admin, autor en Academia de la Llingua Asturiana

05/09/202505/09/2025

A colección “Bidureira” sigue medrando con el obra de María José Fraga Suárez

A colección “Bidureira” sigue medrando con el obra María José Fraga Suárez

Xa ta na caye el sesto númaro de Bidureira: Mentres faga solombra, de María José Fraga Suárez.

Lo mesmo qu’el sol nos alluma y saca fora a escuridá interior en forma de solombras, os textos d’este llibro poin el foco nas esperiencias vitales y proyéctanlas de xeitos diversos nas súas páxinas. Nace así úa lliteratura híbrida na qu’a poesía dialoga col relato pra volar na imaxe auténtica y poliédrica dos sentimentos, na clave mesma da esistencia. Versos que reverberan espandíndose en contos, visióis que se volven materia, música, al cabo, que s’interpreta cua partitura da narración.

Consulta más información da obra: https://alladixital.org/productu/mentres-faga-solombra/

04/09/2025

Cursu d’asturianu p’adultos Noyos A1-A2

L’Academia de la Llingua Asturiana anuncia Noyos, el primer cursu d’asturianu p’adultos empobináu a xente que quiera algamar un nivel elemental (A1-A2) del idioma.

El cursu, basáu nun enfoque comunicativu, tien una duración de 100 h llectives. D’estes, 60 van ser presenciales y 40 h d’autoestudiu al traviés d’una plataforma con accesu a material complementariu y conteníu audiovidual.

Les clases presenciales van ser los martes y xueves n’horariu de 17 a 20 h, dende’l 7 d’ochobre hasta’l 11 d’avientu, nel llar social de l’Academia (C/Águila, 10 – Uviéu).

El preciu, de 150 €, inclúi materiales y la matrícula na Prueba de Conocencia. El periodu d’inscripción abre’l 15 de setiembre.

Puedes consultar más información equí: https://alladixital.org/programa-noyos/

02/09/202504/09/2025

Presentación del primer tomu de la reedición de la «Historia de la Lliteratura Asturiana»

La Biblioteca d’Asturies «Ramón Pérez de Ayala» acueye’l miércoles 10 de setiembre la presentación del primer tomu de la reedición, correxida y ampliada, de la «Historia de la Lliteratura Asturiana».

L’actu va celebrase a les 18:30 h y va cuntar cola presencia de los coordinadores de la obra, Xosé Ramón Iglesias Cueva y Marta Mori d’Arriba; el Presidente de l’ALLA, Xosé Antón González Riaño, y el Direutor Xeneral d’Acción Cultural y Normalización Llingüística del Gobiernu del Principáu d’Asturies, Antón García. D’esta miente, tamién se va contar cola presencia de dellos de los autores d’un llibru que, dos décades depués, y escosada la primer edición, anóvase incorporando les novedaes apaecíes nos años caberos.

27/08/202527/08/2025

Asoléyase’l númberu 145 de la coleición Toponimia

Xavier Cayao Valdés recueye nesti volume la toponimia mayor y menor de la parroquia de Rales, Villaviciosa. Esti númberu ye’l resultáu del trabayu ganador na modalidá de la onomástica del terrén del Certame d’Investigación que convoca l’Academia de la Llingua Asturiana. Con esta yá son tres les toponimies de Villaviciosa asoleyaes nesta coleición.

Consulta la obra nel catálogu calcando EQUÍ

05/08/2025

Cantares d’amor y guerra, de Gaspar García Laviana, traducíos al asturianu por Lourdes Álvarez

Gaspar García Laviana, amás de cura y guerrilleru, tamién yera poeta, y los sos poemes circulaben de mano en mano ente los guerrilleros del Frente Sur. Estos son poemes enllenos d’amor: amor al campesín, a les probes prostitutes a les que tanto defendió enfrentándose a les autoridaes somocistes, amor al paisaxe, al llagu qu’él llama «el llagu más guapu del mundu», a la tierra pola que morrió. Y polo mesmo son también poemes enllenos d’ira. Esta ye la poesía que lu llevó a la guerrilla y a la muerte, y qu’agora podemos lleer n’asturianu gracies a la traducción de Lourdes Álvarez empobinada pola «Asociación por la memoria de Gaspar García Laviana».