Author: admin

Posted on

Prueba de conocencia de la llingua asturiana (mayu 2009)

CONVOCATORIA DE MAYU*

L’Academia de la Llingua Asturiana, sabiendo’l fondu interés de munches persones de llograr que se reconoza la so conocencia de la llingua y manifestar asina’l so fondu amor al idioma asturianu, fadrá dos convocatories añales onde van poder evaluase diches conocencies. Nesi sen, da anuncia de les sos iniciatives pa conocimientu xeneral:

  1. Nos meses de xineru y mayu celébrense les pruebes, abiertes a toles persones interesaes.
  2. Unos quince díes enantes de les pruebes va abrise un plazu de matrícula.
  3. A les persones declaraes aptes nes pruebes citaes, l’Academia dará-yos un documentu onde s’afite la conocencia nel nivel 1 o básicu según calces siguíos por esta Institución.
  4. Les persones que nun superen les pruebes del nivel 1 podrán presentase a nueves convocatories toles vegaes que-yos pruya.
  5. Pal bon resultáu d’estes pruebes habrá tenese un dominiu básicu de les estayes que vienen darréu:
    1. ESTAYA LLINGÜÍSTICA
      1. Teoría gramatical: conocencia y dominiu del funcionamientu gramatical del asturianu y de la normativa académica.
      2. Práutica escrita: emplegu amañosu de la llingua, puestu en práutica gracies a exercicios gramaticales y de composición escrita.
      3. Práutica oral: emplegu faláu de la llingua, nuna situación real o imaxinaria, que se va valorar nuna conversación colos miembros del xuráu calificador.
    2. ESTAYA DE LLINGUA Y SOCIEDÁ
      Conocencia del allugamientu de la llingua dientro de la sociedá asturiana asina como del procesu de normalización en que ta inxerta.
  6. La prueba va tener dos partes, una escrita (dictáu, torna, exercicios gramaticales, redaición) y otra falada (conversación).

Nota. Resulta imprescindible conocer les xeneralidaes gramaticales de la llingua asturiana y los aspeutos básicos de la so normativa ortográfica (Normes ortográfiques, ALLA, Uviéu, 2005, 6ª ed.; Gramática de la Llingua Asturiana, ALLA, Uviéu, 2001, 3ª ed.).

Asina mesmo, aconséyase la llectura de testos fechos acordies cola normativa, como los asoleyaos por esta Academia.

* En resultes d’esto, el 30 de mayu de 2009 va facese la prueba semestral. El plazu de matrícula ye del 18 al 28 de mayu.

Posted on

Llingua asturiana y Estatutu. Actu Públicu de l’Academia

Énte’l gravísimu peligru que supón pal futuru de la llingua asturiana la propuesta de redaición del Artículu 4u del Estatutu d’Autonomía d’Asturies, l’Academia de la Llingua Asturiana fai un llamamientu a tolos asturianos y asturianes sensibles col idioma pa qu’acudan a la xunta que se fairá’l próximu xueves, día 17, a les 19 hores, na Sala de Cámara del Auditoriu «Principe Felipe» d’Uviéu.

Nel actu, amás de la Presidenta de l’Academia que dará anuncia pública del posicionamientu de la Institución, intervendrán representantes d’estremaos sectores de la sociedá civil que viven n’asturianu y que tán enfotaos en siguir faciéndolo. Llueu d’estes intervenciones, daráse la pallabra al públicu asistente.

Posted on

L’ALLA refuga dafechu la propuesta del conteníu del artículu 4 del Estatutu d’Autonomía

Llueu de conocer la propuesta de redaición del Artículu 4u del Estatutu d’Autonomía p’Asturies, pautada polos partíos mayoritarios (PSOE y PP) y asoleyada na prensa asturiana del vienres 11 de xunetu de 2008, l’Academia de la Llingua Asturiana quier dexar afitao y dar anuncia pública de lo que vien darréu:

  1. La redaición propuesta ye un intentu consciente, plantegáu arrémente, d’acabar dende’l puntu de vista llegal col patrimoniu inmaterial más importante d’Asturies: la so llingua y cultura.
  2. L’Academia refuga dafechu la redaición y conteníu del artículu 4u porque supón nidiamente un atentáu contra la llingua y contra la dignidá del pueblu asturianu. Non solo nun hai nengún avance, sinón que ye un retrocesu bultable en rellación colos llogros d’estos años.
  3. De nenguna de les maneres l’Academia de la Llingua Asturiana sedrá cómpliz d’un desafueru como’l que supón la redaición que se nos ufierta na actual reforma del Estatutu d’Autonomía.
  4. Los representantes políticos que roblen el pautu tienen que tener clara la so responsabilidá histórica nel procesu de desaniciamientu de la llingua asturiana que se ta produciendo.
  5. L’Estatutu con esta redaición dexa fuera a una parte importante de los asturianos. Darréu d’ello ye, dende la so nacencia, un estatutu provisional que fairá falta volver a iguar bien llueu. Y ello nun ye bono nin pa la llingua, nin p’Asturies, nin pa la so xente.
  6. Los asturianos han saber que si nun problema de fácil arreglu lo que s’intenta ye buscar les víes más dañibles, ello lleva apareyao que la llingua seya elementu permanente de discrepancia y confrontación ente los asturianos. Los firmantes d’esa redaición son los únicos que tán xenerando na sociedá una tensión innecesaria.
  7. Nun se pue almitir como xida pa esti tratamientu llamentable la invocación a los problemes llingüísticos d’otres comunidades. Nes comunidaes con problemes como los que s’anuncien foron, nunos casos, la inhibición d’esos partíos políticos y, n’otros, una trayeutoria indefendible los que xeneraron problemes qu’en nada s’asemeyen al casu asturianu. Ente nós podíen iguase mui bien les coses, pero la vía qu’escueyen les fuercies polítiques mayoritaries ye, llastimosamente, un brinde a semar el desánimu y la protesta social desque nun dexen ninguna vía alternativa razonable.
  8. L’Academia fai un llamamientu a los militantes del PSOE y del PP pa que faigan entrar en razón a unes executives qu’amuesen de contino’l más xabaz complexu antiasturianu. Nun se pue pensar que dientro d’estos partíos seyan mayoritaries les posiciones viscerales a la escontra de la llingua d’Asturies y de les sos posibilidaes de futuru. Encamentamos, entós, a esa militancia y a tola sociedá asturiana que faigan tolo posible pa que nestos momentos inciertos pa la llingua asturiana se pueda reconducir una situación que va oxetivamente a la escontra de la unidá, harmonía y futuru del pueblu asturianu.

Uviéu, 11 de xunetu de 2008

Posted on

Nota de prensa de l’Academia de la Llingua Asturiana. LOS ESTUDIOS DE FILOLOXÍA ASTURIANA DIENTRO DE LA UNIVERSIDÁ D’UVIÉU

L’ Academia de la Llingua Asturiana, énte l’alcuerdu tomáu, el 24 de xunu, na Xunta de la Facultá de Filoloxía de nun incluyir l’asturianu dientro del catálogu de maiores y minores, quier manifestar lo que vien darréu:

  1. La so reconocencia al Equipu Decanal saliente, porque dexando a un llau estigmes y prexuicios estrallingüísticos, inxertó l’asturianu dientro de la propuesta del catálogu de maiores y minores a ufiertar nos nuevos títulos de Grau, al mesmu nivel que’l restu de les llingües que s’imparten nestos momentos na mentada Facultá.
  2. La so fonda esmolición énte la inseguridá xurídica que supón la decisión tomada, darréu qu’ésta asítiase oxetivamente a la escontra de los conteníos de la Llei d’Usu del Asturianu de 1998 (Art. 17: «La Universidá d’Uviéu, nel exerciciu de les sos competencies y col fin de garantizar la capacitación afayadiza del profesoráu necesariu pa la enseñanza del bable/asturianu, llevará darréu, al traviés de los correspondientes departamentos, la formación inicial d’ésti. Del mesmu mou, compete a la Universiá la investigación llingüística y filolóxica en rellación col bable/asturianu»).
  3. La so inquietú polos perxuicios causaos al alumnáu, al refugar un planteamientu académicu dafechu prudente y fondamente respetuosu col drechu a la llibre eleición per parte del mesmu, al proponer un bloque d’estudios d’asturianu optativu y combinable, d’un llau, y qu’atendía a les necesidaes reales de la demanda educativa del futuru profesoráu de Llingua Asturiana, d’otru. Hai que conseñar, amás, que la propuesta cuntaba col sofitu científicu y cola esperiencia d’un profesoráu que vien impartiendo materies rellacionaes col asturianu, dende va años, na Facultá de Filoloxía.
  4. La denuncia de los argumentos demagóxicos y alarmistes nos que se sofitaba la posición que foi aprobada, al entemecer lo académico colo político-ideolóxico, tal y como se pue apreciar, por exemplu, na llinia argumental que recoyía testualmente’l documentu de la enmienda: «yo —diz el proponente— no puedo respaldar una inclusión que contribuye a reforzar la imagen del asturiano como lengua nacional, eventualidad que yo al menos no desearía ver realizada».
  5. El so enfotu en que’l nuevu Equipu Decanal y la Xunta de Facultá seyan quien, xunto col Rectoráu y les autoridaes del Principáu d’Asturies, a reconducir la situación presente y dar a los estudios d’asturianu’l llugar que-yos correspuende, como una llingua más de les que s’ufierten na Facultá de Filoloxía, dientro de la estructura de los nuevos títulos de Grau. Y nun sedría aceutable nenguna otra solución intermedia.
  6. La petición a les fuerces polítiques parllamentaries asitiaes na Xunta Xeneral del Principáu pa qu’aborde la solución definitiva d’estos y otros problemes arreyaos al exerciciu de los derechos llingüísticos de los asturianos, pente medies del reconocimientu xurídicu del asturianu como llingua co-oficial nel Estatutu d’Autonomía d’Asturies.

Llamenta l’Academia que se llegue a esta situación xustamente porque nun cumplieron les correspondientes autoridaes un pautu anterior de la mesma Facultá que pidió nel so día que se creare la especialidá de Filoloxía Asturiana.

Cuando una demanda democrática nun s’atiende ta favoreciéndose que los intereses antidemocráticos actúen a la escontra de los más.

Uviéu, 26 de xunu de 2008

Posted on

Resultáu de los Concursos de l’Academia de la Llingua Asturiana 2008

Concursos d’investigación

Aconceyáu’l Xuráu de los Concursos d’investigación (Recoyida de material toponímico oral, Recoyida oral de léxicu asturianu, y Concursu d’investigación llingüística) que convoca l’Academia de la Llingua Asturiana correspondiente al añu 2008, formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apáutase nos siguientes acuerdos:

Concursu de recoyida de material toponímico oral

  • Premiar con 600 € el trabayu tituláu Toponimia de la parroquia de Trespena (Proaza) del que son autores Antonio Alonso de la Torre García, y Francisca Iglesias Álvarez.

Concursu de recoyida oral de léxicu asturianu

  • Dexar ermu’l concursu de Recoyida oral de léxicu asturianu.

Concursu d’investigación llingüística

  • Premiar con 600 € el trabayu tituláu Diccionariu politécnicu de la llingua asturiana (Tomu III, ciencies Matemátiques), del que ye autor Pablo Suárez García.

Concursu d’Investigación sobre lliteratura asturiana

Aconceyáu’l Xuráu del Concursu d’investigación sobre lliteratura asturiana que convoca l’Academia de la Llingua Asturiana correspondiente al añu 2008, formáu por Miguel Ramos Corrada como presidente, Antonio Fernández Insuela como vocal, faciendo de secretariu Alfonso Martín Caso, apáutase na siguiente resolución:

  • Dexar ermu’l concursu d’ Investigación sobre lliteratura asturiana.

Concursu de llectures pa rapazos

Aconceyáu’l Xuráu del Concursu de llectures pa rapazos que convoca l’Academia de la Llingua Asturiana correspondiente al añu 2008, formáu por Urbano Rodríguez Vázquez como presidente, Vicente García Oliva como vocal y faciendo de secretariu Pablo Xuan Manzano Rodríguez, apáutase nel siguiente acuerdu:

  • Dar el premiu de 600 €, ex aequo, a les obres titulaes Olaya n’África, de la que ye autora Helena Trexu Fombella y Cuentiquinos del versu, de la que son autores José Luis Campal y Aurora Sánchez.

Concursu de creación lliteraria, premiu “Llorienzu Novo Mier”

Aconceyáu’l Xuráu del Concursu de creación lliteraria, premiu “Llorienzu Novo Mier” que convoca l’Academia de la Llingua Asturiana correspondiente al añu 2008, formáu por Miguel Ramos Corrada como presidente, Carlos Rubiera Tuya como vocal, faciendo de secretariu Xosé Ramón Iglesias Cueva, apáutase na siguiente resolución:

  • Premiar con 600 € la narración titulada Díes d’iviernu, de la que ye autor Xurde Fernández Fernández.

Concursu de teatru

Aconceyáu’l Xuráu del Concursu de teatru que convoca l’Academia de la Llingua Asturiana correspondiente al añu 2008, formáu por Miguel Ramos Corrada como presidente, Adolfo Camilo Díaz como vocal, faciendo de secretaria Marta Mori d’Arriba, apáutase na siguiente resolución:

  • Premiar con 600 € la obra titulada Thule, de la que ye autor Josep Carlos Laínez.

Concursu de recoyida de material lliterario escrito, premiu “Federico G.-Fierro Botas”

Aconceyáu’l Xuráu del Concursu de recoyida de material lliterario escrito, premio “Federico G.-Fierro Botas” que convoca l’Academia de la Llingua Asturiana correspondiente al añu 2007, formáu por Ana María Cano González como presidenta, José Luis García Arias como vocal y Corsino García Gutiérrez faciendo de secretariu, apáutase nos siguientes acuerdos:

  1. Dar un accésit de 300 € al trabayu tituláu: Poesíes non recoyíes de Marcos del Torniello de 1899 a 1930, del que son autores José Luis Campal Fernández y Aurora Sánchez.
  2. Dar dos accésit de 150 € a los trabayos titulaos “Cosiquines de pocu más o menos” d’Antonio Pérez González, y a “Poesíes asturianes en Nostalgia”, de los que ye autor Inaciu Galán y González

Concursu de Recoyida de Material Lliterario Oral

Déxase ermu’l Concursu de Recoyida de material lliterario oral de l’Academia de la Llingua Asturiana correspondiente a la convocatoria del añu 2008.

Concursu de Curtios Cinematográficos

Déxase ermu’l Concursu de Curtios Cinematográficos de l’Academia de la Llingua Asturiana correspondiente a la convocatoria del añu 2008.