Category: News

Posted on

Resultáu de los Concursos de l’Academia de la Llingua Asturiana 2014

Concursos d’Investigación

Concursu de Recoyida de Material Toponímico Oral

Aconceyáu’l Xuráu del Concursu d’Investigación de Recoyida de Material Toponímico Oral que convoca l’Academia de la Llingua Asturiana correspondiente al añu 2014, formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu, apáutase nel siguiente acuerdu:

  1. Premiar con 600 € el trabayu tituláu Toponimia de les parroquies de Lada y La Venta (Conceyu de Llangréu) del que ye autor Xabiel Fernández García.
  2. Dar un accésit de 300 € al trabayu tituláu Toponimia de la collación de Caldones (Xixón) del que son autores Llorían García-Flórez y Xosé García Sánchez.
  3. Dar un accésit de 150 € al trabayu tituláu Toponimia de La Baña. Contribución al estudiu de la llingua asturleonesa del que ye autor Jonatán Rodríguez Bayo.

Concursu de recoyida oral de léxicu asturianu

Aconceyáu’l Xuráu del Concursu d’Investigación de Recoyida de léxicu asturianu que convoca l’Academia de la Llingua Asturiana correspondiente al añu 2014, formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu, apáutase nel siguiente acuerdu:

  1. Dar un accésit de 300 € al trabayu tituláu Léxicu asturianu de la sidra con delles desplicaciones etimolóxiques y comentarios del que ye autor Inaciu Hevia Llavona.
  2. Dar un accésit de 150 € al trabayu tituláu Contribución al vocabulariu cabraliegu del que son autores Xuan Santori Vázquez, Juan Vicente Inguazo Prieto y Herminia Mier Mier.

Concursu d’Investigación Llingüística

Aconceyáu’l Xuráu del Concursu d’Investigación de d’Investigación Llingüística que convoca l’Academia de la Llingua Asturiana correspondiente al añu 2014, formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu, apáutase nel siguiente acuerdu:

  1. Premiar con 600 € el trabayu tituláu La nación televisada: llingua y identidá nos programes n’asturianu de TPA del que ye autor Damián Barreiro Maceiras.
  2. Dar un accésit de 300 € al trabayu tituláu «Una traducción filolóxica y crítica de la Història de Jacob Xalabin, novelina anónima catalana del sieglu XV (Siguida de les de la Història de la filla de l’emperador Contasti y la Història de la filla del rey d’Ongria, cuentos anónimos catalanes del mesmu sieglu)» del que ye autor Pablo Suárez García.
  3. Dar un accésit de 150 € al trabayu tituláu Estudiu socio-económicu y xurídicu de les ordenances del Conceyu d’Uviéu, s. XIII del que ye autora Ana Álvarez García.
  4. Dar un accésit de 150 € al trabayu tituláu Percepciones dialectales sobre los procesos de normalización y estandarización del asturianu del que ye autor Xuan Santori Vázquez.

Concursu d’Investigación sobre lliteratura asturiana

Aconceyáu’l Xuráu del Concursu d’Investigación sobre lliteratura asturiana que convoca l’Academia de la Llingua Asturiana correspondiente al añu 2014, formáu por Xosé Ramón Iglesias Cueva como presidente, Antonio Fernández Insuela como vocal, faciendo de secretaria Marta Mori d’Arriba, apáutase:

  1. Dexar ermu esti Concursu.

Concursu de Llectures pa Rapazos

Aconceyáu’l Xuráu del Concursu de Llectures pa Rapazos que convoca l’Academia de la Llingua Asturiana correspondiente al añu 2014, formáu por Urbano Rodríguez Vázquez como presidente, Vicente García Oliva como vocal y faciendo de secretariu Pablo Xuan Manzano Rodríguez, apáutase nel siguiente acuerdu:

  1. Dar el premiu de 600 €, al trabayu tituláu Tyan, del que ye autor Nel Ricardo Álvarez Morán.

Concursu de Creación Lliteraria, premiu “Llorienzu Novo Mier”

Aconceyáu’l Xuráu del Concursu de Creación Lliteraria, premiu “Llorienzu Novo Mier” que convoca l’Academia de la Llingua Asturiana correspondiente al añu 2014, formáu por Marta Mori d’Arriba como presidenta, Roberto González-Quevedo González como vocal, faciendo de secretariu Xosé Ramón Iglesias Cueva, apáutase na siguiente resolución:

  1. Premiar con 600 € el poemariu tituláu Como fueyes na seronda, del que ye autora Yose Álvarez-Mesa.

Concursu de Teatru

Aconceyáu’l Xuráu del Concursu de Teatru que convoca l’Academia de la Llingua Asturiana correspondiente al añu 2014, formáu por Xosé Ramón Iglesias Cueva como presidente, Antonio Fernández Insuela como vocal, faciendo de secretariu Adolfo Camilo Díaz, apáutase na siguiente resolución:

  1. Premiar con 600 € la obra titulada Ondina Llagu, de la que ye autor Sergio Manuel Buelga Casas.

Concursu de Recoyida de Material Lliterario Escrito, premiu “Federico G.-Fierro Botas”

Aconceyáu’l Xuráu del Concursu de Recoyida de Material Lliterario Escrito, premiu “Federico G.-Fierro Botas” que convoca l’Academia de la Llingua Asturiana correspondiente al añu 2014, formáu por Ana María Cano González como presidenta, Xosé Lluis García Arias como vocal y Alfonso Martín Caso faciendo de secretariu, apáutase nel siguiente acuerdu:

  1. Dar un accésit de 150 € al trabayu tituláu Coples d’antroxu y otros testos n’asturianu con Xixón de fondu (1898-1928), del que ye autor Inaciu Galán y González

Posted on

La LOMCE, el currículu d’Asturies y la enseñanza de la Llingua Asturiana

Llueu de l’aprobación de la LOMCE (Llei Orgánica de Meyora de la Calidá Educativa), con fecha 9 d’avientu de 2013, correspuende a les Comunidaes Autónomes afayar, dientro de les sos llendes competenciales, los conteníos de la mesma.

Al marxe d’otres consideraciones sobre’l valir y el nivel de consensu de la mentada llei, hai que reconocer que la disposición adicional trixésimo octava afitaba per primer vegada les posibilidaes educatives de les llingües propies non oficiales de les Comunidaes del Estáu español:

«Aquelles Comunidaes Autónomes nes qu’haya llingües non oficiales con proteición llegal ufiertaránles, nel so casu, nel bloque d’asignatures de llibre configuración autonómica nos términos que determine la so normativa reguladora.»

La situación actual, a pocos meses d’entrada en vixencia de la llei (cursos 1u, 3u y 5u d’Educación Primaria del próximu cursu académicu 2014-2015), ufría una perbona oportunidá pa meyorar los calces d’escolarización de la Llingua Asturiana n’aspeutos como A) númberu d’hores d’impartición selmanal (1,5 hores anguaño, situación dafechu insuficiente pal deprendizax de les competencies qu’esta enseñanza lleva inxertes); B) posibilidá d’usar l’asturianu con calter parcialmente vehicular pa trabayar conteníos d’asignatures como Ciencies Sociales o Naturales; C) allugamientu con calter verdaderamente voluntariu de la Llingua Asturiana nel currículu, acordies col marcu llegal; etc.

Constatamos, ensin embargu, que tamos énte una nueva oportunidá perdida darréu que A) la llingua sigue calteniendo una dedicación horaria difícilmente defendible dende’l puntu de vista pedagóxicu (1,5 hores a la selmana); B) nun hai previsión del so emplegu pa trabayar conteníos rellacionaos con aspeutos hestóricos, culturales, medioambientales, xeográficos, artísticos… de la Comunidá Autónoma; o C) pierde, en fin, el so calter de voluntariedá pa tresformase nuna materia optativa que compite cola Cultura Asturiana, bloque de conocimientos que poles sos carauterístiques habría ser tresversal en tol currículu asturianu.

Con ser lo anterior grave pal futuru educativu del asturianu, alcontrámonos agora con posicionamientos, ensin dulda minoritarios, non yá anti-pedagóxicos, sinón claramente de resistencia a l’aceutación del marcu llegal de referencia: LOMCE y Llei d’Usu. A lo que paez, determinaos sectores, a lo meyor desinformaos o a lo meyor conscientes del so facer, pretenden acabar cola escolarización de la Llingua Asturiana queriendo facela competir con otres materies como, por exemplu, la segunda llingua estranxera. La LOMCE dexaba la posibilidá d’encaxar la enseñanza d’una segunda llingua estranxera ensin competencia coles llingües propies de les comunidaes, fueren o non oficiales. Poro, plantegar nesti momentu un falsu discutiniu Llingua Asturiana/Llingua Estranxera ye namái una xida oportunista, malintencionada y tendenciosa pa desaniciar les curties posibilidaes que tien la escolarización de la Llingua Asturiana.

L’Academia de la Llingua Asturiana; los sindicatos de la enseñanza SUATEA, CCOO y FETE-UXT; les organizaciones de pas y mas d’alumnos como FAPA «Miguel Virgós» y FAPAS Xixón; la Xunta Estudiantil Asturiana; el Sindicatu d’Estudiantes; les asociaciones cíviques Xunta pola Defensa de la Llingua Asturiana, Iniciativa pol Asturianu y «Reciella (Families pol Asturianu)» faen responsable al Gobiernu del Principáu d’Asturies y a la Conseyería d’Educación de la regulación y el determín que se tome con respeuto al asitiamientu curricular de l’asignatura de Llingua Asturiana y entienden que l’alternativa ufiertada Llingua Asturiana/Cultura Asturiana constitúi yá una rebaxa de la situación anterior y un escenariu de mínimos minimísimos. Darréu d’ello, toa decisión que vaya escontra esti escenariu ye inaceutable dafechu, tanto dende’l puntu de vista llegal como dende’l puntu de vista social y cultural.

Les instituciones y organizaciones que sofitamos esti documentu proclamamos la nuesa belixerancia escontra cualesquier intentu de facer competir al asturianu con una segunda llingua estranxera o con cualquier otra materia que nun seya la de Cultura Asturiana y damos anuncia, tanto al Gobiernu como a la sociedá asturiana, de qu’actuaremos en consecuencia con toes aquelles iniciatives sociales y ciudadanes que tean al nuesu algame pa parar un desatín como’l que dende dalgunes instancies se pretende.

Uviéu, a 20 díes andaos del mes de xunu de 2014.

Posted on

L’ACADEMIA DE LA LLINGUA ASTURIANA CONDENA LA CONSCIENTE Y REITERADA DESCONSIDERACIÓN HACIA L’USU DEL ASTURIANU PER PARTE DEL ALCALDE DE NOREÑA

L’Academia de la Llingua Asturiana vien siguiendo con esmolición los continuos casos de discriminación llingüística que tán sufriendo los ciudadanos del Conceyu de Noreña a lo llargo d’estos años pola actitú del so alcalde, D. César Movilla, pa col usu de la llingua asturiana na vida diaria del conceyu.

La cabera decisión del alcalde de Noreña de refugar la petición d’un coleutivu de “Paraos y Precarios de Siero y Noreña” por tar redactada n’asturianu, ye una vegada más una falta de respetu hacia la llingua y la cultura asturiana –ya inda más, hacia’l propiu derechu de los ciudadanos del conceyu a usar la llingua d’Asturies–. N’efeutu, refugar el mentáu escritu cola xida de tener que tar “redactada en castellano, lengua oficial de esta Comunidad Autónoma”, da cuenta perfeutamente del allugamientu, oxetivamente anti-asturianu, del Sr. Alcalde y del so desconocimientu del marcu xurídicu qu’ampara’l derechu de los ciudadanos al llibre usu de la llingua asturiana.

L’Academia de la Llingua Asturiana treslladó a la FSA-PSOE (partíu al que pertenez l’alcalde) la so más fonda preocupación y perplexidá énte esti nuevu atropellu a la llingua asturiana y encamentó-y poner igua a una actuación que, con toa xusticia, podría calificase de pre-constitucional y antiestatutaria.

Uviéu, 29 de xineru de 2014

Posted on

Concursos de l’Academia 2014

CONCURSOS D’INVESTIGACIÓN

L’Academia de la Llingua Asturiana, naguando pol llogru d’una llingua dignificada y persabiendo que la investigación ye ún de los meyores encontos de toa reivindicación, fai convocatoria de cuatro premios pa obres en llingua asturiana según s’afita nestes bases:

  1. Convócase un premiu de 600 € pa un trabayu de recoyida de material toponímico oral, ensin asoleyar, qu’abarque
    la totalidá d’una parroquia, grupu de parroquies o Conceyu, siguiendo’l modelu afitáu na coleición «Toponimia» asoleyada por esta Academia.
  2. Convócase un premiu de 600 € pa un trabayu de recoyida oral de léxicu asturianu ensin asoleyar.
  3. Convócase un premiu de 600 € pa un trabayu d’investigación llingüística ensin asoleyar que tenga aspeutos llingüísticos o sociollingüísticos d’Asturies como oxetu d’estudiu, dende una perspeutiva sincrónica o diacrónica. El trabayu pue cincar aspeutos xenerales o específicos.
  4. Convócase un premiu de 600 € pa un trabayu d’investigación sobre lliteratura asturiana (oral o escrita) que seya orixinal ensin asoleyar, que nun pase de 100 fueyes tamañu foliu.
  5. A xuiciu del xuráu podrán dase hasta 3 accésits, ún de 300 € y dos de 150 €, en caúna de les modalidaes citaes.
  6. Los premios podrán quedar ermos.
  7. Puen participar toles persones interesaes, pero non los miembros de númberu de l’Academia de la
    Llingua Asturiana.
  8. Nun podrán concursar a estos premios les tesis doctorales.
  9. Los trabayos presentaránse por triplicao na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014. Nun se tornará nengún trabayu al so autor.
  10. L’Academia resérvase per dos años el derechu n’esclusiva de la edición, en cualquier formatu, del trabayu qu’algame’l primer premiu en cada modalidá, asina como de los beneficios que puedan siguise darréu.
  11. El xuráu o xuraos formaránlu tres persones escoyíes pola Academia de la Llingua Asturiana.
  12. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la
    prensa.
  13. El xuráu entiende les llendes d’esta convocatoria.
  14. Participar na convocatoria lleva inxerío aceutar perdafechu estes bases.

LLECTURES PA RAPAZOS

Con oxetu de llograr una bona lliteratura pa rapazos y rapacinos y al mesmu tiempu pa dir algamando’l material pedagóxico afayadizo, l’Academia de la Llingua Asturiana llama a dos concursos:

  1. De llectures (cuentos, rellatos, poesía, teatru, métodos de deprendimientu de la llingua, etc.) pa rapacinos d’Educación
    Primaria    .
  2. De llectures (cuentos, rellatos, poesía, teatru, métodos de deprendimientu de la llingua, etc.) pa rapazos d’Educaión Secundaria y de Bachilleratu.

Los finxos d’estos concursos son:

  • a) Premiaráse’l trabayu ganador de cada modalidá cola so imprentación y con 600 €.
  • b) Los premios podrán quedar ermos.
  • c) La temática ye llibre y sedrá valoratible’l tipu d’ilustración que s’axunte al testu.
  • d) Nun s’almitirán les traducciones.
  • e) Puen participar toles persones interesaes col númberu d’obres que-yos pete, pero non los miembros de númberu de l’Academia de la Llingua Asturiana.
  • f) Los trabayos presentaránse per triplicao (orixinal y dos copies) na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014 nun sobre ensin remite. Dientro’l sobre habrá dir otru, zarráu, coles señes del que concursa.
  • g) L’Academia resérvase per dos años el derechu n’esclusiva de la edición, en cualesquier formatu, de los trabayos premiaos, asina como de los beneficios que puedan siguise darréu.
  • h) Les obres non premiaes nun se tornarán a los sos autores pero estos podrán, pela so parte, faer usu de les copies non presentaes.
  • i) El xuráu o xuraos formaránlu tres persones escoyíes pola Academia de la Llingua Asturiana.
  • k) Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  • l) El xuráu entiende les llendes d’esta convocatoria.
  • ll) Participar na convocatoria lleva inxerío aceutar perdafechu estes bases.

CREACIÓN LLITERARIA PREMIU “Llorienzu Novo Mier”

L’Academia de la Llingua Asturiana llama a tolos escritores y persones enfotaes a un concursu de creación lliteraria en prosa o versu dientro d’estos finxos:

  1. Premiaráse cola so imprentación y con 600 € aquella obra ensin asoleyar, en prosa o versu, qu’a xuiciu del xuráu presente más valir lliterariu.
  2. El premiu pue quedar ermu.
  3. La temática ye llibre. La llargura’l rellatu ha tener, polo menos, 50 fueyes, estremaes les llinies a dos espacios. La llargura del poemariu ha ser, polo menos, de 500 versos.
  4. Puen participar toles persones interesaes col númberu d’obres que-yos pete, pero non los miembros de númberu de l’Academia de la Llingua Asturiana.
  5. Los trabayos presentaránse per triplicao na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014 nun sobre ensin remite. Dientro’l sobre habrá dir otru, zarráu, coles señes del que concursa.
  6. L’Academia resérvase per dos años el derechu n’esclusiva de la edición, en cualesquier formatu, del trabayu premiáu, asina como de los beneficios que puedan siguise darréu.
  7. Les obres non premiaes nun se tornarán a los sos autores pero estos podrán, pela so parte, faer usu de les copies non presentaes.
  8. El xuráu formaránlu tres persones escoyíes pola Academia de la Llingua Asturiana.
  9. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  10. El xuráu entiende les llendes d’esta convocatoria.
  11. Participar na convocatoria lleva inxerío aceutar perdafechu estes bases.

CONCURSU DE RECOYIDA DE MATERIAL LLITERARIO ORAL

L’Academia de la Llingua Asturiana llama a tolos escritores, investigadores y persones enfotaes a un concursu de recoyida de material lliterario oral asturiano dientro d’estos finxos:

  1. Premiaráse cola so imprentación y con 600 € aquel trabayu ensin asoleyarqu’a xuiciu del xuráu presente más valir. Tendráse en cuenta la calidá de los materiales presentaos y les referencies que s’aporten.
  2. A xuiciu del xuráu podrán dase hasta 3 accésits, ún de 300 € y dos de 150 €.
  3. Los premios podrán quedar ermos.
  4. Puen participar toles persones interesaes col númberu d’obres que-yos pete, pero non los miembros de númberu de l’Academia de la Llingua Asturiana.
  5. Los trabayos presentaránse per triplicao na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014 nun sobre ensin remite. Dientro’l sobre habrá dir otru, zarráu, coles señes del que concursa.
  6. L’Academia resérvase per dos años el derechu n’esclusiva de la edición, en cualesquier formatu, del trabayu premiáu, asina como de los beneficios que puedan siguise darréu.
  7. Los trabayos non premiaos nun se tornarán a los sos autores pero estos podrán, pela so parte, faer usu de les copies non presentaes.
  8. El xuráu formaránlu tres persones escoyíes pola Academia de la Llingua Asturiana.
  9. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  10. El xuráu entiende les llendes d’esta convocatoria.
  11. Participar na convocatoria lleva inxerío aceutar perdafechu estes bases.

CONCURSU DE TEATRU

L’Academia de la Llingua Asturiana llama a tolos escritores y persones enfotaes a un concursu de teatru n’asturianu dientro d’estos finxos:

  1. Premiaráse cola so imprentación y con 600 € aquella obra ensin asoleyar qu’a xuiciu del xuráu presente más valir lliterariu.
  2. El premiu pue quedar ermu.
  3. La temática ye llibre.
  4. Puen participar toles persones interesaes col númberu d’obres que-yos pete, pero non los miembros de númberu de l’Academia de la Llingua Asturiana.
  5. Los trabayos presentaránse per triplicao na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014 nun sobre ensin remite. Dientro’l sobre habrá dir otru, zarráu, coles señes del que concursa.
  6. L’Academia resérvase per dos años el derechu n’esclusiva de la edición, en cualesquier formatu, del trabayu premiáu, asina como de los beneficios que puedan siguise darréu.
  7. Les obres non premiaes nun se tornarán a los sos autores pero estos podrán, pela so parte, faer usu de les copies non presentaes.
  8. El xuráu formaránlu tres persones escoyíes pola Academia de la Llingua Asturiana.
  9. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  10. El xuráu entiende les llendes d’esta convocatoria.
  11. Participar na convocatoria lleva inxerío aceutar perdafechu estes bases.

CONCURSU DE RECOYIDA DE MATERIAL LLITERARIO ESCRITO
Premiu “Federico G.-Fierro Botas”

L’Academia de la Llingua Asturiana llama a tolos escritores, investigadores y persones enfotaes a un concursu de recoyida de material lliterario escrito dientro d’estos finxos:

  1. Premiaráse cola so imprentación y con 600 € aquel trabayu ensin asoleyarqu’a xuiciu del xuráu presente más valir. Tendráse en cuenta la calidá de los materiales presentaos, les referencies que s’aporten y la organización de los datos. Asina mesmo faise necesario que’l trabayu o trabayos presentaos s’axusten a les condiciones esixíes pal so posible asoleyamientu.
  2. La recompilación habrá ser, necesariamente, de testos asoleyaos o ensin asoleyar escritos enantes de 1970.
  3. A xuiciu del xuráu podrán dase hasta 3 accésits, ún de 300 € y dos de 150 €.
  4. Los premios podrán quedar ermos.
  5. Puen participar toles persones interesaes col númberu d’obres que-yos pete, pero non los miembros de númberu de l’Academia de la Llingua Asturiana.
  6. Los trabayos presentaránse per triplicao na Academia de la Llingua Asturiana (C/ L’Águila 10 – Uviéu) o unviaránse per corréu certificáu (Apartáu 574 – 33080 Uviéu) hasta’l día 28 de febreru de 2014 nun sobre ensin remite. Dientro’l sobre habrá dir otru, zarráu, coles señes del que concursa.
  7. L’Academia resérvase per dos años el derechu n’esclusiva de la edición, en cualesquier formatu, del trabayu premiáu, asina como de los beneficios que puedan siguise darréu.
  8. Los trabayos non premiaos nun se tornarán a los sos autores pero estos podrán, pela so parte, faer usu de les copies non presentaes.
  9. L’Academia resérvase per dos años el derechu n’esclusiva de la edición, en cualesquier formatu, del trabayu qu’algame’l primer premiu, asina como de los beneficios que puedan siguise darréu. La publicación fadráse, nel so casu, nes coleiciones «Llibrería Facsimilar» o «Cartafueyos de Lliteratura Escaecida» siempre y cuando nun se planteguen problemes de derechos d’autor.
  10. El xuráu formaránlu tres persones escoyíes pola Academia de la Llingua Asturiana.
  11. Del resultáu del xuráu, al que nun se podrá retrucar, daráse conocencia per Lletres Asturianes y comunicaráse a la prensa.
  12. El xuráu entiende les llendes d’esta convocatoria.

Posted on

MÁZCARA: El facedor de gomeros

Noel Canto Toimil, El facedor de gomeros, Uviéu, ALLA, 2013.

La coleición Mázcara algama un nuevu númberu, nesti casu la obra ganadora del Premiu de Teatru de l’Academia de la Llingua Asturiana na so edición del añu 2011. Esta obra fala de la realidá actual asturiana y ta enraigonada nel teatru costumista más tradicional. Muestra, al traviés del humor, de la ironía y de fechos y situaciones, delles vegaes surrealistes, una sociedá que yá camudó, un paisaxe distintu de la mítica Asturies industrial, minera y rural que suel servir davezu d’ambiente pa esti xéneru teatral.