La revista CULTURES 27 (2023) yá ta disponible nes llibreríes asturianes y na llibrería del llar de l’Academia de la Llingua Asturiana, n’Uviéu.
Nesti númberu non monográficu siguen enantándose temátiques yá trataes en númberos anteriores, como la consideranza de la población del llobu n’Asturies. Sicasí, tamién hai güecu pal estudiu de la lliteratura oral tradicional y la so trescripción nel sieglu XX, les creyencies y rituales en Palacios del Sil, los remedios melecinables pa les malures de los güeyos o la reflexón sobre’l llugar d’Asturies nel paisaxe sociocultural contemporaneu.
Otra manera, recuéyense collaboraciones qu’estudien les práutiques de l’arqueoloxía agraria, l’asturianu na documentación medieval nel monesteriu de Santa María de Lapedo (Balmonte), les figures y personaxes venceyaos al sector ganaderu na zona del Navia-Eo nel sieglu pasáu y un analís de delles práutiques específiques na collecha de la mazana y el so por qué.
Zarren la revista les reseñes de les obres «Enciclopedia de los juegos y deportes tradicionales de Asturias» (de Gerardo Ruiz Alonso y Marta Ruiz Ramos), «¡Cóntos contos!, 101 contos del occidente d’Asturias» y «Había úa vez» (dambos de Martin de Villar) y «La flauta del sapo» (edición de María Jesús Ruiz de la obra d’Alejandro Casona ilustrada por Federico Delicado).
