que defenden la supervivencia d’una peculiaridá cultural de tal importancia”.

Finalidá y llabor

Los Estatutos de l’ALLA indiquen que la codificación, la normativización y la estandarización de la llingua asturiana son los sos oxetivos.


D’alcuerdu a la Llei d’Usu y Promoción del asturianu, del añu 1998, l’ALLA ye un muérganu consultivu y asesor de l’Alministración del Principáu d’Asturies. Coles mesmes, nos Estatutos de l’ALLA ta prevista la collaboración col Principáu d’Asturies y, nel so casu, con otros poderes públicos, en función consultiva y asesora en materia de llingua, iguando los informes y dictámenes que correspuendan.

Acordies colo anterior, el llabor de l’ALLA dedícase a: 

  • Investigar y formular lleis gramaticales de la llingua asturiana y de les sos variedaes llingüístiques. 
  • Dar orientaciones y normes pal so cultivu escritu y formal. 
  • Inventariar el so léxicu. 
  • Afalar l’usu, la enseñanza y l’espardimientu del asturianu. 
  • Curiar polos derechos llingüísticos de la ciudadanía asturiana. 
  • Trabayar na capacitación de la llingua asturiana estándar col envís de qu’esta, llibremente aceutada, pueda llegar a ser mediu d’espresión en tolos niveles. 
  • Fomentar la celebración de premios y concursos lliterarios y didáuticos. 
  • Promover estudios llingüísticos sobre l’asturianu. 
  • Collaborar na formación del profesoráu específico, d’acordies coles instituciones que correspuendan y pudiendo llibrar certificaciones y documentos acreitativos en rellación con tala formación o con aspeutos téunico-científicos relativos al asturianu. 
  • Afitar el criteriu d’autoridá nes cuestiones relatives a la normativa, actualización y bon emplegu de la llingua asturiana. 
  • A tolos efeutos, l’Academia promoverá y mirará pol exerciciu de los derechos de les persones qu’empleguen el gallego-asturianu. Al traviés de la Secretaría Llingüística del Navia-Eo, la institución contribuyirá a la estandarización y normalización d’esta llingua.

Historia de l'ALLA

Ordenamientu

Identidá gráfica

Rellaciones institucionales

Allugamientu

Cai l’Águila, 10

33003, Uviéu

Asturies

Mapa

Teléfonu

+34 985 21 18 37

Alministración: estensión 1

Edición y biblioteca: estensión 2

Llamada

Unvios postales

Apartáu de correos 574

33080, Uviéu 

Asturies

Mensaxe direutu

Nós

L'Academia de la Llingua Asturiana ye la institución creada en 1980 pol Gobiernu d'Asturies pal estudiu, la promoción y la defensa del asturianu y l’eonaviegu.