Author: admin

La Universidá d’Uviéu ta acabante d’asoleyar la ufierta y la forma d’inscripción nos sos cursos de branu, ente los que tán los de la Universidá Asturiana de Branu (UABRA), entamaos a comuña cola Academia de la Llingua Asturiana (ALLA) y que, esti añu, van facese n’El Campu (Casu).

Pa inscribise nos cursos hai que siguir dos pasos. De primeres, facer una prematrícula na ALLA, siguiendo les indicaciones espublizaes na web http://alladixital.org/uabra. Darréu, ye necesario formalizar la matrícula na Universidá al traviés de https://www.uniovi.es/estudia/extension/cursosverano, comunicándo-ylo, d’últimes, a l’ALLA. Los gastos asociaos a estos dos pasos inclúin, amás del coste de matrícula y certificación, el desendolcu docente del propiu cursu, l’agospiu, la mantención y les actividaes culturales complementaries (conferencies y música) abiertes a la comunidá, que van anunciase d’equí a unos díes. La xera docente va tener dos espacios n’El Campu (La Campa y el Centru d’Interpretación del Parque Natural de Redes), mentes que la residencia va tar allugada nel albergue propiedá del Conceyu de Casu.

El programa de formación llingüística xeneral ye’l compuestu polos cursos Elemental y Avanzáu de llingua asturiana, dirixíos polos profesores Gonzalo Llamedo y Claudia Elena Menéndez. Con 60 hores llectives, en 10 díes de docencia, la prematrícula na ALLA de caún d’estos cursos cuesta 200 euros, mentanto que la matrícula na Universidá, 192 €.

Dientro de los cursos d’afondamientu cultural y llingüísticu, como ye vezu, hai dos turnos. Nel primeru, ente’l 29 de xunetu y el 2 d’agostu, tán el cursu de Capacitación pa la traducción al asturianu (dirixíu pola direutora de la UABRA, Cristina Valdés) y el de Feminismu, sociedá y futuru n’Asturies (dirixíu por Marta Mori y Margarita Fernández Mier). Nel segundu turnu, del 5 al 9 d’agostu, celebraráse’l cursu L’entornu natural del Conceyu de Casu como recursu didáuticu (dirixíu por Elena Arboleya) y el de Creación lliteraria n’asturianu (dirixíu por Isabel Truán). Estos cuatro cursos d’afondamientu, con 30 hores llectives en 5 díes de docencia, conlleven 120 euros de prematrícula na ALLA y 96 de matrícula na Universidá.

Nel enllaz que sigue darréu vas poder dir consultando toles novedaes y actualizaciones. La matrícula abre’l 10 de xunu.

https://alladixital.org/uabra/

Máis información en: https://alladixital.org/lainstitucion/secretaria-llinguistica-del-navia-eo/

La Junta de Govern de l’AVL, formada pola presidenta Verònica Cantó, el vicepresidente Rafael Ramos, la secretaria Inmaculada Cerdà y los vocales M. Àngles Francés y Artur Ahuir, visitó la selmana pasada’l llar de l’ALLA, onde foi recibida por cuatro miembros de la Xunta de Gobiernu de l’ALLA: el presidente Xosé Antón González Riaño, el secretariu Xosé Ramón Iglesias Cueva y l’ayalgueru Carlos Lastra López, actuando Ana M. Cano González como vicepresidenta en funciones.

A lo llargo de más de dos hores d’alcuentru, dambes instituciones pudieron conocer les singularidaes y los numberosos puntos de conexón nes sos xeres académiques, l’estáu de desenvolvimientu de la filoloxía y les polítiques llingüístiques en cada comunidá y les posibilidaes de confluyencia futura, d’alcuerdu coles esperiencies y les ferramientes que caúna de les academies punxo al algame de la otra. Arriendes d’ello, la presidenta Verònica Cantó ufrió-y a l’ALLA una escelente edición facsimilar del Llibre dels feits del rei en Jaume, asoleyáu pola Academia Valenciana.

Nesti sen de collaboración, surdieron los tres primeros compromisos interinstucionales: l’asistencia de l’AVL al Día de les Lletres Asturianes de 2024, l’intercambéu de les publicaciones futures de los sos servicios editoriales y la recoyida de les principales víes d’afondamientu nel trabayu acomuñáu, nun conveniu qu’ha roblase nos meses vinientes.