Xornaes Internacionales d’Estudiu
Les Xornaes Internacionales d’Estudiu son l’actividá d’intercambéu de producción investigadora con más antigüedá nel ámbitu de la filoloxía asturiana y una de les que más ediciones cuenta dientro del espaciu científicu de la romanística. Celébrense na Facultá de Filosofía y Lletres de la Universidá d’Uviéu y tienen tres díes de duración.
La so finalidá ye amosar y coneutar los estudios d’asturianística al traviés d’un programa de ponencies, comunicaciones y presentaciones que s’anueva tolos años y que, dacuando, tien un enfoque monográficu. Les Xornaes son, asina, el resultáu d’acomuñar el trabayu que tán desenvolviendo munches persones dende disciplines estremaes pero complementaries, na investigación de les lletres asturianes, seya d’un xeitu específicu o, bien, comparativu.
Direición: Ana María Cano González y María del Carmen Muñiz Cachón.
Les Xornaes Internacionales d’Estudiu realícense gracies a la collaboración de la Universidá d’Uviéu, al traviés del Alcuerdu Específicu d’Actividaes que tolos años robla cola Academia de la Llingua Asturiana.
Vinientes
Préstanos anunciar que les «XLII Xornaes Internacionales d’Estudiu» van llevase alantre los díes 5, 6 y 7 de payares d’esti añu 2024.
Abiertu’l plazu pa presentar comunicaciones
Pa poder presentar una propuesta ha remitinos, a informacion@alladixital.org, el títulu de la mesma xunto a un resume, de 200 a 300 pallabres, onde se conseñen los oxetivos, el desarrollu y unes referencies bibliográfiques.
El día 12 de mayu de 2024 ta previsto zarrar la receición de propuestes y, enantes del mes de xunu, anunciar les comunicaciones aceutaes y el so allugamientu dientro del programa.
Pasaes
- 1
- 2
Nós
L’Academia de la Llingua Asturiana ye la institución creada en 1980 pol Gobiernu d’Asturies pal estudiu, la promoción y la defensa del asturianu y l’eonaviegu.