La revista Ciencies. Cartafueyos Asturianos de Ciencia y Teunoloxía tien como oxetivu cimeru esparder na sociedá asturiana los avances ya investigaciones científiques y teunolóxiques, emplegando pa ello la llingua de nueso y con una perspectiva divulgadora que favoreza la comprensión de los temes por parte de los llectores interesaos nestos ámbitos.

La publicación, de calter añal, tien como direutor al profesor y académicu Carlos Lastra y ye resultáu de la granible collaboración ente l’Academia de la Llingua Asturiana y la Universidá d’Uviéu, al traviés del Vicerrectoráu d’Investigación. Acordies colo anterior, pue accedese llibremente a Ciencies dende los enllaces asitiaos nes respeutives páxines web d’entrambes instituciones.

Dase, d’esti mou, rempuesta al pidimientu que nesti sen se venía faciendo dende va tiempu y por sectores venceyaos al terrén de les ciencies naturales y de la teunoloxía, darréu que yeren éstos ámbitos en bona midida ayenos al usu comunicativu del idioma asturianu. Tal pidimientu concretóse nes Xornes Internacionales d’Estudiu de l’ALLA en 2010 y la institución llingüística cumple col compromisu de so d’espublizar una revista científica como la qu’agora apaez en versión dixital.