El segundu númberu de la coleición Terrén preséntase en Proaza
La coleición «Terrén» algama’l so segundu númberu gracies al trabayu comprometíu d’Antonio Alonso de la Torre nos territorios d’El Ríu de Trubia.
El llibru, que yá ta disponible nes llibreríes asturianes, va presentase esti vienres 22 de mayu, a les 19 h, na Casa la Cultura de Proaza.
La cultura tradicional nos valles d’El Ríu de Trubia ufierta xunta y reeditada la obra que, sobre’l dominiu territorial de los conceyos de Proaza, Quirós y Teberga vieno ufiertándo-y a l’Academia de la Llingua Asturiana un collaborador lleal y sollerte: Antonio Alonso de la Torre García. Les contribuciones equí compendiaes espublizáronse ente los años 1997 y 2020 dientro de Cultures: Revista Asturiana de Cultura (númberos 7 a 24). Trátase d’artículos onde’l focu varia ente la escala de llugar o parroquia y la de conceyu, carauterística del autor que permite matizar muncho’l so trabayu de campu.
Alonso de la Torre García ye maestru, espertu en llingua asturiana, llicenciáu n’historia y doctor n’historia del arte. La so vida llaboral desendolcóse primero como maestru d’escuela y depués como profesor d’institutu. Sicasí, la xera docente enxamás torgó la so dedicación al estudiu cultural de la contorna que meyor conoz, la qu’altraviesa El Ríu de Trubia nel so camín dende los cumales a l’amestadura con El Ríu Nalón. Amás de les obres equí recoyíes, ye importante sorrayar la so aportación a la coleición académica Testos de Recoyida oral col volume Dichos, cuentos ya otres narraciones recoyíes en Villamexín y al atropu toponímicu intensivu de la zona, siendo l’autor de dellos volúmenes correspondientes al conceyu de Proaza, asoleyaos n’otra coleición de la casa: Toponimia.
