Tres de la fin de la dictadura la reclamación social de recuperar una institución académica pa la normativización del asturianu cristaliza en campañes y movilizaciones. L’ente preautonómicu d’Asturies, el Conseyu Rexonal d’Asturies, aprueba en 1980 la creación de l’Academia de la Llingua Asturiana (ALLA).

En 1981, depués del nomamientu de los seis primeros miembros de númberu per parte del Conseyu Rexonal d’Asturies, el filólogu Xosé Lluís García Arias queda escoyíu primer presidente de la recuperada institución. A lo llargo de los primeros venti años de l’Academia desendolca un inmensu trabayu de coordinación que permite a l’ALLA entamar revistes como Lletres Asturianes, Cultures o Lliteratura, programes formativos, colecciones y concursos d’investigación y lliteratura; y dexar remataos a la fin del so mandatu les ferramientes normatives básiques del asturianu: Normes Ortográfiques (1981), Gramática Asturiana (1998) y Diccionariu de la Llingua Asturiana (2000). Na presidencia de García Arias anicien tradiciones académiques como la celebración del Día de les Lletres Asturianes o les Xornaes Internacionales d’Estudiu. En 1995 produzse l’aprobación de los estatutos nuevos de l’ALLA, qu’incorporen, ente otres novedaes, l’asunción del papel académicu sobre l’eonaviegu, llabor pal que se crea la Secretaría Llingüística del Navia-Eo, que promueve la edición de materiales y espublizaciones como la revista Entrambasaguas.

N’acabando los venti años de llabor al frente de García Arias, garra’l relevu’l profesor y espertu en lliteratura, Miguel Ramos Corrada, que foi presidente ente los años 2000 y 2001. Destaca na so curtia xera la coordinación de la Historia de la Lliteratura Asturiana (2002), obra clave pa conocer les fases y evolución de les lletres asturianes. 

En 2001 algama la condición de presidenta Ana Cano, romanista de prestixu internacional y miembru de l’ALLA dende la so fundación. Nel so tiempu como cabezalera, que llega hasta l’añu 2017, destacó’l so llabor na interllocución coles instituciones, llogrando roblar mui bien de convenios, asina como l’avance na redaición de ferramientes normatives nueves y complementaries de les tres grandes obres básiques, ente les que destaquen los Cartafueyos Normativos y el centru TermAst, encargáu de regular la terminoloxía asturiana especializada. 

Foi tamién nel so mandatu cuando se crea la Universidá Asturiana de Branu (UABRA), afitando la collaboración que yá se venía desenvolviendo cola Universidá d’Uviéu nos cursos de branu de l’ALLA. Ye tamién baxo la so presidencia cuando se produz el mayor esfuerciu na dixitalización de la institución y dalgunes de les sos obres más emblemátiques, como’l DALLA, amás de da-y a l’Academia presencia nes redes sociales. Col treslláu dende un pisu nel 6 de la cai Marqués de Santa Cruz hasta les instalaciones del históricu edificiu del Monesteriu de San Pelayu, Cano tamién consiguió afitar un llar dignu pa l’Academia nel añu 2010. A lo cabero del so mandatu créase’l Premiu Nacional de Lliteratura Asturiana, que fai homenaxe a autores de trayectoria llarga y prestixa. 

En xunu del añu 2017 Xosé Antón González Riaño conviértese nel cuartu presidente de l’ALLA. El so mandatu hasta güei ta marcáu por un contestu políticu onde la intensificación del discutiniu sobre la oficialidá ye clave y el papel favorecedor de l’Academia, destacáu. Ye baxo la presidencia de González Riaño cuando l’ALLA recibe pela primer vegada una partida de los Presupuestos Xenerales del Estáu, averando la so situación a la equiparación coles otres academies del estáu. Superaes les circunstancies organizatives que supunxo l’andanciu de coronavirus, en 2021 l’Academia aprueba Estatutos nuevos, afitando’l calter xurídicu públicu de la institución y actualizando a los tiempos d’anguaño’l so articuláu. Rescampla tamién d’esti periodu l’entamu de proyectos como’l Diccionario Normativo d’Eonaviego, l’asoleyamientu del Diccionariu Etimolóxicu de la Llingua Asturiana de García Arias y la recuperación de los grandes ritmos de producción editorial y científica que la crisis económica de la década anterior tayara.

L’Academia de la Llingua Asturiana, con más de dos sieglos de tradición y antecedentes tres d’ella, algamó nel añu 2020 los cuarenta años de funcionamientu como una entidá afitada como referencia llingüística na sociedá asturiana y nel ámbitu internacional, asina como ente la comunidá d’asturfalantes, dientro y fuera d’Asturies.