Author: admin

Álvaro Queipo, presidente del Partíu Popular n’Asturies, visitó güei xueves l’Academia de la Llingua Asturiana (ALLA), acompañáu polos diputaos José Luis Costillas y Beatriz Polledo. Pel llau de l’Academia, asistieron Xosé Antón González Riaño y Xosé Ramón Iglesias Cueva, presidente y secretariu de la institución.

De la xunta celebrada ente les presidencies del PP asturianu y l’ALLA, calificada d’histórica (por ser la primer vegada que la presidencia popular visita la institución llingüística) y especialmente cordial, surdieron dellos puntos d’alcuentru que dambes partes quieren facer públicos:

1. La llingua y la cultura asturianes tienen que tar al marxe d’ideoloxíes y opciones polítiques concretes, considerándoles una cuestión tresversal.
2. L’asturianu y l’eonaviegu son un bien social que contribuye a la vertebración de la sociedá asturiana.
3. Dientro de les aiciones de la política llingüística, ha garantizase la llibertá personal nel usu ensin restricción de les llingües propies.
4. L’Academia de la Llingua Asturiana ye’l referente común pa toa institución, organismu o ciudadanu no tocante a la cuestión llingüística nes sos derivaes científica, normativizadora y normalizadora.
5. La política llingüística deriva non d’una voluntá particularista, sinón d’un marcu llexislativu que se tien de cumplir, onde la referencia máxima ye la Constitución Española, xunto a otres como l’Estatutu d’Autonomía, la Llei d’usu, la Carta europea de les llingües minoritaries y los decretos de los currículos educativos.
6. Les modificaciones, adautaciones o meyores plantegaes en rellación cola política llingüística habríen facese col máximu consensu parllamentariu en representación de los asturianos y les asturianes.
7. L’Academia de la Llingua Asturiana y el Partíu Popular apáutense en siguir caltiendo xuntes y contautos periódicos col envís de siguir afondando nos alcuerdos y postures compartíes.

Uviéu, 18 de xineru del 2024

El presidente de l’Academia recibe al so portavoz parllamentariu, Xabel Vegas

Nel día de güei, 16 de xineru de 2024, Xabel Vegas, acompañáu pol xefe de prensa de la formación, Silvino Álvarez Rueda, fexo una visita al llar de l’Academia de la Llingua Asturiana (ALLA) pa caltener un aconceyamientu col presidente de la institución, Xosé Antón González Riaño.

A lo llargo de la xunta, tratáronse temes especialmente relevantes en rellación cola política llingüística a desendolcar n’Asturies. Asina, coincidióse na necesidá de meyorar cualitativa y cuantitativamente la presencia del asturianu y l’eonaviegu na Radiotelevisión del Principáu d’Asturies (RTPA), afondando nes condiciones formales riquíes pa garantizar un porcentax equilibráu de les llingües dientro de les emisiones del ente públicu. De mou especial, falóse del contratu‑programa, previstu nel marcu normativu de referencia.

Per otru llau, el presidente de l’Academia apurrió a los representantes de Convocatoria por Asturies el documentu coles propuestes de l’ALLA pa facer vidable’l plan de normalización previstu pol Gobiernu del Principáu d’Asturies, que l’Academia yá treslladare anteriormente al presidente Barbón y a la Viceconseyera de Cultura, Política Llingüística y Deporte, Ana Vanessa Gutiérrez.

La formación política comprometióse a estudiar el documentu y, nel so casu, a facelu de so, dientro de la dinámica del gobiernu de coalición. A lo cabero, les partes aconceyaes alcordaron siguir calteniendo alcuentros nos que s’afonde nel desarrollu efeutivu de la política llingüística n’Asturies.

Uviéu, 16 de xineru del 2024

Nel día de güei, llunes 15 de xineru, Xosé Antón González Riaño, Presidente de l’ALLA, aconceyó con Lydia Espina, Conseyera d’Educación, y con David Artime, Direutor Xeneral d’Ordenación Académica. A lo llargo del aconceyamientu, que s’allargó durante una hora y media, tratáronse temes relevantes en rellación cola presencia educativa del asturianu y del eonaviegu. Asina, y ente otros, afondóse en cuestiones como la proyeición de la cultura y la llingua asturiana na Educación Infantil de 0-3 años (escuelines) dende’l puntu de vista de les necesidaes formatives del profesoráu y de la ellaboración de materiales curriculares; la necesidá, pedagóxica y educativa, de cuntar con espacios infantiles na programación de la RTPA; o, en fin, la meyora de la estructura organizativa de la Conseyería p’algamar una presencia escolar de la llingua más afayada a les espeutatives sociales.

El Presidente de l’ALLA tamién apurrió a la Conseyera y Direutor Xeneral les propuestes académiques, que yá conocen tanto’l Presidente Barbón como la Vice-Conseyera de Cultura, Política Llingüística y Deporte, en rellación col anunciáu Plan de Normalización de la Llingua Asturiana a llevar alantre pol Principáu nesta llexislatura. Nesti sen, l’ALLA plantega toa una llinia de propuestes que pasen, ente otres, pela reconocencia de la especialidá docente pal profesoráu, el siguimientu de la escolarización del asturianu y les posibilidaes pa la so optimización, la recuperación d’esperiencies d’usu vehicular del asturianu o la necesidá de cuntar con materiales curriculares afayaos a la LOMLOE y al Decretu del Currículu del Principáu d’Asturies.

La reunión, fecha nun clima de cordialidá y enfotu compartíu, tuvo un altu grau d’alcuerdu nos estremaos aspeutos consideraos. Dambes partes quedaron en volver a aconceyar a lo llargo del presente cursu col envís de valorar la puesta en práutica de les midíes consideraes.

Uviéu, 15 de xineru del 2024

Queda abiertu’l plazu de matrícula pa la primer convocatoria de la Prueba de conocencia de la llingua asturiana. La prueba va facese’l 27 de xineru de 2024 nel llar de l’Academia.

Más información en: https://alladixital.org/pruebes-de-conocencia-de-la-llingua-asturiana/

Nos últimos díes d’avientu, l’Academia de la Llingua Asturiana (ALLA)  convocara una votación pa escoyer el neoloxismu del añu 2023, col compromisu d’incorporalu al Diccionariu de l’Academia de la Llingua Asturiana (DALLA). Les propuestes, toes cinco, formaben parte del material de trabayu que la comisión lexicográfica de l’ALLA tresna, estudia y valida periódicamente pa l’actualización del DALLA, principal fonte normativa de tipu léxicu de la llingua asturiana: diccionariu.alladixital.org.

La menos votada de les propuestes foi «llimpieza étnica», qu’algamó’l 5% de los votos. Tampoco nun recibió munchu sofitu «xeollocalización», col 12%. Más igualada tuvo la eleición ente «intelixencia artificial» (24%), «cambéu climáticu» (26%) y la favorita, «xentrificación», que sacó ún de cada tres votos (33%).

El términu «xentrificación» ye un anglicismu (gentrification), obra de Ruth Glass, socióloga que va mediu sieglu yá describía’l procesu de tresformación social y urbana determináu pola sostitución de les clases trabayadores por otres de la nobleza baxa o terrateniente, la «gentry». Esti ye un fragmentu del so llibru London: Aspects of Change, del añu 1964:

Ún per ún, munchos de los barrios de clas trabayadora
ta invadiéndolos la clas media, mesmo alta que baxa.
N’emprimando esti procesu de «xentrificación» nun distritu,
entaína hasta desapolinar a la mayoría o a tolos habitantes
de clas trabayadora, camudando dafechu’l calter social del distritu.