Category: Anuncios

L’ALLA espubliza La cultura tradicional nos valles d’El Ríu de Trubia, segundu númberu de la coleición «Terrén»

La cultura tradicional nos valles d’El Ríu de Trubia ufierta xunta y reeditada la obra que, sobre’l dominiu territorial de los conceyos de Proaza, Quirós y Teberga vieno ufiertándo-y a l’Academia de la Llingua Asturiana un collaborador lleal y sollerte: Antonio Alonso de la Torre García. Les contribuciones equí compendiaes espublizáronse ente los años 1997 y 2020 dientro de Cultures: Revista Asturiana de Cultura (númberos 7 a 24). Trátase d’artículos onde’l focu varia ente la escala de llugar o parroquia y la de conceyu, carauterística del autor que permite matizar muncho’l so trabayu de campu.

Alonso de la Torre García ye maestru, espertu en llingua asturiana, llicenciáu n’historia y doctor n’historia del arte. La so vida llaboral desendolcóse primero como maestru d’escuela y depués como profesor d’institutu. Sicasí, la xera docente enxamás torgó la so dedicación al estudiu cultural de la contorna que meyor conoz, la qu’altraviesa El Ríu de Trubia nel so camín dende los cumales a l’amestadura con El Ríu Nalón. Amás de les obres equí recoyíes, ye importante sorrayar la so aportación a la coleición académica Testos de Recoyida oral col volume Dichos, cuentos ya otres narraciones recoyíes en Villamexín y al atropu toponímicu intensivu de la zona, siendo l’autor de dellos volúmenes correspondientes al conceyu de Proaza, asoleyaos n’otra coleición de la casa: Toponimia.

Consulta más información sobre la obra equí: https://alladixital.org/productu/la-cultura-tradicional-nos-valles-del-riu-de-trubia/

La escritora Berta Piñán Suárez, gana’l Premiu Nacional de Lliteratura Asturiana na so cuarta edición

Siguiendo les bases públiques del Premiu Nacional de Lliteratura Asturiana, l’ALLA fai anuncia del fallu del premiu, que tuvo llugar el llunes 19 de xineru del 2026. El Xuráu, presidíu pol Presidente de l’Academia, Xosé Antón González Riaño, tuvo amás formáu por: los miembros de númberu de la institución Ana María Cano, Xosé Ramón Iglesias y Carmen Muñiz; los profesores de la Universidá d’Uviéu Carmen Alfonso y Leopoldo Sánchez; la Premiu Nacional del 2023 Lourdes Álvarez; y, faciendo de secretariu y en representación del Gobiernu del Principáu d’Asturies, Antón García, Direutor Xeneral de Política Llingüística y Acción Cultural.

Llueu de tomar la pallabra tolos miembros del Xuráu, y tres del alderique correspondiente, fíxose la votación na que, por unanimidá, decidióse conceder el premiu a la escritora Berta Piñán Suárez.

Nel acta, el xuráu xustificó d’esti xeitu la decisión de concede-y el Premiu Nacional pola calidá d’un facer lliterariu que percuerre’l panorama asturianu de los caberos cuarenta años y nel que destaca la fondura d’una poesía sentida, sensible, abierta a los problemes cotidianos y del mundu y d’una bayurosa orixinalidá. Ye destacable, al empar, la coherencia d’una espresión narrativa na que l’apegu al territoriu y el tratamientu de tipos humanos cercanos dexa, xustamente, la posibilidá de la so interpretación universalista. La contribución de la obra lliteraria de Berta Piñán a la dignificación de la lliteratura asturiana, del so espardimientu fuera de les llendes d’Asturies y, a lo cabero, la so grandísima y decisiva importancia nel procesu de recuperación llingüística n’Asturies, afiten el sentir del xuráu a la hora de conceder el Premiu Nacional a una obra y a una persona que, de xuru, puen calificase como esceicionales y decisives nel valir actual de les nueses lletres.

El Premiu Nacional de Lliteratura, amás del correspondiente medayón conmemorativu y la edición d’un llibru de síntesis de la so obra, cuenta con una dotación económica de 6.000 euros. Siguiendo’l vezu de les dos primeres ediciones, Berta Piñán Suárez recibirá públicamente’l so gallardón dientro de los actos del Día de les Lletres Asturianes, previstos pa la tarde del 8 de mayu del 2026, nel Teatru Campoamor.

Uviéu, 22 de xineru del 2026

Cursu d’asturianu nivel B1-B2

David Guardado Diez protagoniza la tercer sesión de los «Alcuentros na ALLA»

¿Prestaríate conocer y entrugar les tos duldes a los Académicos? Nos «Alcuentros na ALLA» pues facelo.

Desendolcando’l so compromisu d’abertura a la comunidá, la institución llingüística d’Asturies entama los «Alcuentros na ALLA».

Esti ye un ciclu onde los y les académiques van ufrir al alderique les sos reflexones, análisis y vivencies en rellación cola so xera na Academia. En cada alcuentru, un miembru de la institución va proponer un tema concretu pa que’l públicu, d’un mou específicu y sistemáticu, vaya dirixendo la esposición, pente medies d’entrugues o comentarios concretos, a lo llargo d’una hora.

El próximu 14 de xineru de 2026, a les 19:30 h, David Guardado Diez va falar de «Dellos retos pal asturianu nel sieglu XXI», onde, tres d’una pequeña presentación de la temática que se propón abordar, el públicu asistente va tener la oportunidá d’entrugar al académicu sobre’l so trabayu y esperiencia nesa estaya del llabor de la institución.

«Negacionismu»: neoloxismu asturianu del añu 2025

Como yá ye vezu, coincidiendo colos díes postreros del añu, l’Academia de la Llingua Asturiana (ALLA) abrió una votación pa escoyer el neoloxismu asturianu del añu 2025, col compromisu d’inxertalu d’equí a poco nel Diccionariu de l’Academia de la Llingua Asturiana (DALLA). Les opciones ufiertaes yá formaben parte del material de trabayu que la comisión lexicográfica de l’ALLA estudia y, nel so casu, inxerta periódicamente nes actualizaciones del DALLA, principal fonte normativa de tipu léxicu de la llingua asturiana: diccionariu.alladixital.org.

La menos votada de les propuestes d’anguaño foi «cibercrime», qu’algamó’l 5% de los votos. Tampoco nun recibieron munchu sofitu «antroposa», col 7%, nin «queer», con un 12%. Más igualada tuvo la eleición ente «neurodiverxente» (32%) y el ganador, «negacionismu» (43%).

El términu «negacionismu» fórmase, igual que n’otres munches llingües, dende’l sustantivu «negación» (según el DALLA, «aición y efeutu de negar o negase») y el sufixu productivu «-ismu». El negacionismu refierse a una actitú que consiste una refuga irracional o interesada de los fechos demostraos y de les teoríes afitaes nel consensu científicu.