Máis información: https://alladixital.org/cursu-de-capacitacion-docente-neonaviegu-el-franco/
El Pequeñu Atles Llingüísticu d’Asturies (PALLA) ye’l primer atles de conxuntu dedicáu a la realidá llingüística d’Asturies y el resultáu d’un llargu llabor de compilación y estudiu de datos de campu desendolcáu pola Academia de la Llingua Asturiana. Dientro de la tradición de les obres de xeollingüística, el palla enmárcase nos «pequeños atles», obres qu’ufren una visión cartográfica sintética, comentada ya interpretativa.
El públicu xeneral va atopar nel palla una obra visual que rexistra la bayura llingüística, sobre manera léxica, del asturianu y l’eonaviegu. El públicu especializao va tener al so algame una ferramienta d’interés científicu, con comentarios de calter etimolóxicu, históricu y semánticu. El material presentao procede d’encuestes de tres fontes, mayormente inédites, que se trataron nel palla con una metodoloxía común: 24 puntos del Atlas Lingüístico de la Península Ibérica (1932-1947), 35 del Atlas Lingüístico de España y Portugal (años setenta) y otros 35 de la campaña d’encuestación fecha pola ALLA en 2025 dientro del Sistema Integral d’Estudios Llingüísticos (SIELLA).
Esti primer volume recueye 75 mapes y comentarios dedicaos al mundu animal —insectos y otros invertebraos, aves, reptiles, anfibios y mamíferos—, escoyíos pol so interés llingüísticu y pola posibilidá de comparanza ente les distintes fontes. Amás d’ello, incorpora les claves metodolóxiques necesaries pa interpretar esta y les entregues próximes del PALLA.
Hasta’l 27 de mayu ta abiertu’l plazu de matrícula pa convocatoria de la Prueba de conocencia de la llingua asturiana (nivel elemental y mediu). La prueba va facese’l 30 de mayu del 2026 nel llar de l’Academia.
Más información en: https://alladixital.org/pruebes-de-conocencia-de-la-llingua-asturiana/
El Principín vuelve a les llibreríes. El clásicu d’Antoine de Saint-Exupéry, qu’hai poco celebró’l 40 aniversariu de la so primer edición n’asturianu, ye’l segundu númberu de la coleición «Medría», que reedita obres infantiles y xuveniles.
Esti llibru, qu’escuende una reflexón fonda sobre la vida, l’amor y l’amistá, sigue siendo güei una obra fundamental pa grandes y pequeños.
Los llibros infantiles y xuveniles más vendíos n’asturianu, remocicaos agora en «Medría», la nueva coleición de l’Academia de la Llingua Asturiana. Nun formatu nuevu vuelven a les llibreríes les obres coles que medraron delles xeneraciones de llectores.
Los cuentos de Ñuberu ye’l primer númberu de «Medría», nel que se recueyen los cinco llibros espublizaos pola ALLA nos años 80, obra de Miguel Solís Santos: L’Arcu Iris y Ñuberu (1982); Les cuatro estaciones y Ñuberu (1983); Los cazadores, los llobos y Ñuberu (1984); Los árboles, l’ocalitu y Ñuberu (1985) y Ñuberu y la paz (1987).
Nestes aventures que-y pasaron colos sos collacios, Ñuberu collabora con ellos pa consiguir un mundu más ecolóxicu, pacíficu, afayadizu y feliz.
Yá disponible en toles llibreríes asturianes y na de l’ALLA.
