La consciencia social d’esta vulnerabilidá garró forma en delles reaiciones a lo llargo la historia, pero n’especial y más intensamente nes cinco décades últimes, constituyendo un movimientu cultural de resistencia llingüística que fai d’esta la meyor reivindicación y la más caltenida nel tiempu de toles que circularon pela escena sociopolítica asturiana contemporánea. D’esti mou, llegó a collechar éxitos importantes de convocatoria, sobre manera nos acontecimientos más tresversales, como’l Pautu pol Autogobiernu y la Oficialidá de mediaos de los noventa del sieglu pasáu. Esta organización social axuntó a coleutivos políticos, asociaciones culturales y deportives, los sindicatos mayoritarios n’Asturies, etc. y que punxo na cai, nos medios de comunicación y na vida cultural asturiana una vindicación llingüística con un puxu desconocíu hasta entós. Frutu del llabor del Pautu foron les ocho declaraciones d’oficialidá nos conceyos d’Asturies.

Nuna llinia d’actuación asemeyada, el Conceyu Abiertu pola Oficialidá, na primer década del nuevu mileniu, siguió afondando nuna demanda social que sigue vixente hasta anguaño. Exemplu d’esto son les manifestaciones d’estraordinaria afluencia, como la celebrada na primavera de 2018 peles cais d’Uviéu, con unos 30.000 participantes. Asina, les décades últimes del sieglu XX y les dos primeres del XXI traxeron avances notables pal prestixu y la visibilidá del asturianu y del eonaviegu. Aumentaron los estudios científicos, les enseñances reglaes, la presencia nos medios dixitales, el cultivu artísticu y, con mayores torgues, el so usu periodísticu, radiofónicu y televisivu. Por embargu, estes meyores nun cumplen les previsiones del marcu llegal nin son abondes como pa frenar la minorización llingüística.

Nun artículu asoleyáu en Lletres Asturianes, el Presidente de l’Academia, Xosé Antón González Riaño, afitaba la conveniencia de la co-oficialidá de les nueses llingües nestos términos:

Les llingües asturiana y eonaviega son un patrimoniu cultural de tolos asturianos y asturianes. A toos y a toes pertenez por igual, al marxe de creyencies o de llexítimes diferencies ideolóxiques o polítiques. La consideración d’esti bien cultural ta prevista constitucionalmente al traviés del so reconocimientu oficial nel Estatutu d’Autonomía. Asturies, a la escontra de los procesos siguíos nes otres comunidaes billingües del Estáu, nun escoyó nel so momentu’l modelu d’oficialización, sinón un sistema de proteición que, llueu de décades de puesta en práutica, nun garantiza l’exerciciu plenu de los derechos llingüísticos de la ciudadanía y ye sentíu por munchos asturianos como discriminatoriu con respeutu a la práutica desendolcada n’otros ámbitos territoriales. 

Darréu de lo anterior, n’Asturies hai una demanda clara de superación d’esta anomalía constitucional y reclámase con puxu’l llogru d’una co-oficialidá afayada a les nueses concretes necesidaes. Nesti sen, la puesta en práutica de la oficialización nun tien por qué replicar los modelos implementaos n’otres comunidaes, sinón qu’ha buscar un camín propiu qu’afite les posibilidaes de sobrevivencia, la llibertá llingüística y l’aceutación social de les midíes de recuperación.